ہالی ووڈ سپر اسٹار بریڈ پٹ اور اداکارہ انجلینا جولی کی ۱۸؍ سالہ بیٹی ویوین مارشلین جولی پٹ نے قانونی طور پر اپنے نام سے ’پٹ‘ ہٹانے کے لیے عدالت میں درخواست دائر کر دی ہے۔ یہ قدم ان کے بڑے بہن بھائی میڈاکس، زہرا اور شائیلو کی جانب سے بھی اسی نوعیت کے اقدامات کے بعد سامنے آیا ہے۔ درخواست میں اس فیصلے کو ’’ذاتی‘‘ قرار دیا گیا ہے۔

ہالی ووڈ کے سابق اسٹار جوڑے بریڈ پٹ اور انجلینا جولی کی سب سے چھوٹی بیٹیوں میں سے ایک ویوین مارشلین جولی-پٹ نے اپنے والد کا خاندانی نام قانونی طور پر ترک کرنے کا فیصلہ کر لیا ہے۔ ۱۸؍ سالہ ویوین نے لاس اینجلس کاؤنٹی سپیریئر کورٹ میں درخواست دائر کی ہے کہ ان کا قانونی نام ’’ویوین مارشلین جولی‘‘ کر دیا جائے اور اس میں سے ’’پٹ‘‘ حذف کر دیا جائے۔ درخواست میں اس فیصلے کی وجہ صرف ’’ذاتی‘‘ (Personal) بیان کی گئی ہے۔ ویوین اس سے پہلے بھی عملی طور پر اپنے والد کا نام استعمال کرنا چھوڑ چکی تھیں۔ ۲۰۲۴ء میں براڈوے میوزیکل ’’The Outsiders‘‘ کی پلے بل میں، جس کی شریک پروڈیوسر ان کی والدہ انجلینا جولی تھیں، ان کا نام ’’Vivienne Jolie‘‘ درج کیا گیا تھا۔ تاہم موجودہ درخواست ان کے نام کی پہلی باقاعدہ قانونی تبدیلی سمجھی جا رہی ہے۔ 

یہ بھی پڑھئے: ’’گوڈزیلا ورسیز کانگ‘‘ کی اداکارہ کیلی ہوٹل ۱۸؍ برس کی عمر میں چل بسیں

یہ پیش رفت اس لیے بھی اہم مانی جا رہی ہے کیونکہ ویوین اس خاندان کی چوتھی اولاد ہیں جنہوں نے اپنے نام سے ’’پٹ‘‘ ہٹانے کی کوشش کی ہے۔ اس سے قبل شائیلو کا نام قانونی طور پر تبدیل ہو چکا ہے، جبکہ میڈاکس اور زہرا بھی اسی مقصد کے لیے عدالتی کارروائی سے گزر رہے ہیں۔ ان اقدامات کو کئی مبصرین انجلینا جولی اور بریڈ پٹ کے درمیان برسوں سے جاری خاندانی تنازع اور تعلقات میں کشیدگی سے جوڑ کر دیکھ رہے ہیں۔ بریڈ پٹ اور انجلینا جولی نے ۲۰۱۶ء میں علیحدگی اختیار کی تھی، جبکہ ان کی طلاق کا قانونی عمل ۲۰۲۴ء میں مکمل ہوا۔ اس دوران بچوں کی تحویل، فرانسیسی وائنری چیٹو میراوال اور دیگر معاملات پر دونوں کے درمیان طویل قانونی تنازعات چلتے رہے۔

یہ بھی پڑھئے: ’’دی اوڈیسی‘‘کے بعد کرسٹوفر نولن کا اگلا خواب؟ ہارر فلم بنانے کا اشارہ

میڈیا رپورٹس کے مطابق گزشتہ چند برسوں میں بریڈ پٹ اور ان کے کئی بچوں کے تعلقات بھی کشیدہ رہے ہیں، اگرچہ اس معاملے پر دونوں فریقوں نے حالیہ درخواست کے حوالے سے کوئی باضابطہ تبصرہ نہیں کیا۔ عدالتی دستاویزات کے مطابق ویوین کی درخواست پر سماعت ۲؍ نومبر ۲۰۲۶ء کو متوقع ہے۔ اگر عدالت درخواست منظور کر لیتی ہے تو ان کا قانونی نام مستقل طور پر ویوین مارشلین جولی ہو جائے گا۔