برطانوی اخبار نے ذرائع کے حوالے سے کہا کہ مارچ میں دونوں امریکی دورے پر گئے تھے جہاں کووڈ میں مبتلا ہونے کے بعد دونوں نے انگلینڈ لوٹ کر خود کو قرنطین کر لیا تھا۔  برطانیہ کے سابق اسٹار فٹبال کھلاڑی اور ۲؍فٹبال کلب کے شریک مالک  ڈیوڈ بیکہم اور ان کی  اہلیہ فیشن ڈیزائنر و ماڈل  وکٹوریہ ایڈم بیکہم کے حوالے سے کہا جا رہا ہے کہ وہ رواں سال مارچ میں کورونا کا شکار ہوئے تھے۔ تاہم انہوں نے اس بات کو  خفیہ رکھا تھا۔

 برطانیہ کے سابق اسٹار فٹبال کھلاڑی اور ۲؍فٹبال کلب کے شریک مالک  ڈیوڈ بیکہم اور ان کی  اہلیہ فیشن ڈیزائنر و ماڈل  وکٹوریہ ایڈم بیکہم کے حوالے سے کہا جا رہا ہے کہ وہ رواں سال مارچ میں کورونا کا شکار ہوئے تھے۔ تاہم انہوں نے اس بات کو  خفیہ رکھا تھا۔ ایک برطانوی اخبار نے اپنی خصوصی رپورٹ میں ذرائع  کے حوالےسے دعویٰ کیا ہے کہ۴۵؍سالہ ڈیوڈ بیکہم اور۴۶؍ سالہ ان کی اہلیہ وکٹوریہ بیکہم  مارچ کے آغاز میں امریکی دورے کے دوران کووڈ ۱۹؍مرض میں مبتلا ہوگئے تھے۔
 رپورٹ میں دعویٰ کیا گیا ہے کہ دونوں امریکی ریاست کیلیفورنیا کے شہر لاس اینجلس میں ہونے والی ایک  پارٹی میں ممکنہ طور پر کورونا کا شکار ہوئے۔ ذرائع سے بتایا گیا کہ مارچ میں ڈیوڈ بیکہم اور ان کی اہلیہ  اپنے  فٹبال  کلب انٹر میامی  کی تشہیرکے حوالے سے امریکہ گئے تھے اور اسی دوران انہوں نے لاس اینجلس میں ایک پرتعیش پارٹی میں شرکت کی، جہاں متعدد اہم شخصیات نے بھی شرکت کی تھی۔ ان سے ہاتھ ملانا اور گلے  لگانابھی ہوا تھا۔ رپورٹ میں  دعویٰ کیا گیاہے کہ مذکورہ پارٹی میں شرکت کے بعد دونوں میاں بیوی بیمار پڑ گئے اور انہوں نے اچانک واپس برطانیہ آنے کا فیصلہ کیا۔ رپورٹ کے مطابق پارٹی میں شرکت کرنے کے بعد جہاں ڈیوڈ بیکہم اور وکٹوریہ کورونا میں مبتلا ہو گئے،وہیں اسی پارٹی میں شرکت کرنےوالے دیگر افراد بھی وباء میں مبتلا ہوگئے تھے۔ دونوں نے  برطانیہ واپسی پر محسوس کیا کہ وہ دوسرے لوگوں میں کورونا پھیلانے کا اہم ذریعہ بن چکے ہیں تاہم اس کے باوجود انہوں نے برطانیہ واپسی پر اپنے بیٹے  بروکلین کی ۲۱؍ ویں سالگرہ کی پارٹی بھی منعقد کی۔رپورٹ میں بتایا گیا ہے کہ دونوں میاں اور بیوی سمیت ان کے ڈرائیور، سیکوریٹی  گارڈ اور دیگر ملازمین بھی کورونا وائرس کا شکار   ہوگئے تھے۔تاہم اس  کےباوجود انہوں نے اپنی بیماری خفیہ رکھی اور کسی کو کوئی اطلاع نہیں دی۔ ذرائع سے بتایا گیا ہےکہ کوروناکی علامات شدید ہونے کے بعد وکٹوریہ نے اقدامات اٹھا کر اہل خانہ اور ملازمین کو ۲؍ ہفتوں تک قرنطینہ کردیا اور بعد ازاں اینٹی باڈی ٹیسٹ میں ڈیوڈ اور ان کی اہلیہ میں کورونا کی تشخیص ہوئی۔رپورٹ میں دعویٰ کیا گیا ہے کہ برطانیہ میں لاک ڈاؤن کے دوران ڈیوڈ بیکہم اور وکٹوریہ نے ڈاکٹرز اور دیگر صحت کے عملے کا شکریہ بھی ادا کیا اور ان کیلئے نیک تمناؤں کا اظہار بھی کیا۔ رپورٹ میں دعویٰ کیا گیاہے کہ کورونا میں مبتلا ہونے کی وجہ سے ڈیوڈ اور وکٹوریہ نے دوسرے ممالک کے اپنے دورے منسوخ کردئیے تھے اور حال ہی میں انہوں نے چھوٹے بیٹے کی ۱۸؍ویں سالگرہ کی پارٹی منعقد کرنے سے بھی گریز کیا۔ سابق فٹبال کھلاڑی ڈیوڈ بیکہم اور وکٹوریہ بیکہم کو نہ صرف برطانیہ بلکہ مغربی دنیا کا سب سے رومانوی جوڑا بھی قرار دیا جاتا رہا ہے دونوں کی محبت اور تعلقات کی چہ مگوئیاں دنیا بھر میں ہوتی رہتی ہیں۔ گزشتہ چند سال سے وقفے وقفے سے ان کے درمیان اختلافات کی خبریں بھی سامنے آتی رہی ہیں،تاہم ایسی خبروں کے باوجود دونوں کو ایک ساتھ دیکھا جاتا رہا ہے۔