’’دِرِیشیم۳‘‘ تمام جنوبی ہندوستانی زبانوں میں او ٹی ٹی پلیٹ فارم پر ریلیز ہونے والی تھی، لیکن اب مدراس ہائی کورٹ نے ایک ورژن کی ریلیز پر درخواست دائر ہونے کے بعد عارضی پابندی لگا دی ہے۔

موہن لال کی سسپنس تھرلر فلم ’’دِرِیشیم۳‘‘ کے او ٹی ٹی پر آنے کا مداحوں کو بے صبری سے انتظار تھا، لیکن اب ان کے لیے ایک بری خبر ہے۔ مدراس ہائی کورٹ نے ’’دِرِیشیم۳‘‘ کے تیلگو ڈب شدہ ورژن کی او ٹی ٹی ریلیز پر عارضی پابندی عائد کر دی ہے۔ یہ فیصلہ کیوں کیا گیا؟ آئیے تفصیل جانتے ہیں۔
’’دِرِیشیم۳‘‘ کے خلاف عدالت میں درخواست کیوں دائر کی گئی؟
تلنگانہ کی نیوز ویب سائٹ ’’گلٹے‘‘ کے مطابق، فلمساز سری پریا کی پروڈکشن کمپنی اور راج کمار تھیٹرز پرائیویٹ لمیٹڈ نے’’دِرِیشیم۳‘‘ کے تیلگو ورژن کی او ٹی ٹی ریلیز روکنے کے لیے عدالت میں درخواست دائر کی تھی۔۱۸؍ جون کو ’’دِرِیشیم۳‘‘ کا تیلگو ورژن او ٹی ٹی پلیٹ فارم پر اسٹریم ہونا تھا، لیکن اس سے پہلے ہی جسٹس کے کماریش بابو نے اس کی ریلیز پر روک لگا دی۔ عدالت نے اپنے حکم میں کہا’’یہ نوٹ کیا گیا ہے کہ نجی نوٹس بھیجے جانے کے باوجود مدعا علیہان کی جانب سے نہ کوئی عدالت میں پیش ہوا اور نہ ہی کسی نے ان کی نمائندگی کی۔ ان کے نام عدالت کی کاز لسٹ میں بھی درج تھے۔ اس صورتحال کو مدنظر رکھتے ہوئے عبوری حکمِ امتناع جاری کیا جاتا ہے، جس کے تحت مدعا علیہان، ان کے ملازمین، ایجنٹس، نمائندے، لائسنس یافتہ افراد یا ان کی جانب سے دعویٰ کرنے والا کوئی بھی شخص درخواست گزار کے کاپی رائٹ کی خلاف ورزی کرتے ہوئے فلم کو تیلگو زبان میں او ٹی ٹی پر جاری نہیں کر سکے گا۔‘‘

یہ بھی پڑھئے:’’ دیوانے ہیں‘‘ کے ساتھ لوٹا پرانے بالی ووڈ کے جشن کا رنگ، ’’ویلکم ٹو دی جنگل‘‘ کا نیا گانا ریلیز

’’دِرِیشیم۳‘‘ سے متعلق تنازع کیا ہے؟
موہن لال کی مشہور سسپنس تھرلر’’دِرِیشیم۳‘‘ سیریز کی یہ تیسری فلم ہے۔ اس سے پہلے ’’دِرِیشیم۳‘‘ (۲۰۱۴ء) اور ’’دِرِیشیم۳‘‘ کے تیلگو ریمیک بھی بنائے گئے تھے۔ تاہم، اس بار فلمسازوں نے ’’دِرِیشیم۳‘‘ کا تیلگو ریمیک بنانے کے بجائے اصل فلم کو تیلگو زبان میں ڈب کرکے براہِ راست او ٹی ٹی پر ریلیز کرنے کا منصوبہ بنایا۔
اس سے قبل تیلگو ورژنز میں اداکار وینکٹیش نے مرکزی کردار ادا کیا تھا جبکہ سری پریا نے ان فلموں کی ہدایت کاری کی تھی۔ اسی بنیاد پر سری پریا نے دعویٰ کیا ہے کہ تیلگو حقوق پر ان کا حق ہے۔ یہی وجہ ہے کہ سری پریا اور راج کمار سیتھوپتی نے مدراس ہائی کورٹ میں درخواست دائر کرتے ہوئے فلم کے تیلگو ڈب شدہ ورژن کی او ٹی ٹی ریلیز روکنے کا مطالبہ کیا ہے۔

یہ بھی پڑھئے:کین اور بیلنگھم کی شاندار کارکردگی سے انگلینڈ نے کروشیا پر سنسنی خیز کامیابی

’’دِرِیشیم۳‘‘ او ٹی ٹی پر کب آئے گی؟
’’دِرِیشیم۳‘‘کی او ٹی ٹی ریلیز کے حوالے سے چند روز قبل ہدایت کار جیتو جوزف کی فلم کے بارے میں پرائم ویڈیو نے ایک پوسٹ شیئر کیا تھا، جس میں بتایا گیا تھا کہ فلم کو ہندی کے علاوہ تمام جنوبی ہندوستانی  زبانوں میں۱۸؍ جون کو ریلیز کیا جائے گا۔ تاہم، مدراس ہائی کورٹ کے حالیہ حکم کے بعد تیلگو ڈب شدہ ورژن کی ریلیز فی الحال روک دی گئی ہے جبکہ دیگر زبانوں میں ریلیز کے بارے میں کوئی پابندی سامنے نہیں آئی۔