زی سنے ایوارڈز میں بہترین اداکار کے اعلان کے بعد سوشل میڈیا پر بحث چھڑ گئی ہے۔ وکی کوشل کی جیت پر کئی مداحوں نے حیرت کا اظہار کیا، خاص طور پر رنویر سنگھ کی فلم ’’دھرندھر‘‘ میں کارکردگی کو دیکھتے ہوئے۔ شائقین کا ایک طبقہ ایوارڈ شوز کی شفافیت پر سوال اٹھا رہا ہے۔

Zee Cine Awards میں اس سال بہترین اداکار کے لیے مقابلہ خاصا سخت تھا۔ نامزد افراد میں وکی کوشل (چھاوا) اور رنویر سنگھ دھرندھر) شامل تھے۔ دیگر نامزد اداکاروں میں سنی دیول (جاٹ) اور اکشے کمار (کیسری چیپٹر ۲) شامل تھے۔ مداحوں کا خیال تھا کہ اس سال مقابلہ بنیادی طور پر وکی کوشل اور رنویر سنگھ کے درمیان تھا، کیونکہ دونوں نے اپنی اپنی فلموں میں یادگار پرفارمنس دی تھی۔

سوشل میڈیا پر ردعمل
جب نتیجہ سامنے آیا اور ایوارڈ وکی کوشل کے نام ہوا تو سوشل میڈیا پر ملا جلا ردعمل دیکھنے کو ملا۔ ’’چھاوا‘‘ میں ان کی کارکردگی کو تنقیدی طور پر سراہا گیا تھا، تاہم مداحوں کے ایک بڑے طبقے کا ماننا تھا کہ ’’دھرندھر‘‘ میں رنویر سنگھ کی اداکاری زیادہ طاقتور اور اثر انگیز تھی۔ کئی صارفین نے لکھا کہ:’’رنویر نے ’’دھرندھر‘‘ میں جو کیا، وہ سال کی سب سے نمایاں پرفارمنس تھی۔‘‘ کچھ مداحوں نے یہ بھی نشاندہی کی کہ ’’دھرندھر‘‘ کی کاسٹ اور عملہ ایوارڈ تقریب میں موجود نہیں تھا، جس پر مختلف قیاس آرائیاں کی جا رہی ہیں۔

یہ بھی پڑھئے: امریکہ میں ’’دُھرندھر ۲‘‘ کی ایڈوانس ٹکٹیں ’’ٹاکسک‘‘ سے ۱۰؍ گنا زیادہ فروخت

ایوارڈ شوز کی ساکھ پر سوال
یہ پہلا موقع نہیں جب کسی ایوارڈ کے نتیجے پر سوال اٹھایا گیا ہو۔ اس سے قبل کریتی سینن کی جیت کے بعد مداحوں نے یامی گوتم کے حق میں آواز اٹھائی تھی۔ اب بہترین اداکار کے فیصلے نے ایک بار پھر بحث چھیڑ دی ہے کہ کیا ایوارڈ شوز خالصتاً کارکردگی کی بنیاد پر فیصلے کرتے ہیں یا دیگر عوامل بھی اثر انداز ہوتے ہیں۔

یہ بھی پڑھئے: ’’وارانسی‘‘ انٹارکٹکا میں شوٹ ہونے والی پہلی ہندوستانی فلم: پرینکا چوپڑہ کی تصدیق

کارکردگی کا موازنہ
فلم ’’چھاوا‘‘ میں وکی کوشل کی اداکاری کو تاریخی کردار کی مضبوط پیشکش کے طور پر دیکھا گیا۔ تاہم کچھ ناقدین اور مداحوں کا کہنا ہے کہ یہ ان کا کریئر کا بہترین کام نہیں تھا، اور وہ ماضی میں ’’سیم بہادر‘‘ جیسی فلموں میں زیادہ نمایاں کارکردگی دے چکے ہیں۔ دوسری جانب ’’دھرندھر‘‘ میں رنویر سنگھ کے کردار حمزہ علی مزاری کو ان کے کریئر کی سب سے شدید اور یادگار پرفارمنس قرار دیا جا رہا ہے۔
ایوارڈ سیزن ابھی جاری ہے اور دیکھنا یہ ہے کہ آئندہ تقریبات میں نتائج کیسے سامنے آتے ہیں۔ مداحوں کی توقع ہے کہ دیگر ایوارڈ شوز میں ’’دھرندھر‘‘ اور رنویر سنگھ کو زیادہ تسلیم کیا جائے گا۔ فلمی حلقوں میں یہ بحث بھی جاری ہے کہ کیا ایوارڈ شوز کو مزید شفاف اور ناظرین کے لیے قابلِ اعتماد بنانے کی ضرورت ہے۔