سپر اسٹار رجنی کانت کی انتہائی متوقع فلم ’’جیلر ۲‘‘ کا ٹریلر جاری ہوتے ہی سوشل میڈیا پر دھوم مچ گئی ہے۔ فلم کے مرکزی کردار ٹائیگر متھوویل پانڈیان کی واپسی، زبردست ایکشن، بڑے ستاروں کی موجودگی اور غیر متوقع جھلکیوں کے درمیان بالی ووڈ اداکار رتیک روشن کی ممکنہ مختصر جھلک نے مداحوں کی توجہ سب سے زیادہ حاصل کی ہے۔

سپر اسٹار رجنی کانت کی انتہائی متوقع فلم ’’جیلر ۲‘‘  کا ٹریلر جاری ہوتے ہی سوشل میڈیا پر دھوم مچ گئی ہے۔ فلم کے مرکزی کردار ٹائیگر متھوویل پانڈیان کی واپسی، زبردست ایکشن، بڑے ستاروں کی موجودگی اور غیر متوقع جھلکیوں کے درمیان بالی ووڈ اداکار  رتیک روشن کی ممکنہ مختصر جھلک نے مداحوں کی توجہ سب سے زیادہ حاصل کی ہے۔ ٹریلر میں ایک انتہائی مختصر اور پسِ منظر سے دکھائی دینے والا سایہ نما منظر نظر آتا ہے، جسے کئی مداح رتیک  روشن سے جوڑ رہے ہیں۔
دلچسپ بات یہ ہے کہ ٹریلر میں اس شخص کا چہرہ واضح طور پر دکھائی نہیں دیتا۔ یہی وجہ ہے کہ مداح ویڈیو کے اس ایک لمحے کو بار بار دیکھ کر یہ جاننے کی کوشش کر رہے ہیں کہ آیا واقعی یہ ہریتھک روشن ہی ہیں۔ سماجی رابطوں کی ویب سائٹ ایکس پر کئی صارفین نے اس مختصر منظر کی تصویر اور ویڈیو شیئر کرتے ہوئے سوال کیا کہ کیا’ ’جیلر ۲‘‘ کے ہدایت کار نیلسن دلیپ کمار نے رتیک  کی آمد کی محض ایک جھلک دکھائی ہے۔
رتیک روشن کے فلم میں مختصر کردار کی خبریں پہلے ہی سامنے آچکی ہیں۔ جون ۲۰۲۶ء میں رپورٹ کیا گیا تھا کہ رتیک  نے ’’جیلر۲‘‘ میں خصوصی کردار کے لیے رضامندی ظاہر کی ہے۔ یہ کردار خاص طور پر ایکشن سے بھرپور بتایا گیا تھا اور اس کی فلم بندی چنئی میں ہونے کی اطلاع دی گئی تھی۔ اس شرکت کی ایک خاص اہمیت یہ بھی ہے کہ رتیک اور رجنی کانت تقریباً چار دہائیوں بعد ایک مرتبہ پھر پردے پر ساتھ نظر آنے والے ہیں۔ دونوں اس سے قبل ۱۹۸۶ء کی فلم ’’بھگوان دادا‘‘ میں ایک ساتھ نظر آئے تھے، جس میں رتیک  نے بطور کم عمر اداکار کام کیا تھا۔

یہ بھی پڑھئے:فیروز خان کو بالی ووڈ کے سب سے زیادہ اسٹا ئلش ہیرو کے طور پر جانا جاتا ہے

’’جیلر ۲‘‘ کے ٹریلر میں اگرچہ رتیک کا چہرہ واضح نہیں کیا گیا، لیکن مداحوں کی جانب سے ان کی ممکنہ موجودگی کو فلم کے بڑے پرکشش عناصر میں شمار کیا جارہا ہے۔ بعض صارفین نے اندازہ لگایا کہ فلم میں رتیک کا کردار ایک خطرناک اور طاقتور شخصیت کا ہوسکتا ہے، جبکہ کچھ مداحوں نے ان کے ایکشن سے بھرپور مختصر کردار کو فلم کے اہم لمحات سے جوڑنے کی قیاس آرائیاں کی ہیں۔ تاہم ان کے کردار کی مکمل نوعیت کے بارے میں فلم سازوں کی جانب سے فی الحال تفصیلات سامنے نہیں لائی گئی ہیں۔
ٹریلر میں رتیک کے ممکنہ منظر کے علاوہ بھی کئی بڑے ستاروں کی واپسی نے فلم کی توقعات بڑھا دی ہیں۔ موہن لال اور شیوا راج کمار کی واپسی نمایاں ہے، جبکہ ودیا بالن، ایس جے سوریہ، متھن چکرورتی اور سورج ونجارامودو سمیت کئی فنکار فلم کا حصہ ہیں۔ ’جیلر 2‘ میں رجنی کانت ایک بار پھر ٹائیگر متھوویل پانڈیان کے کردار میں نظر آئیں گے۔ فلم کی ہدایت کاری نیلسن دلیپ کمار نے کی ہے اور اسے سن پکچرز نے پیش کیا ہے۔
مداحوں کا جوش صرف رتیک کی ممکنہ جھلک تک محدود نہیں۔ ٹریلر میں رجنی کانت کے مخصوص انداز، طاقتور مکالموں، زبردست ایکشن مناظر اور موسیقار انیرودھ روی چندر کے پسِ پردہ موسیقی نے بھی خاص توجہ حاصل کی ہے۔ سماجی رابطوں پر کئی مداحوں نے ٹریلر کو سراہتے ہوئے رجنی کانت کے انداز اور فلم میں بڑے ستاروں کی موجودگی کو نمایاں کیا، جبکہ کچھ ناظرین نے یہ رائے بھی دی کہ ٹریلر میں پہلی ’جیلر‘ جیسا حیرت انگیز اثر نظر نہیں آیا۔

یہ بھی پڑھئے:اسرائیل میں امریکی فوجی کمک بڑھانے کی تیاری

’’جیلر ۲‘‘ کی کہانی پہلی فلم کے واقعات کے بعد آگے بڑھتی دکھائی دیتی ہے، جہاں متھوویل پانڈیان ایک بڑے مجرمانہ نیٹ ورک سے دوبارہ الجھتے نظر آتے ہیں۔ تازہ ٹریلر میں ان کے ماضی، نئے دشمنوں اور پرانے ساتھیوں کے درمیان تعلقات کی بھی جھلک ملتی ہے، جس نے فلم کی کہانی کے بارے میں مزید تجسس پیدا کردیا ہے۔ فلم سازوں نے رتیک روشن کی ممکنہ جھلک کو ابھی باقاعدہ طور پر واضح نہیں کیا، لیکن ٹریلر کے اس مختصر منظر نے ان کی شرکت کو ایک بار پھر مداحوں کی گفتگو کا مرکز بنا دیا ہے۔ اب سب کی نظریں اس بات پر ہیں کہ کیا رتیک فلم میں صرف مختصر مہمان کردار میں نظر آئیں گے یا ان کی موجودگی کہانی میں اس سے کہیں زیادہ اہم ہوگی۔ ’’جیلر ۲‘‘۱۵؍ اکتوبر ۲۰۲۶ء کو سنیما گھروں میں ریلیز ہونے والی ہے۔