بلاک بسٹر فلم ’’غدر: ایک پریم کتھا‘‘ کی ریلیز ک۲۵؍ سال مکمل ہونے پر ممبئی میں ایک خصوصی تقریب کا انعقاد کیا گیا جس میں سنی دیول، امیشا پٹیل اور ہدایتکار انیل شرما نے شرکت کی۔ تقریب کے دوران انیل شرما نے ’’غدر ۳‘‘ کے امکان پر بات کرتے ہوئے کہا کہ وہ ایک ’’جوہری بم‘‘ جیسی اسکرپٹ کے انتظار میں ہیں اور جیسے ہی ایسی کہانی ملے گی، فلم پر کام شروع کر دیا جائے گا۔

ہندی سنیما کی یادگار فلم ’’غدر: ایک پریم کتھا‘‘ کی ریلیز کے ۲۵؍  سال مکمل ہونے پر پیر کو ایک خصوصی تقریب منعقد کی گئی، جہاں فلم کی مرکزی کاسٹ اور تخلیقی ٹیم نے اس تاریخی سنگ میل کا جشن منایا۔ تقریب میں فلم کے مرکزی اداکار سنی دیول اور امیشا پٹیل اور ہدایتکار انیل شرما نے شرکت کی اور میڈیا سے گفتگو کی۔ جب انیل شرما سے غدر فرنچائز کے تیسرے حصے کے بارے میں سوال کیا گیا تو انہوں نے کہا کہ وہ ایک غیرمعمولی کہانی کے انتظار میں ہیں۔ انہوں نے کہا کہ’’پہلا حصہ ایک بم تھا، دوسرا حصہ ایٹم بم تھا، تیسرا حصہ جوہری بم ہوگا۔ جس دن مجھے یہ جوہری بم جیسی اسکرپٹ مل جائے گی، میں فوراً کام شروع کر دوں گا۔‘‘

یہ بھی پڑھئے: ہدایتکار نے Obsession 2 اور نئی ہارر کائنات کے اشارے دیئے

یاد رہے کہ ’’غدر: ایک پریم کتھا‘‘ کو تقسیم ہند کے پس منظر میں تخلیق کیا گیا تھا اور یہ مبینہ طور پر بوٹا سنگھ کی حقیقی زندگی سے متاثر کہانی پر مبنی تھی۔ فلم میں سنی دیول نے تارا سنگھ نامی ایک سکھ ٹرک ڈرائیور کا کردار ادا کیا تھا، جو ایک مسلمان خاتون سکینہ سے محبت کرتا ہے، جس کا کردار امیشا پٹیل نے نبھایا۔ کہانی اس وقت نیا موڑ لیتی ہے جب تقسیم کے بعد سکینہ کو اس کا خاندان پاکستان واپس لے جاتا ہے اور تارا سنگھ اپنی محبت کو واپس لانے کے لیے سرحد پار کرنے کا خطرناک سفر اختیار کرتا ہے۔ فلم کی موسیقی، جسے اتم سنگھ نے ترتیب دیا تھا، آج بھی مداحوں میں بے حد مقبول ہے اور فلم کے گیت ہندی سنیما کے کلاسک گانوں میں شمار کیے جاتے ہیں۔

یہ بھی پڑھئے: دی فیملی مین: سری کانت تیواری کیلئے منوج باجپائی نہیں چرنجیوی پہلی پسند تھے

۲۰۰۱ء میں ریلیز ہونے والی ’’غدر‘‘ نہ صرف ایک بڑی تجارتی کامیابی ثابت ہوئی بلکہ اسے ہندی سنیما کی تاریخ کی سب سے کامیاب فلموں میں بھی شمار کیا جاتا ہے۔ بعد ازاں اگست ۲۰۲۳ء میں اس کا سیکوئل ’’غدر ۲‘‘ ریلیز کیا گیا، جس میں سنی دیول، امیشا پٹیل اور اتکرش شرما نے اپنے اصل کردار دوبارہ ادا کیے۔ فلم نے باکس آفس پر زبردست کامیابی حاصل کی اور سال کی بڑی ہٹ فلموں میں شامل رہی۔’’غدر‘‘ کی کامیابی کا ایک دلچسپ پہلو یہ بھی تھا کہ اس کی ریلیز ’’لگان‘‘ کے ساتھ ہوئی تھی، جس میں عامر خان نے مرکزی کردار ادا کیا تھا۔ دونوں فلموں کا ایک ہی وقت میں ریلیز ہونا ہندوستانی فلمی تاریخ کے منفرد واقعات میں شمار کیا جاتا ہے کیونکہ دونوں فلموں نے ایک دوسرے کے کاروبار کو متاثر کیے بغیر غیرمعمولی کامیابی حاصل کی۔

اب مداحوں کی نظریں ’’غدر ۳‘‘ پر مرکوز ہیں، اور انیل شرما کے حالیہ بیان نے اس امکان کو مزید تقویت دے دی ہے کہ تارا سنگھ کی کہانی مستقبل میں ایک اور بڑے باب کے ساتھ واپس آ سکتی ہے۔