باکس آفس پر غیرمعمولی کامیابی حاصل کرنے والی ہارر فلم Obsession کے ممکنہ سیکوئل کے بارے میں ہدایتکار کیری بارکر نے پہلی بار تفصیل سے بات کی ہے۔ انہوں نے واضح کیا کہ اگرچہ ’’Obsession 2‘‘ کے لیے مضبوط خیالات موجود ہیں، لیکن وہ جلد بازی میں سیکوئل بنانے کے حق میں نہیں۔ بارکر کا کہنا ہے کہ فلم کی پراسرار دنیا اور ’’ون وش ولو‘‘ کا تصور مستقبل میں کئی نئی ہارر کہانیوں کی بنیاد بن سکتا ہے۔

فلم Obsession کی مسلسل کامیابی کے بعد شائقین کی نظریں اس کے ممکنہ سیکوئل پر جمی ہوئی ہیں، اور اب ہدایتکار کیری بارکر نے اس حوالے سے اہم اشارے دیے ہیں۔ دی ہالی ووڈ رپورٹر سے گفتگو کرتے ہوئے بارکر نے کہا کہ ان کے پاس سیکوئل کے لیے ’’بہت شاندار خیال‘‘ موجود ہے، لیکن وہ فوری طور پر ’’Obsession 2‘‘ بنانے کے موڈ میں نہیں ہیں۔ انہوں نے کہا کہ ’’میں سیدھا Obsession 2 میں نہیں جانا چاہتا۔ میرے پاس اس کے لیے اتنا زبردست خیال ہے کہ میں ابھی اس کی تفصیل نہیں بتاؤں گا۔‘‘

بارکر کے مطابق پہلی فلم کی کامیابی کے باوجود وہ صرف مقبولیت سے فائدہ اٹھانے کے لیے جلدی میں کوئی نیا حصہ نہیں بنانا چاہتے۔ انہوں نے کہا کہ اگر سیکوئل چند سال بعد بھی آتا ہے تو شائقین کی دلچسپی برقرار رہے گی، کیونکہ پہلی فلم نے ایک مضبوط بنیاد قائم کر دی ہے۔ بارکر نے مزید کہا کہ ’’یہ سب کچھ ایک طوفان کی طرح ہوا ہے، اور میں ابھی اس صورتحال کو سمجھنے اور سنبھالنے کی کوشش کر رہا ہوں۔‘‘ ہدایتکار نے اس بات کا بھی اشارہ دیا کہ مستقبل میں کہانی صرف نکی تک محدود نہیں رہے گی۔

یہ بھی پڑھئے: ویر پہاڑیہ اور ورون شرما ایکشن تھریلر فلم ’’نام۔ ٹو لِو اِز وار‘‘ میں جلوہ گر

ان کے مطابق ’’ون وش ولو‘‘ کا تصور ایک وسیع ہارر دنیا تخلیق کر سکتا ہے جہاں ہر نئی کہانی ایک مختلف کردار اور اس کی خواہشات کے خوفناک نتائج پر مبنی ہوگی۔ بارکر نے کہا کہ ’’یہ روایتی سیکوئل نہیں ہوگا۔ یہ کسی نئے لڑکے یا لڑکی کی کہانی ہو سکتی ہے جسے ون وش ولو ملے اور پھر اس کی زندگی تباہ ہو جائے۔ ایسی بے شمار کہانیاں سنائی جا سکتی ہیں۔‘‘ ان بیانات کے بعد مداحوں میں یہ قیاس آرائیاں زور پکڑ گئی ہیں کہ Obsession مستقبل میں ایک اینتھالوجی طرز کی ہارر فرنچائز میں تبدیل ہو سکتی ہے۔

بارکر نے یہ بھی تصدیق کی کہ ان کا اگلا بڑا منصوبہ کلاسک ہارر فرنچائز The Texas Chainsaw Massacre کی نئی قسط ہے۔ انہوں نے کہا کہ وہ صرف اسی صورت میں اس منصوبے کا حصہ بنے کیونکہ انہیں یقین ہے کہ وہ اصل فلم کے احترام کے ساتھ کوئی نئی اور منفرد چیز پیش کر سکتے ہیں۔ بارکر کے مطابق ’’میں لوگوں کی نئی نسل کو اسی طرح خوفزدہ کرنا چاہتا ہوں جیسے ۱۹۷۴ء کی اصل فلم نے کیا تھا۔‘‘

یہ بھی پڑھئے: مجھے کہا جاتا تھا اسے کچھ کھلاؤ: مادھوری دکشت نے’ باڈی شیمنگ‘ پر اپنا قصہ سنایا

۱۵؍ مئی کو ریلیز ہونے والی Obsession نے ہارر سنیما میں ایک غیرمعمولی مثال قائم کی ہے۔ فلم میں Inde Navarrette نے نکی، Michael Johnston نے بیئر، Cooper Tomlinson نے ایان اور Megan Lawless نے سارہ کا کردار ادا کیا۔ صرف ۷۵؍ لاکھ ڈالر کے تخمینہ شدہ بجٹ سے بننے والی اس فلم نے دنیا بھر میں ۴۹ء۲۸۶؍ ملین ڈالر سے زیادہ کا کاروبار کیا، جسے حالیہ برسوں کی سب سے زیادہ منافع بخش ہارر فلموں میں شمار کیا جا رہا ہے۔