فیفا ورلڈ کپ ۲۰۲۶ء کے گروپ آئی کے آخری اور سب سے اہم میچ میں جمعہ کے روز فرانس اور ناروے کے درمیان ہونے والا مقابلہ اس وقت دنیا بھر میں سرخیوں کا مرکز بنا ہوا ہے۔

فیفا ورلڈ کپ  ۲۰۲۶ء کے گروپ آئی  کے آخری اور سب سے اہم میچ میں جمعہ کے روز فرانس اور ناروے کے درمیان ہونے والا مقابلہ اس وقت دنیا بھر میں سرخیوں کا مرکز بنا ہوا ہے، جہاں فٹ بال کی دنیا کے دو سپر اسٹارز کیلین ایمباپے اور ارلنگ ہالینڈ ایک دوسرے کے خلاف میدان میں اترنے کے لیے تیار ہیں۔
یہ دونوں اسٹار فارورڈز پہلے ہی اپنے ابتدائی دو میچوں میں دو دو گول اسکور کر کے ورلڈ کپ گولڈن بوٹ  کی دوڑ میں سب سے آگے چل رہے ہیں۔ فرانس اور ناروے دونوں ٹیمیں اپنے پہلے دو میچ جیت کر چھ چھ پوائنٹس کے ساتھ برابر ہیں اور پہلے ہی ناک آؤٹ مرحلے کے لیے کوالیفائی کر چکی ہیں  تاہم، فرانس کا گول ڈفرنس بہتر ہے، جس کی وجہ سے یہ میچ ڈرا ہونے کی صورت میں بھی فرانس گروپ الیون کے طور پر اگلے مرحلے میں جائے گا۔

یہ بھی پڑھئے:کیپ ورڈے ورلڈ کپ کے اپنے خوابوں کے سفر کو آگے بڑھانے کے لیے پرعزم

ناروے کی سینیگال کے خلاف جیت کے بعد مانچسٹر سٹی کے اسٹار اسٹرائیکر ارلنگ ہالینڈ نے اس میچ کی اہمیت کو زیادہ ترجیح نہ دیتے ہوئے کہا تھا کہ اگلا مرحلہ طے کرنا ہی ان کی ٹیم کا بنیادی ہدف تھا۔ انہوں نے کہاکہ ’’ایمانداری سے کہوں تو مجھے فرانس کے خلاف میچ کی زیادہ پرواہ نہیں ہے۔ ہم اگلے دور میں پہنچ چکے ہیں جو کہ ایک حیرت انگیز بات ہے۔ فرانس شاید ہم سے جیت جائے گا اور شاید وہ پورا ٹورنامنٹ ہی جیت جائیں۔‘‘
فرانس کے مڈفیلڈر اوریلین چوآ مینی نے   پریس کانفرنس میں ہالینڈ کے اس تبصرے پر مسکراتے ہوئے کہا’’ آپ کو اس کی بات پر یقین ہے؟ مجھے نہیں معلوم کہ وہ مذاق کر رہے تھے یا سنجیدہ تھے۔ ہم صرف اپنے کھیل پر توجہ مرکوز رکھیں گے۔ ہمیں معلوم ہے کہ کل ایک بڑا مقابلہ ہے اور ہمیں جیتنا ہے۔‘‘ ریئل میڈرڈ کے اس مڈفیلڈر نے ہالینڈ کو دنیا کا خطرناک ترین کھلاڑی قرار دیتے ہوئے کہا کہ وہ کسی بھی لمحے گول کر سکتے ہیں، اس لیے ہماری معمولی سی غفلت بھی ہمیں مہنگی پڑ سکتی ہے۔ چوآ مینی نے اپنے ساتھی کھلاڑی کیلین ایمباپے کی بھی تعریف کی اور کہا کہ ایمباپے ہمیشہ بڑے مقابلوں میں اپنی غیر معمولی کارکردگی سے ٹیم کو فتح دلاتے ہیں۔

یہ بھی پڑھئے:منگلورو میں مداح کے ساتھ شاہ رخ خان کا مزاحیہ جواب دل جیت گیا

ناروے کے کوچ اسٹال سولباکن کا ماننا ہے کہ ایمباپے اور ہالینڈ دونوں کا کھیلنے کا انداز مختلف ہے، لیکن یہ دونوں کھلاڑی آنے والے کئی سال تک دنیا پر راج کریں گے۔ انہوں نے بتایا کہ سخت شیڈول اور طویل سفر کی وجہ سے ناروے کی پلیئنگ الیون میں کچھ تبدیلیاں کی جائیں گی، لیکن ٹیم یہ میچ جیتنے کے لیے اپنا پورا زور لگائے گی۔ اس کے ساتھ ہی، سولباکن نے فرانسیسی کوچ ڈیڈیئر ڈیسچیمپس کی والدہ کے انتقال پر گہرے دکھ اور تعزیت کا اظہار کیا، جو اس افسوسناک واقعے کے بعد وطن واپس روانہ ہو گئے ہیں۔ انہوں نے کہا کہ فرانسیسی ٹیم بہت تجربہ کار ہے اور وہ اس مشکل وقت میں بھی خود کو سنبھالنے کی بھرپور صلاحیت رکھتی ہے۔