چیف الیکشن کمشنر گیانیش کمار کے خلاف سیاسی جماعتوں، طلبہ و نوجوان تنظیموں اور سول سوسائٹی نے جمعہ کو ملک گیر احتجاج کیا۔ دہلی سمیت کئی شہروں میں مظاہرین کو حراست میں لیا گیا، جبکہ پٹنہ، امپھال اور دیگر مقامات پر پولیس نے آنسو گیس اور واٹر کینن کا استعمال کیا۔

چیف الیکشن کمشنر گیانیش کمار کے خلاف سیاسی جماعتوں، طلبہ و نوجوان تنظیموں اور سول سوسائٹی کی مختلف تنظیموں نے جمعہ کے روز ملک گیر احتجاج کیا۔ دہلی پولیس نے ارکان پارلیمنٹ اور سماجی کارکنوں کو جنتر منتر پہنچنے سے روکنے کے لیے حراست میں لے لیا۔ دوسری جانب مختلف مقامات پر کانگریس کارکنوں کی پولیس سے جھڑپیں ہوئیں، جہاں مظاہرین کو منتشر کرنے کے لیے آنسو گیس اور واٹر کینن کا استعمال کیا گیا۔ پولیس کی اجازت جہاں ملی، وہاں سڑکوں پر احتجاج کیا گیا۔ ریاستوں میں چیف الیکٹورل افسران کے دفاتر اور دہلی میں الیکشن کمیشن کے دفتر کے قریب مظاہرے کیے گئے۔ جموں و کشمیر میں اسمبلی کا اجلاس جاری ہونے کے باعث ارکان نے ایوان کے اندر ہی احتجاج کیا۔

یہ بھی پڑھئے: یوپی میں مسلمانوں سے مبینہ ناروا سلوک پر اقوام متحدہ سے کارروائی کا مطالبہ

سی پی آئی (ایم ایل) لبریشن کی حمایت یافتہ طلبہ تنظیم اے آئی ایس اے کے درجنوں کارکن دوپہر کے وقت جنتر منتر روڈ پر واقع مقررہ احتجاجی مقام کے قریب جمع ہوئے۔ یہ مقام نروچن سدن سے تقریباً ایک کلومیٹر دور ہے۔ کارکنوں نے پولیس کی اجازت کے بغیر وہاں عوامی میٹنگ منعقد کی۔ پٹیل چوک میٹرو اسٹیشن سے احتجاجی مقام تک جانے والے راستے میں پولیس نے آٹھ سطحی بیریکیڈز لگا رکھے تھے۔ مظاہرین کا امکان تھا کہ وہ وہاں ’’کاکروچ جنتا پارٹی‘‘ کے طرز پر غیر معینہ مدت کے دھرنے کا آغاز کریں گے۔ پولیس نے متعدد مظاہرین کو حراست میں لے لیا، جن میں سی پی آئی (ایم ایل) لبریشن کے جنرل سکریٹری دیپانکر بھٹاچاریہ، اے آئی ایس اے کی صدر نیہا بورا، انتخابی امور کے تجزیہ کار یوگیندر یادو اور شفافیت کے لیے سرگرم کارکن انجلی بھاردواج شامل تھے۔ انہیں نئی دہلی کے مضافاتی علاقوں کے مختلف پولیس اسٹیشنوں میں لے جایا گیا۔

کانجھی والا پولیس اسٹیشن سے جاری ایک ویڈیو پیغام میں نیہا بورا نے کہا، ’’اپنے ووٹ اور جمہوری حقوق کے تحفظ کے لیے ہمیں صرف آئین کی ضرورت ہے اور آئین ہمیں جمہوری اختلافِ رائے کا حق دیتا ہے، اسی بنیاد پر ہم آج جنتر منتر گئے تھے۔‘‘ انہوں نے مزید کہا، ’’اگر آج ہمیں حراست میں لیا گیا ہے تو ہم کل اور پرسوں بھی واپس آئیں گے۔ سڑکیں اس وقت تک بھری رہیں گی جب تک گیانیش کمار جیل نہیں جاتے، ایس آئی آر (خصوصی نظرثانی کیلئے) نہیں روکی جاتی، ان لوگوں کا ووٹ کا حق بحال نہیں کیا جاتا جن کے ووٹ غیر قانونی طور پر حذف کیے گئے ہیں اور الیکشن کمشنروں کی تقرری سے متعلق قانون منسوخ نہیں کیا جاتا۔‘‘ ترنمول کانگریس کی رکن پارلیمنٹ مہوا موئترا بھی احتجاجی مقام پر پہنچی تھیں، تاہم پولیس کی جانب سے مظاہرین کو حراست میں لینے کا سلسلہ شروع ہونے سے قبل وہ وہاں سے چلی گئیں۔ انہوں نے صحافیوں سے گفتگو کرتے ہوئے کہا کہ وہ خوش ہیں کہ ’’آج دہلی کی سڑکوں پر ہم کہہ سکتے ہیں کہ امیت شاہ مجرم ہیں، مودی غدار ہیں اور گیانیش مجرم ہیں۔‘‘

یہ بھی پڑھئے: ڈجیٹل فراڈ کا شکار ۷۲ فیصد افراد کو کوئی رقم واپس نہ مل سکی؛ ۲۷ فیصد نے پولیس کو رشوت دی: رپورٹ

