۱۵؍سالہ نوجوان کرکٹر نے مردوں کے ٹی ۲۰ ؍کرکٹ میں دنیا کا کم عمر ترین کپتان بن کر تاریخ رقم کی، لیکن ٹیم ان کے ٹیم سے باہر ہونے کی وجہ شکست نہیں بلکہ انڈیا اے کے آئندہ ٹورنامنٹ کی تیاری ہے۔
EPAPER
Updated: November 16, 2026, 6:07 PM IST | New Delhi
۱۵؍سالہ نوجوان کرکٹر نے مردوں کے ٹی ۲۰ ؍کرکٹ میں دنیا کا کم عمر ترین کپتان بن کر تاریخ رقم کی، لیکن ٹیم ان کے ٹیم سے باہر ہونے کی وجہ شکست نہیں بلکہ انڈیا اے کے آئندہ ٹورنامنٹ کی تیاری ہے۔
ہندوستانی کرکٹ کے ابھرتے ہوئے نوجوان بلے باز ویبھو سوریہ ونشی ایک مرتبہ پھر سرخیوں میں ہیں۔ محض ۱۵؍ سال کی عمر میں مردوں کے ٹی ۲۰ ؍کرکٹ کی تاریخ کے سب سے کم عمر کپتان بننے کا اعزاز حاصل کرنے والے ویبھو کو سَید مشتاق علی ٹرافی ۲۰۲۶-۲۷ ءمیں بہار کے دوسرے مقابلے کے لیے ٹیم میں شامل نہیں کیا گیا۔ بہار کی ٹیم نے پیر کو ریلویز کے خلاف مقابلہ کھیلا، جس میں ویبھو کی جگہ سورج کشیپ نے قیادت کی۔ ان کی عدم موجودگی کو ابتدا میں ٹیم سے باہر کیے جانے کے طور پر دیکھا گیا، تاہم اطلاعات کے مطابق اس کی اصل وجہ آئندہ اے سی سی مینز رائزنگ اسٹارز ایشیا کپ کے لیے انڈیا اے ٹیم کے ساتھ ان کی مصروفیت ہے۔
ویبھو سوریہ ونشی نے ۱۴ ؍ نومبر کو اندور کے ہولکر اسٹیڈیم میں سَید مشتاق علی ٹرافی کے ایلیٹ گروپ بی کے مقابلے میں سَوراشٹر کے خلاف بہار کی قیادت کی تھی۔ اس وقت ان کی عمر ۱۵ ؍سال اور ۲۳۲ ؍دن تھی۔ اس طرح وہ مردوں کے ٹی ۲۰ ؍کرکٹ میں کسی ٹیم کی کپتانی کرنے والے دنیا کے کم عمر ترین کھلاڑی بن گئے۔انہوں نے اس معاملے میں کروشیا کے زیک وکوسک کا ریکارڈ توڑا، جنہوں نے ۱۷ سال اور ۳۱۱ دن کی عمر میں اپنی قومی ٹیم کی قیادت کی تھی۔ ویبھو کے لیے یہ ایک تاریخی موقع تھا، کیونکہ اتنی کم عمر میں کسی بڑے ڈومیسٹک ٹی ۲۰ ؍ٹورنامنٹ میں ٹیم کی قیادت کرنا غیر معمولی کامیابی ہے۔
بطور کپتان اپنے پہلے مقابلے میں ویبھو نے ٹاس جیت کر پہلے بلے بازی کرنے کا فیصلہ کیا۔ انہوں نے اننگز کا آغاز کرتے ہوئے جارحانہ انداز اپنایا اور ۱۲ ؍ گیندوں پر ۱۸؍رنز بنائے۔ ان کی مختصر اننگز میں دو چوکے اور ایک چھکا شامل تھا۔ویبھو نے ابتدائی گیندوں پر تیز رن بنانے کی کوشش کی، لیکن سَوراشٹر کے گیند باز چیتن سکاریا نے انہیں اپنی ہی گیند پر کیچ آؤٹ کرکے پویلین واپس بھیج دیا۔ ان کے آؤٹ ہونے کے بعد بہار کی اننگز مطلوبہ رفتار برقرار نہ رکھ سکی اور ٹیم نے مقررہ ۲۰ ؍اوورز میں ۹ ؍وکٹوں کے نقصان پر ۱۳۷ ؍رنز بنائے۔جواب میں سَوراشٹر نے پانچ وکٹوں کے نقصان پر ہدف حاصل کرلیا اور بہار کو پانچ وکٹوں سے شکست کا سامنا کرنا پڑا۔ اس طرح ویبھو کی کپتانی کا آغاز ایک عالمی ریکارڈ کے ساتھ ضرور ہوا، لیکن ٹیم کو کامیابی دلانے میں وہ ناکام رہے۔
یہ بھی پڑھئے:میناکشی شیشادری نے رومانوی سے سنجیدہ تک ہر قسم کا رول نبھایا
