پاکستان کرکٹ کے لیجنڈ وسیم اکرم نے تمام بحث کو ختم کرتے ہوئے واضح طور عمران خان کو پاکستان کا عظیم ترین کرکٹر قرار دے دیا۔واضح  رہےکہ ۵؍ اکتوبر کو عمران خان ۷۳؍ سال کے ہوئے۔سماجی رابطے کی ویب سائٹ ایکس (ٹویٹر) پر جاری اپنے بیان میں وسیم اکرم نے لکھا کہ پاکستان نے عمران خان جیسا کرکٹر کبھی پیدا نہیں کیا، ملکی تاریخ کا سب سے عظیم کرکٹر ایک ہی ہے، کپتان عمران خان، برائے مہربانی یہ بحث اب ختم کر دیں۔ وسیم اکرم کے اس بیان نے سوشل میڈیا پر ہلچل مچا دی، جہاں مداحوں اور سابق کھلاڑیوں نے مختلف آراء کا اظہار کیا۔ 

اس سے قبل بھی وسیم اکرم نے ایک پوڈکاسٹ میں گفتگو کرتے ہوئے کہا تھا ’’کرکٹ میں میری کامیابیوں کے پیچھے سب سے بڑا کردار عمران خان کا تھا، وہ بہترین کپتان تھے جن کے ماتحت میں نے کھیلنے کا اعزاز حاصل کیا۔‘‘  وسیم اکرم نے مزید کہا کہ لوگ اکثر انہیں قدرتی ٹیلنٹ کا حامل کہتے ہیں، مگر عمران خان نے سب کچھ محنت اور عزم سے حاصل کیا، وہ قدرتی ٹیلنٹ والے نہیں تھے، لیکن انہوں نے انتھک محنت کی، اپنا بولنگ ایکشن بھی مکمل طور پر تبدیل کیا  جس میں مہینوں لگ جاتے ہیں اور اکثر کامیابی بھی نہیں ملتی، مگر انہوں نے کر دکھایا۔ 

بتا دیں کہ وسیم اکرم نے ۱۹۸۴ء میں عمران خان کی قیادت میں بین الاقوامی کرکٹ میں ڈیبیو کیا تھا اور بعد میں دونوں  نے۱۹۹۲ء کے ورلڈکپ کی تاریخی فتح میں مرکزی کردار ادا کیا تھا۔ عمران خان نے اپنے شاندارکریئر  میں ۸۸؍ ٹیسٹ میچوں میں ۳؍ ہزار ۸۰۷؍ رن بنائے جس میں۶؍ سنچریاں اور۱۸؍ نصف سنچریاں شامل ہیں جبکہ۲۲ء۱۸؍ کے اوسط سے ۳۶۲؍ وکٹیں  حاصل کیں۔ ون ڈے کرکٹ میں انہوں نے ۱۷۵؍ میچ کھیلے،۳؍ ہزار ۷۰۹؍ رن بنائے  اور۱۸۲؍وکٹیں حاصل کیں۔