بالی ووڈ کے ’’مسٹر پرفیکشنسٹ‘‘ عامر خان نے انکشاف کیا ہے کہ انہوں نے اپنے کریئر میں صرف دو فلمیں ایسی کیں جن کی کہانی سنے بغیر ہاں کی۔ ذاکر خان کے ساتھ گفتگو میں انہوں نے بتایا کہ ’’اول نمبر‘‘ اور ’’تم میرے ہو‘‘ ان کے وہ نادر فیصلے تھے، جو والد طاہر حسین کے اثر میں کیے گئے۔ عامر نے واضح کیا کہ وہ عموماً فلموں کا انتخاب دل اور کہانی کے اثر سے کرتے ہیں، نہ کہ محض اسٹریٹجی سے۔

بالی ووڈ کے معروف اداکار عامر خان ، جو اپنی باریک بینی اور منتخب اسکرپٹس کے لیے ’’مسٹر پرفیکشنسٹ‘‘ کے طور پر جانے جاتے ہیں، نے اپنے کریئر کے ایک کم معروف پہلو پر روشنی ڈالی ہے۔ ایک حالیہ گفتگو میں، انہوں نے انکشاف کیا کہ انہوں نے صرف دو فلمیں ایسی کیں جن کے اسکرپٹ سنے بغیر ہی انہیں قبول کر لیا گیا تھا۔ کامیڈین ذاکر خان کے ساتھ بات چیت کرتے ہوئے عامر نے بتایا کہ ان کے فلموں کے انتخاب کا انداز ہمیشہ جذباتی رہا ہے۔ انہوں نے کہا کہ ’’جب میں کسی فلم کا انتخاب کرتا ہوں تو میرا دل اس میں شامل ہوتا ہے، چاہے میں بطور اداکار یا پروڈیوسر اس کا حصہ ہوں۔ جب میں کوئی کہانی سنتا ہوں تو میں ایک ناظرین بن جاتا ہوں، اگر یہ میرے دل کو چھوتی ہے اور مجھے پرجوش کرتی ہے، تب میں فیصلہ کرتا ہوں کہ اس میں کام کرنا ہے یا نہیں۔‘‘

یہ بھی پڑھئے: کمبھ میلہ گرل مونالیزا کی شکایت، ہدایت کار پر ہراسانی کے الزامات

تاہم، انہوں نے تسلیم کیا کہ ان کے کریئر میں دو ایسے مواقع آئے جب انہوں نے اس اصول سے ہٹ کر فیصلہ کیا۔ وہ فلمیں تھیں ’’اول نمبر‘‘ اور ’’تم میرے ہو۔‘‘  عامر نے بتایا کہ دونوں فیصلوں کے پیچھے ان کے والد طاہر حسین کا کردار تھا۔ انہوں نے یاد کرتے ہوئے کہا کہ ’’میرے کریئر میں صرف دو فلمیں ہیں جو میں نے اسکرپٹ جانے بغیر کی ہیں، اول نمبر اور تم میرے ہو۔‘‘ فلم ’’اول نمبر‘‘ کے حوالے سے انہوں نے ایک دلچسپ واقعہ سنایا کہ ’’میرے والد نے مجھے فون کیا اور کہا کہ دیو آنند آپ سے ملنا چاہتے ہیں اور میں نے آپ کی طرف سے پہلے ہی ہاں کہہ دی ہے۔ میں نے کہا، میں پہلے اسکرپٹ سنوں گا، لیکن انہوں نے کہا، آپ ایسا کچھ نہیں کریں گے، آپ جائیں گے اور ہاں کہیں گے۔ میں اس وقت انکار کرنے سے ڈر گیا تھا۔‘‘

یہ بھی پڑھئے: سیامی کھیر ۱۲؍سال بعد سیف علی خان کے ساتھ کام کریں گی

اسی طرح دوسری فلم ’’تم میرے ہو‘‘ بھی ان کے والد کی پروڈکشن تھی۔ عامر نے بتایا کہ جب انہوں نے کہانی پوچھنے کی کوشش کی تو انہیں ڈانٹ پڑی۔انہوں نے بتایا کہ ’’میں نے کہانی کے بارے میں پوچھا تو انہوں نے کہا، ہم ۳۰؍ سال سے فلمیں بنا رہے ہیں اور تم مجھ سے کہانی پوچھ رہے ہو؟ اس کے بعد میں نے کہا، ٹھیک ہے، مجھے کہانی سننے کی ضرورت نہیں۔‘‘ عامر نے ہنستے ہوئے مزید کہا کہ ’’جو فلمیں آپ نے دیکھی ہیں اور پسند نہیں کیں، ان کا الزام مجھ پر ڈال سکتے ہیں، لیکن یہ دو فلمیں ایسی ہیں جو میں نے اسکرپٹ سنے بغیر کیں۔‘‘

یہ بھی پڑھئے: عامر کا نمبرمحفوظ نہیں تھا اسلئے’’لال سنگھ چڈھا‘‘ کیلئے نغمے نہیں لکھ سکا: ارشاد

انہوں نے واضح کیا کہ ان دو مثالوں کے علاوہ وہ ہمیشہ اپنی جبلت پر بھروسہ کرتے ہیں۔ انہوں نے ’’تارے زمین پر‘‘ کی مثال دیتے ہوئے کہا کہ ’’جب میں نے ’’تارے زمین پر‘‘ بنانے کا فیصلہ کیا تو لوگوں نے کہا کہ یہ ڈسلیکسیا پر ہے، کون دیکھے گا؟ لیکن مجھے کہانی پر یقین تھا، اس لیے میں نے اسے بنایا۔‘‘ دلچسپ بات یہ ہے کہ جہاں عامر خود ’’اول نمبر‘‘ سے زیادہ مطمئن نہیں تھے، وہیں رنبیر کپور اس فلم کے مداح نکلے۔ عامر نے بتایا کہ پہلے انہیں لگا کہ رنبیر مذاق کر رہے ہیں، لیکن بعد میں انہوں نے فلم کے ڈائیلاگز تک یاد کر رکھے تھے۔
یاد رہے کہ ۱۹۹۰ء میں ریلیز ہونے والی ’’اول نمبر‘‘ ایک اسپورٹس ڈرامہ تھی، جبکہ ’’تم میرے ہو‘‘ ایک فینٹسی رومانس تھی جس میں جوہی چاؤلہ بھی تھیں۔ دونوں فلمیں باکس آفس پر خاص کامیابی حاصل نہ کر سکیں۔