چین کے ۲۶؍ سالہ اداکار وو یوفی نے امریکاز گوٹ ٹیلنٹ (AGT) کے اسٹیج پر آٹھ ہیومنائیڈ روبوٹس کے ساتھ منفرد رقص پیش کرکے ججوں اور ناظرین کو حیران کر دیا۔ ’’فلائنگ بگ‘‘ کے نام سے مشہور یوفی کی پرفارمنس میں جدید روبوٹکس اور رقص کا منفرد امتزاج دیکھنے کو ملا۔ ججوں نے اس ایکٹ کو ’’عجیب لیکن شاندار‘‘ قرار دیتے ہوئے متفقہ طور پر اگلے مرحلے کیلئے منتخب کر لیا، جبکہ سوشل میڈیا پر بھی اس پرفارمنس نے زبردست توجہ حاصل کی۔

چین کے صوبہ سیچوان سے تعلق رکھنے والے ۲۶؍ سالہ اداکار وو یوفی نے امریکاز گوٹ ٹیلنٹ (AGT) میں اپنی غیر معمولی پرفارمنس کے ذریعے ججوں اور ناظرین کو حیران کر دیا۔ ’’فلائنگ بگ‘‘ کے نام سے پرفارم کرنے والے یوفی نے آٹھ ہیومنائیڈ روبوٹس کے ساتھ ایسا رقص پیش کیا جس میں ٹیکنالوجی، روبوٹکس اور فنِ رقص کا منفرد امتزاج دیکھنے کو ملا۔ شنگھائی ڈیلی کی جانب سے شیئر کی گئی ویڈیو میں یوفی کو روبوٹس کے ساتھ مکمل ہم آہنگی میں رقص کرتے دیکھا گیا۔ پرفارمنس کے آغاز میں جب ججوں نے ان سے پوچھا کہ کیا وہ مقابلہ جیتنے کا ارادہ رکھتے ہیں تو انہوں نے پراعتماد انداز میں جواب دیا، ’’یقیناً، میرا خیال ہے کہ یہاں آنے والا ہر شخص جیتنا چاہتا ہے۔‘‘

A 26-year-old from Sichuan just wowed America’s Got Talent with eight Unitree robots. Wu Yufei danced alongside the robots, stunned the judges and audience, and earned a unanimous pass to the next round. pic.twitter.com/Wb54R4qbTq

— Shanghai Daily (@shanghaidaily) June 3, 2026

پرفارمنس کے دوران روبوٹس کی درست اور مربوط حرکات نے سب کی توجہ اپنی جانب مبذول کر لی۔ ایک موقع پر ایک جج نے حیرت کا اظہار کرتے ہوئے کہا، ’’دیکھو، وہ انہیں اپنے ہاتھ سے حرکت دے رہا ہے۔‘‘ اس دوران جج یہ سمجھنے کی کوشش کرتے رہے کہ روبوٹس کس طرح کنٹرول ہو رہے ہیں۔ ججوں نے اس ایکٹ کو سیزن کی منفرد ترین پرفارمنسز میں سے ایک قرار دیا۔ ایک جج نے کہا، ’’میں نے اس سے پہلے ایسا کچھ نہیں دیکھا۔ عام طور پر روبوٹس کافی عجیب لگتے ہیں، لیکن ان میں تو باقاعدہ ردھم موجود ہے۔‘‘ ایک اور جج نے پرفارمنس کو سراہتے ہوئے کہا، ’’یہ بالکل ایسے تھا جیسے انسان رقص کر رہے ہوں۔ یہ واقعی شاندار تھا۔‘‘

پرفارمنس کے بعد یوفی نے مزاحیہ انداز میں انکشاف کیا کہ روبوٹس میں سے ایک کا نام ’’جیکی‘‘ رکھا گیا ہے کیونکہ ’’یہ واقعی کنگ فو سے محبت کرتا ہے۔‘‘ اس تبصرے پر ججوں اور ناظرین نے قہقہے لگائے۔ اگرچہ بعض ججوں نے روبوٹس کو کچھ حد تک ’’عجیب‘‘ قرار دیا، لیکن سبھی ان کی ہم آہنگی اور تکنیکی مہارت سے متاثر نظر آئے۔ ایک جج نے مذاق کرتے ہوئے کہا، ’’اگر کوئی ہم آہنگی سے باہر تھا تو وہ خود یوفی تھے، کیونکہ روبوٹس تو بالکل مکمل تھے۔‘‘ آخرکار ججوں نے متفقہ طور پر چار ’’ہاں‘‘ دے کر یوفی اور ان کے روبوٹک ڈانس گروپ کو اگلے مرحلے کیلئے منتخب کر لیا۔

یہ بھی پڑھئے: ’’ڈان ۳‘‘ تنازع: FWICE کا کنگنا اور رام گوپال ورما پر جوابی وار

پرفارمنس کے نشر ہونے کے بعد سوشل میڈیا پر بھی اس کی بھرپور تعریف کی گئی۔ ایک یوٹیوب صارف نے لکھا، ’’یہ کیسے ممکن تھا؟ یہ تو گولڈن بزر کا مستحق تھا۔‘‘ جبکہ ایک اور نے تبصرہ کیا، ’’اس میں شامل انجینئرنگ کی ذہانت ناقابل یقین ہے۔‘‘ ایکس پر بھی اس ایکٹ نے بحث چھیڑ دی۔ ایک صارف نے لکھا، ’’امریکہ ایجاد کرتا ہے، چین اسے بہتر بنا دیتا ہے۔‘‘ جبکہ ایک اور نے مذاق کرتے ہوئے کہا، ’’تو چینی ارب پتی اپنے فارغ وقت میں یہی کرتے ہیں؟ روبوٹس کے ساتھ ہم آہنگ رقص!‘‘ یہ پرفارمنس اب امریکاز گوٹ ٹیلنٹ کے حالیہ سیزن کے سب سے زیادہ زیرِ بحث آڈیشنز میں شمار کی جا رہی ہے اور دنیا بھر میں لاکھوں لوگ اسے دیکھ چکے ہیں۔