ہندوستان کے یوکی بھامبری اور این سری رام بالاجی نے اپنے اپنے جوڑی داروں کے ساتھ شاندار کھیل کا مظاہرہ کرتے ہوئے فرینچ اوپن ۲۰۲۶ء ٹینس ٹورنامنٹ کے مردوں کے ڈبلز (مینز ڈبلز) کے دوسرے راؤنڈ میں جگہ بنا لی ہے۔

ہندوستان کے یوکی بھامبری اور این سری رام بالاجی نے اپنے اپنے جوڑی داروں کے ساتھ شاندار کھیل کا مظاہرہ کرتے ہوئے فرینچ اوپن ۲۰۲۶ء ٹینس ٹورنامنٹ کے مردوں کے ڈبلز (مینز ڈبلز) کے دوسرے راؤنڈ میں جگہ بنا لی ہے۔
منگل کو کھیلے گئے میچ میں یوکی بھامبری اور ان کے نیوزی لینڈ کے جوڑی دار مائیکل وینس نے ارجنٹائن کے فرانسسکو سیرونڈولو اور ماریانو کیسٹیلبوئم کو ۵۔۷، ۲۔۶؍ سے ہرا کر رولینڈ گیروس (فرینچ اوپن) کے اگلے راؤنڈ میں قدم رکھا۔ پہلا سیٹ ۱۱؍ویں اہم گیم تک سروس پر برابر رہا، جس کے بعد یوکی بھامبری اور مائیکل وینس نے ارجنٹائن کی جوڑی کے خلاف فیصلہ کن بریک حاصل کیا اور پھر اگلے گیم میں اپنی سروس برقرار رکھتے ہوئے پہلا سیٹ اپنے نام کر لیا۔ اس برتری اور بہترین فارم کے ساتھ، یوکی بھامبری اور مائیکل وینس نے دوسرے سیٹ کے آغاز میں ہی ارجنٹائن کی جوڑی کی سروس دوبارہ توڑ دی اور ایک گھنٹے ۲۳؍منٹ میں یہ مقابلہ جیت لیا۔

یہ بھی پڑھئے:’’چنری چنری‘‘ ریمیک: ابھیجیت بھٹاچاریہ اور انو ملک کی تنقید

واضح رہے کہ یوکی بھامبری فرینچ اوپن کے مکسڈ ڈبلز ڈرا کا بھی حصہ ہیں۔ وہ پہلے راؤنڈ میں نیدرلینڈز کے ڈیوڈ پیل اور یوکرین کی لیوڈمیلا کیچینوک کے خلاف الیگزینڈرا پانووا کے ساتھ شراکت داری کریں گے۔ دوسری طرف، پیرس ۲۰۲۴ء اولمپین این سریرام بالاجی اور ان کے برازیلی جوڑی دار مارسیلو ڈیمولینر نے جرمنی کے کونسٹنٹین فرینٹزین اور نیدرلینڈز کے تین بار کے اولمپین رابن ہاسے کو ایک گھنٹے ۴۶؍ منٹ کے مقابلے میں۳۔۶، ۶۔۴، ۳۔۶؍ سے ہرا کر دوسرے راؤنڈ میں جگہ بنائی۔

یہ بھی پڑھئے:ہانگ کانگ، سوئزرلینڈ کو پیچھے چھوڑ کر دنیا کا سب سے بڑا کراس بارڈر ویلتھ ہب بن گیا: بی سی جی رپورٹ

این سریرام بالاجی اور مارسیلو ڈیمولینر نے بہترین شروعات کی اور تیسرے گیم کے آغاز میں ہی کونسٹنٹین فرینٹزین اور رابن ہاسے کی سروس توڑ کر پہلے سیٹ پر کنٹرول حاصل کر لیا۔ انڈو برازیل کی اس جوڑی نے نویں گیم میں اپنے تیسرے سیٹ پوائنٹ کے موقع کو حاصل کر کے دوسرا بریک لیا اور آگے بڑھ گئے۔ تاہم، کونسٹنٹین فرینٹزین اور رابن ہاسے نے دوسرے سیٹ کے ساتویں گیم میں بالاجی اور ڈیمولینر کی سروس توڑ کر شاندار واپسی کی، اور پھر اپنی سروس مضبوطی سے برقرار رکھتے ہوئے میچ برابر کر دیا اور مقابلہ فیصلہ کن سیٹ میں پہنچا دیا۔
فیصلہ کن سیٹ (ڈیسائیڈنگ سیٹ) کے آغاز میں فرینٹزین اور ہاسے لڑکھڑا گئے اور دوسرے گیم میں اپنی سروس گنوا بیٹھے۔ انڈو-برازیلین جوڑی نے اس بریک کا بھرپور فائدہ اٹھاتے ہوئے میچ اپنے نام کر لیا اور دوسرے راؤنڈ کا ٹکٹ کٹا لیا۔