اکشے کمار، آر مادھون اور اننیا پانڈے کی ’’کیسری ۲‘‘ سنیما گھروں میں زبردست کامیابی کے بعد جیو ہاٹ اسٹار پر ۱۳؍ جون کو ریلیز ہونے کیلئے تیار ہے۔

اکشے کمار، آر مادھون، اور اننیا پانڈے کی فلم ’’کیسری ۲‘‘ باکس آفس پر زبردست کامیابی حاصل کرنے کے بعد اب او ٹی ٹی پر ریلیز ہونے کیلئے تیار ہے۔ سچے واقعے پر مبنی یہ فلم اسی ماہ او ٹی ٹی پر ریلیز ہوگی۔ فری پریس جرنل کی ایک رپورٹ کے مطابق ’’کیسری ۲‘‘ ۱۳؍ جون ۲۰۲۵ء کو جیو ہاٹ اسٹار پر ریلیز ہوگی۔ تاہم، جیو ہاٹ اسٹار ٹیم نے اب تک اس کا باقاعدہ اعلان نہیں کیا ہے۔ کرن جوہر کی حمایت یافتہ اس فلم نے باکس آفس پر اچھی کارکردگی کا مظاہرہ کرتے ہوئے ۴۵؍ کروڑ روپے سے زیادہ کمائی کی۔ 

یہ بھی پڑھئے: گوری خان نے ’’منت‘‘ کے اسٹاف کیلئے ایک اور فلیٹ کرائے پر لیا

’’ کیسری ۲‘‘ ایڈوکیٹ سی سنکرن نائر کی ۱۹۱۹ء کے جلیانوالہ باغ کے قتل عام کے بعد برطانوی سلطنت کے خلاف قانونی جنگ کی کہانی کی پیروی کرتا ہے۔ یہ فلم راگھو اور پشپا پالت کی کتاب ’’دی کیس دیٹ شوک دی ایمپائر‘‘ پر مبنی ہے۔ اکشے کمار نے فلم میں سنکرن نائر اور آر مادھون نے ایڈوکیٹ نیویل میک کینلے کا کردار ادا کیا ہے، جو برطانوی ولی عہد کی نمائندگی کرتے ہیں۔ دوسری طرف اننیا پانڈے، دلریٹ گل کا کردار ادا کر رہی ہیں، جو نائر کی قانونی جنگ میں ایک اہم حامی ہے۔ تھیٹر میں ریلیز ہونے کے بعد سے، اس فلم نے سوشل میڈیا پر خاصی مقبولیت حاصل کی ہے۔