فلم ’’آوارہ پن ۲‘‘ کے ٹائٹل گیت ’’یہ آوارہ پن‘‘ کی ریلیز کے بعد یہ قیاس آرائیاں زور پکڑ گئی تھیں کہ معروف گلوکار اریجیت سنگھ ریٹائرمنٹ ختم کرکے دوبارہ پلے بیک سنگنگ کی دنیا میں واپس آ گئے ہیں۔ تاہم اب ان کے منیجر نے تمام افواہوں کی تردید کرتے ہوئے واضح کیا ہے کہ یہ کسی واپسی کا اعلان نہیں بلکہ ریٹائرمنٹ سے پہلے کیے گئے وعدوں کی تکمیل ہے۔ اریجیت سنگھ بدستور نئے پلے بیک منصوبے قبول نہیں کر رہے۔

بالی ووڈ گلوکار اریجیت سنگھ کے مداحوں میں اس وقت خوشی کی لہر دوڑ گئی جب عمران ہاشمی کی آنے والی فلم ’’آوارہ پن ۲‘‘ کا ٹائٹل گیت ’’یہ آوارہ پن‘‘ ریلیز ہوا۔ چونکہ رواں سال جنوری میں اریجیت سنگھ نے پلے بیک سنگنگ سے ریٹائرمنٹ کا اعلان کیا تھا، اس لیے سوشل میڈیا پر فوری طور پر یہ قیاس آرائیاں شروع ہوگئیں کہ انہوں نے اپنا فیصلہ واپس لے لیا ہے اور اب دوبارہ فلمی گیت گائیں گے۔ تاہم یہ خوش خبری زیادہ دیر برقرار نہ رہ سکی۔ اریجیت سنگھ کے منیجر نے ان تمام خبروں کی تردید کرتے ہوئے واضح کیا کہ ’’یہ آوارہ پن‘‘ ان کی واپسی نہیں ہے۔ انہوں نے کہا کہ اریجیت صرف ان منصوبوں کو مکمل کر رہے ہیں جن کا وعدہ وہ اپنی ریٹائرمنٹ کے اعلان سے پہلے کر چکے تھے۔ منیجر کے مطابق، ’’یہ پرانے معاہدے ہیں، اریجیت پلے بیک سنگنگ میں واپسی نہیں کر رہے۔‘‘

یہ بھی پڑھئے: پلے بیک سے ریٹائرمنٹ کے بعد اریجیت سنگھ کا پہلا سولو گانا ’’رائنا‘‘ ریلیز

رپورٹ کے مطابق ’’یہ آوارہ پن‘‘ کو موسیقار امال ملک نے ترتیب دیا ہے، جبکہ اس کے بول رشمی وراگ نے لکھے ہیں۔ یہ گانا وشیش فلمز اور سونی میوزک انڈیا کے بینر تلے جاری کیا گیا ہے۔ جذباتی دھن، درد بھری شاعری اور اریجیت کی آواز نے مداحوں کو ایک بار پھر ۲۰۰۷ء کی کلاسک فلم ’’آوارہ پن‘‘ کی یاد دلا دی، جس کے گیت آج بھی بے حد مقبول ہیں۔ فلم کے میوزک ویڈیو میں عمران ہاشمی ایک مرتبہ پھر شیوم پنڈت کے کردار میں نظر آ رہے ہیں۔ ٹریلر اور گانے میں محبت، جدائی، قربانی اور ایکشن کا امتزاج دکھایا گیا ہے، جس کے بعد فلم کے لیے شائقین کا جوش مزید بڑھ گیا ہے۔ ’’آوارہ پن ۲‘‘ میں دیشا پٹانی، شبانہ اعظمی اور انیرُدھ راول بھی اہم کردار ادا کر رہے ہیں، جبکہ فلم ۱۴؍ اگست کو سنیما گھروں میں ریلیز ہوگی۔

یہ بھی پڑھئے: اریجیت سنگھ اب فلمی گانے نہیں گائیں گے، ہمیشہ کے لیے کہا الوداع

یاد رہے کہ اریجیت سنگھ نے جنوری ۲۰۲۶ء میں اعلان کیا تھا کہ وہ آئندہ کسی نئے پلے بیک سنگنگ منصوبے کا حصہ نہیں بنیں گے، البتہ پہلے سے کیے گئے تمام وعدے ضرور پورے کریں گے۔ اسی لیے موسیقی کے شائقین آئندہ چند ماہ میں ان کی آواز میں مزید چند گیت سن سکیں گے، مگر یہ سب ریٹائرمنٹ سے پہلے طے شدہ منصوبوں کا حصہ ہوں گے، نہ کہ ان کی باضابطہ واپسی۔