سی پی ایم کی طلبہ تنظیم ایس ایف آئی اور پارٹی کی نوجوانوں کی تنظیم ڈی وائی ایف آئی کے مظاہرین شام کے وقت نروچن سدن تک پہنچنے میں کامیاب رہے اور وہاں مختصر احتجاج کیا، جس کے بعد پولیس نے انہیں حراست میں لے لیا۔ حراست میں لیے جانے والوں میں سی پی ایم کے ارکان پارلیمنٹ اے اے رحیم، جو ڈی وائی ایف آئی کے صدر بھی ہیں، وی سیواداسن اور ایس ایف آئی کے صدر آدرش ایم ساجی شامل تھے۔ تاہم  کئی کانگریسی مظاہرین کو انکم ٹیکس دفتر کے قریب اس وقت حراست میں لے لیا گیا جب وہ الیکشن کمیشن کے ہیڈکوارٹر کی جانب مارچ کرنے کی کوشش کر رہے تھے۔ سری نگر میں کانگریس کے ارکان اسمبلی نے سوالات کے وقفے کے دوران بینر اٹھا کر احتجاج کیا۔ جب انہوں نے ایوان کے وسط میں پہنچ کر احتجاج کیا تو اسپیکر اے آر راجَر نے انہیں تادیبی کارروائی کی وارننگ دی۔

مظاہرین نے جمعرات کو شائع ہونے والی ’دی انڈین ایکسپریس‘ کی رپورٹس کا حوالہ دیتے ہوئے الزام عائد کیا کہ گیانیش کمار نے تین رکنی الیکشن کمیشن میں شامل دو دیگر الیکشن کمشنروں کو نظرانداز کرتے ہوئے ایس آئی آر سے متعلق کئی ایسے فیصلے کیے جو قانونی دائرے سے باہر تھے۔ مظاہرین کا کہنا ہے کہ ان فیصلوں سے شہریوں کے حق رائے دہی کو خطرہ لاحق ہوا ہے۔ پٹنہ اور امپھال میں کانگریس کے احتجاج کے دوران پولیس نے واٹر کینن اور آنسو گیس کا استعمال کیا۔ شملہ میں کانگریس کارکنوں نے گیانیش کمار کا پتلا جلانے کی کوشش کی تو ان کی پولیس کے ساتھ جھڑپ ہوگئی۔

کانگریس کے نائب وزیر اعلیٰ مکیش اگنی ہوتری نے احتجاجی اجتماع سے خطاب کرتے ہوئے کہا کہ گیانیش کمار پر غداری کا مقدمہ چلایا جانا چاہیے۔ انہوں نے کہا، ’’دو الیکشن کمشنروں کی جانب سے ایس آئی آر سے متعلق ان فیصلوں پر اعتراضات کی خبریں، جو ان کے علم یا سفارش کے بغیر کیے گئے، یہ واضح کرتی ہیں کہ ووٹ چوری کرکے انتخابات جیتے جا رہے ہیں۔‘‘ انہوں نے مزید کہا، ’’یہ غداری ہے۔ اس لیے گیانیش کمار کے خلاف مقدمہ درج کیا جانا چاہیے۔‘‘ گوہاٹی میں پولیس نے آسام کانگریس دفتر سے چیف الیکٹورل افسر کے دفتر کی جانب جانے والے احتجاجی مارچ کو روک دیا اور متعدد سینئر رہنماؤں کو حراست میں لے لیا۔ ان میں ریاستی کانگریس کے صدر گورو گوگوئی بھی شامل تھے۔ انہیں تقریباً ایک بجے حراست میں لیا گیا اور شام چار بجے کے قریب رہا کر دیا گیا۔

یہ بھی پڑھئے: بنگال میں بی جے پی کے برسرِ اقتدار آنے کے بعد سے عیسائیوں پر ۶۰ حملے ریکارڈ کئے گئے: انڈیا ہیٹ لیب

کانگریس گیانیش کمار کو چیف الیکشن کمشنر کے عہدے سے ہٹانے کے لیے پارلیمنٹ کے دونوں ایوانوں میں نئے نوٹس پیش کرنے کی تیاری کر رہی ہے۔ پارٹی نے پیر کے روز ضلعی کلکٹریٹ کے باہر احتجاج کرنے کا بھی اعلان کیا ہے۔ کانگریس ورکنگ کمیٹی منگل کو اجلاس منعقد کرکے آئندہ کی حکمت عملی تیار کرے گی۔ پارٹی نے جمعہ کو دہلی میں جاری ایس آئی آر کے دوران معروف شخصیات کی تیز رفتار تصدیق کے لیے الیکشن کمیشن کی جانب سے کیے گئے خصوصی انتظامات پر بھی سوال اٹھائے۔ کانگریس کے جنرل سکریٹری (تنظیم) کے سی وینوگوپال نے ایکس پر پوسٹ کرتے ہوئے کہا، ’’گیانیش جائیں گے، یہ صرف وقت کی بات ہے۔‘‘ انہوں نے موجودہ احتجاج کو ’’صرف آغاز‘‘ قرار دیتے ہوئے جمہوریت کی فکر کرنے والے تمام ہندوستانیوں سے اس میں شامل ہونے کی اپیل کی۔ سول سوسائٹی کی تنظیموں اور ٹریڈ یونین اداروں نے بھی بیانات جاری کرتے ہوئے چیف الیکشن کمشنر کو عہدے سے ہٹانے اور ایس آئی آر روکنے کا مطالبہ کیا ہے۔ کئی ممتاز شہریوں نے چیف جسٹس آف انڈیا سے بھی ایس آئی آر کو روکنے کی اپیل کی ہے۔