رنویر سنگھ کی فلم ’’دھرندھر ‘‘نے محض۲۱؍ دنوں میں دنیا بھر سے۱۰۰۶؍ کروڑ روپے کی کمائی کر کے متعدد ریکارڈ توڑ دیئے ہیں۔

مشہور ہندوستانی اداکار رنویر سنگھ کی فلم ’’دھرندھر‘‘ نے ریلیز کے بعد باکس آفس پر شاندار کارکردگی کا سلسلہ برقرار رکھتے ہوئے ایک اور بڑا سنگ میل عبور کر لیا ہے۔ فلم نے نہ صرف شائقین کو متاثر کیا بلکہ کمائی کے نئے ریکارڈ بھی قائم کر دیئے ہیں۔ رواں ماہ۵؍ دسمبر کو ریلیز ہونے والی یہ فلم۲۰۲۵ء کی سب سے زیادہ کمائی کرنے والی ہندوستانی فلم بن چکی ہے۔ اب یہ فلم عالمی سطح پرایک ہزار کروڑ روپے کمانے والی فلموں کے کلب میں بھی شامل ہو گئی ہے۔ 
دھرندھر نے محض۲۱؍ دنوں میں دنیا بھر سے۱۰۰۶؍ کروڑ روپے کی کمائی کر کے متعدد ریکارڈ توڑ دیئے ہیں۔ جیو اسٹوڈیوز کے مطابق اس فلم نے اسی سال ریلیز ہونے والی بڑی فلموں ’’ کانتارا چیپٹر ون‘‘ اور’’ چھاوا ‘‘کو بھی پیچھے چھوڑ دیا ہے۔ ’’کانتارا چیپٹر ون‘‘ نے عالمی سطح پر۸۵۲؍ کروڑ جبکہ’’ چھاوا ‘‘نے۸۰۷؍ کروڑ روپے کا بزنس کیا تھا۔ 

یہ بھی پڑھئے: ’’دھرندھر‘‘ بالی ووڈ کی سب سے زیادہ کمائی کرنے والی فلم بن گئی

ہندوستان میں بھی فلم نے غیر معمولی کامیابی حاصل کی ہے۔ رپورٹس کے مطابق ابتدائی۲۱؍ دنوں میں دھرندھر نے ملک بھر میں ۶۵۰؍ کروڑ روپے سے زائد کا کاروبار کیا۔ جیو اسٹوڈیوز کے مطابق فلم نے ریلیز کے۲۱؍ویں دن ۶۰ء۲۸؍کروڑ روپے کمائے۔ اس شاندار کارکردگی کے باعث دھرندھر نے ڈومیسٹک نیٹ کلیکشن کی بنیاد پر سب سے زیادہ کمائی کرنے والی ہندوستانی فلموں کی ٹاپ ٹین فہرست میں بھی جگہ بنا لی ہے۔ فلم نے رنبیر کپور کی ’’ اینمل‘‘ کو پیچھے چھوڑتے ہوئے ۹؍ ویں پوزیشن حاصل کر لی ہے۔ ہدایتکار آدتیہ دھر کی یہ فلم نہ صرف۲۰۲۵ء کی سب سے بڑی ہٹ ثابت ہو رہی ہے بلکہ حالیہ برسوں کی کامیاب ترین ہندوستانی فلموں میں بھی شمار کی جا رہی ہے۔