کے بی سی سیزن ۱۷؍ کے فائنل ایپی سوڈ میں امیتابھ بچن کی ۳۲؍ منٹ طویل مسلسل گائیکی نے شو کو ایک بڑے جشن میں بدل دیا۔ لازوال گانوں، جذباتی آڈیو اور خاص مہمانوں کے ساتھ یہ فائنل ایپی سوڈ ناظرین کے لیے ایک یادگار تجربہ ثابت ہوا۔

مشہور کوئز رئیلٹی شو کون بنے گا کروڑ پتی اپنے سیزن کے اختتام کو پہنچا، اور اس بار فائنل ایپی سوڈ کو ایک غیر معمولی اور جذباتی لمحے نے یادگار بنا دیا ہے۔ شو کے میزبان اور میگا اسٹار امیتابھ بچن نے فائنل ایپی سوڈ میں ۳۲؍ منٹ سے زائد مسلسل گانا گایا، جو کے بی سی کی تاریخ کے نایاب لمحات میں شمار کیا جا رہا ہے۔ اس خصوصی حصے میں امیتابھ بچن نے اپنے چند لازوال اور محبوب گیت پیش کیے، جن میں فلم باغبان سے ’’ہوری کھیل رگھوویرا‘‘، سلسلہ سے ’’رنگ برسے بھیگے چنروالی‘‘، تیسری قسم سے ’’چلت مسافر‘‘ اور لاوارث سے ’’میرے انگنے میں‘‘ شامل ہیں۔ اس کے علاوہ انہوں نے چند روایتی گیت بھی گائے، جس سے پورا اسٹوڈیو موسیقی اور جذبات سے بھر گیا۔

یہ بھی پڑھئے: ’’اکیس‘‘ میں بوبی دیول، دھرمیندر کی نوجوانی کا کردار ادا کرتے نظر آئیں گے

یہ نایاب اور متحرک لمحہ ایک خصوصی طور پر تیار کردہ آڈیو ویژول پریزنٹیشن کے بعد سامنے آیا، جس میں پورے سیزن کے سفر، متاثر کن کہانیوں اور جذباتی بلندیوں کو سمیٹا گیا۔ اس ترتیب نے فائنل ایپی سوڈ کو ایک بڑے جشن کی شکل دے دی، جہاں مقابلہ کرنے والے، سامعین اور خود مسٹر بچن بھی جذباتی طور پر بے حد متاثر نظر آئے۔ علمی تفریح کے ساتھ ساتھ، کون بنے گا کروڑ پتی اب فلمی دنیا کے لیے اپنی آنے والی فلموں اور سیریز کی تشہیر کا ایک اہم پلیٹ فارم بھی بن چکا ہے۔ رواں سیزن میں منوج باجپائی، پنکج ترپاٹھی، جے دیپ اہلاوت، شارب ہاشمی، اننیا پانڈے اور کارتک آرین جیسے ستاروں نے اپنی فلموں اور سیریز کی تشہیر کے لیے ہاٹ سیٹ سنبھالی۔

یہ بھی پڑھئے: ظہران ممدانی کا نیویارک کے میئر کے طور پرآدھی رات کو متروک سب وے اسٹیشن میں حلف

اس کے علاوہ پچھلے دنوں ایک اور خاص لمحہ دیکھنے کو ملا، جب امیتابھ بچن کے نواسہ اگستیہ نندا اپنی آنے والی فلم اکیس کی تشہیر کے لیے شو میں شریک ہوئے۔ اس موقع پر وہ فلم کی ٹیم کے ساتھ اپنی والدہ شویتا بچن اور بہن نویا نویلی نندا کے ہمراہ نظر آئے۔  نانا اور نواسے کی جوڑی نے ناظرین کو ایک گرمجوش، جذباتی اور یادگار لمحہ دیا، ایک ایسا لمحہ جس نے کے بی سی کے فائنل کو خاص بنا دیا۔