بہار کو سَوراشٹر کے خلاف شکست کے بعد ۱۶؍ نومبر کو ریلویز کے خلاف اپنا دوسرا مقابلہ کھیلنا تھا۔ ویبھو کو ابتدائی دو میچوں کے لیے بہار کا کپتان مقرر کیا گیا تھا، اس لیے ان کی غیر موجودگی نے کرکٹ شائقین کی توجہ حاصل کی۔ان کی جگہ نائب کپتان سورج کشیپ نے ٹیم کی قیادت کی، جبکہ ویبھو کی عدم موجودگی میں آلوک کمار نے آیوش لوہاروکا کے ساتھ اننگز کا آغاز کیا۔ اس مقابلے میں بہار نے بہتر کارکردگی کا مظاہرہ کرتے ہوئے ریلویز کو چار وکٹوں سے شکست دی اور ٹورنامنٹ میں اپنی پہلی کامیابی حاصل کی۔ ریلویز نے بہار کے سامنے ۱۳۸ ؍رنز کا ہدف رکھا تھا، جسے بہار نے ۱۸.۲؍اوورز میں چھ وکٹوں کے نقصان پر حاصل کرلیا۔
ویبھو سوریہ ونشی کی بہار کی ٹیم سے غیر موجودگی کی اہم وجہ ان کا آئندہ بین الاقوامی سطح کا اسائنمنٹ ہے۔ انہیں اے سی سی مینز رائزنگ اسٹارز ایشیا کپ ۲۰۲۶ء کے لیے انڈیا اے کے ۱۵ ؍رکنی اسکواڈ میں شامل کیا گیا ہے۔ یہ ٹورنامنٹ ۱۹؍سے ۲۹؍نومبر تک قطر کے دارالحکومت دوحہ میں منعقد ہوگا۔انڈیا اے کی قیادت تلک ورما کریں گے، جبکہ ویبھو کے ساتھ ابھیشیک شرما، پربھسمرن سنگھ، رنکو سنگھ اور دیگر باصلاحیت کھلاڑی بھی ٹیم کا حصہ ہیں۔ ہندوستانی ٹیم اپنا پہلا مقابلہ ۲۰ ؍ نومبر کو نیپال کے خلاف کھیلے گی۔ اس کے بعد گروپ مرحلے میں پاکستان اے اور متحدہ عرب امارات کی ٹیموں سے بھی مقابلہ ہوگا۔
یہ بھی پڑھئے:فرانس: اے آئی تحریروں کیلئے ادبی انعام کا اعلان
رائزنگ اسٹارز ایشیا کپ کی خاص بات یہ ہے کہ اس مرتبہ مقابلے ۵۰ اوورز کے فارمیٹ میں کھیلے جائیں گے۔ اس لیے ویبھو کے سامنے صرف تیز رفتار ٹی ۲۰؍ کرکٹ میں اپنی صلاحیت ثابت کرنے کا نہیں بلکہ طویل اننگز کھیلنے اور مختلف حالات میں بلے بازی کرنے کا بھی موقع ہوگا۔انڈیا اے کے اسکواڈ میں ابھیشیک شرما اور پربھسمرن سنگھ جیسے اوپننگ بلے بازوں کی موجودگی کے باعث ابتدائی گیارہ کھلاڑیوں میں جگہ بنانے کے لیے انہیں سخت مقابلے کا سامنا بھی کرنا پڑسکتا ہے۔ تاہم کم عمری میں حاصل کی گئی کامیابیوں اور جارحانہ بلے بازی کے انداز کی وجہ سے ان سے خاصی توقعات وابستہ ہیں۔
ویبھو سوریہ ونشی گزشتہ کچھ عرصے سے اپنی غیر معمولی بلے بازی کے سبب ہندوستانی کرکٹ میں نمایاں مقام حاصل کررہے ہیں۔ وہ انڈین پریمیئر لیگ میں راجستھان رائلز کی جانب سے بھی اپنی صلاحیتوں کا مظاہرہ کرچکے ہیں۔ اس کے علاوہ ہندوستان کی جانب سے بین الاقوامی ٹی ۲۰؍ کرکٹ میں کم عمری میں قدم رکھ کر بھی انہوں نے توجہ حاصل کی ہے۔بہار کی ٹیم سے ان کی موجودہ غیر موجودگی کو کسی تادیبی کارروائی یا خراب کارکردگی کی بنیاد پر اخراج سمجھنا درست نہیں ہوگا۔ دستیاب اطلاعات کے مطابق ان کا اگلا ہدف انڈیا اے کے ساتھ رائزنگ اسٹارز ایشیا کپ میں شرکت ہے۔ اس طرح کپتانی کے پہلے مقابلے میں شکست اور دوسرے میچ سے غیر موجودگی کے باوجود ویبھو کے لیے یہ مرحلہ اپنے کرکٹ کریئر میں ایک نئی سطح پر خود کو ثابت کرنے کا موقع بن سکتا ہے۔