مشہور سیریز ’’گیم آف تھرونز‘‘ پہلی بار بڑی اسکرین پر آ رہی ہے، جس کا ورکنگ ٹائٹل ’’ایگونز کونکویسٹ‘‘ رکھا گیا ہے۔ وارنر بروز اس پروجیکٹ کو تیار کر رہا ہے جبکہ جارج آر آر مارٹن بھی تخلیقی مشاورت میں شامل ہیں۔ فلم ابھی ابتدائی مرحلے میں ہے۔

لاس ویگاس میں منعقدہ سنیما کون ۲۰۲۶ء کے دوران ایک بڑے اعلان نے عالمی فلمی دنیا میں ہلچل مچا دی، جب یہ تصدیق کی گئی کہ ٹی وی سیریز ’’گیم آف تھرونز‘‘ پر مبنی پہلی فیچر فلم باضابطہ طور پر ابتدائی ترقی کے مرحلے میں داخل ہو چکی ہے۔ یہ اعلان برسوں سے جاری قیاس آرائیوں کے بعد سامنے آیا ہے اور اسے فرنچائز کیلئے ایک تاریخی قدم قرار دیا جا رہا ہے، کیونکہ یہ پہلی بار ویسٹروس کی دنیا کو ٹیلی ویژن سے نکال کر سنیما گھروں تک لے جائے گا۔ رپورٹس کے مطابق، ورانر بروز نے اس فلم کی تیاری کا آغاز ۲۰۲۴ء کے آخر میں ہی کر دیا تھا، جب اسٹوڈیو نے جارج آر آر مارٹن کی تخلیق کردہ فینٹسی کائنات کو بڑی اسکرین پر وسعت دینے کے امکانات پر کام شروع کیا۔

یہ بھی پڑھئے: کرینہ کپور کا ’’کیپوچینو کارنر‘‘ وائرل، منصور علی خان کی تصویر نے توجہ حاصل کی

ایچ بی او اور میکس کے چیئرمین اور سی ای او کیسی بلوائز نے بھی اس پروجیکٹ کی تصدیق کرتے ہوئے کہا کہ ’’یہ فلم ابھی ابتدائی مرحلے میں ہے، اور ٹیم اس بات کا جائزہ لے رہی ہے کہ آیا یہ کہانی تھیٹر میں ریلیز کے لیے موزوں ہے۔‘‘ سنیما کون ۲۰۲۶ء میں وارنر بروز کی پریزنٹیشن کے دوران فلم کا ورکنگ ٹائٹل ’’ایگونز کونکویسٹ‘‘ بھی سامنے لایا گیا، جس نے مداحوں کے درمیان مزید جوشی پیدا کر دی ہے۔ اگرچہ کہانی کی مکمل تفصیلات ابھی ظاہر نہیں کی گئیں، لیکن اندرونی ذرائع کے مطابق فلم ممکنہ طور پر ویسٹروس کی ابتدائی تاریخ اور ایگون ٹارگرین کی فتوحات کے گرد گھومے گی۔

اس پروجیکٹ کے اسکرپٹ کیلئے بیو ویلیمن کو شامل کیا گیا ہے، جو ویب سیریز ’’ہاؤس آف کارڈز‘‘ اور ’’اینڈور‘‘ جیسے سیاسی اور ڈرامائی منصوبوں کیلئے جانے جاتے ہیں۔ ان کی شمولیت نے مداحوں میں یہ توقع پیدا کی ہے کہ فلم میں گہری سیاسی کہانی اور طاقت کی کشمکش کو مؤثر انداز میں پیش کیا جائے گا۔ دوسری جانب، جارج آر آر مارٹن بھی اس منصوبے سے منسلک ہیں، تاہم ان کے کردار کی مکمل تفصیلات سامنے نہیں آئیں۔ اطلاعات کے مطابق، وہ اسکرپٹ کے جائزے اور تخلیقی رہنمائی میں شامل ہیں تاکہ اصل کہانی کے معیار کو برقرار رکھا جا سکے۔

یہ بھی پڑھئے: عامر خان کے اشنیر گروور کی بایوپک میں نظر آنے کے امکانات

دلچسپ بات یہ ہے کہ ماضی میں سیریز کے اصل شو رَنرز ڈیوڈ بینی آف اور بی ڈی ویس نے کہانی کو فلمی انداز میں ختم کرنے کی تجویز دی تھی، لیکن ایچ بی او نے اس وقت اس خیال کو مسترد کر دیا تھا اور سیریز کو ٹی وی فارمیٹ میں مکمل کیا گیا۔ اب، برسوں بعد، یہی تصور ایک نئے انداز میں حقیقت کا روپ اختیار کرتا دکھائی دے رہا ہے، جہاں ویسٹروس کی دنیا کو ایک وسیع سنیما تجربے میں ڈھالنے کی کوشش کی جا رہی ہے۔ یہ پیش رفت نہ صرف فرنچائز کیلئے ایک نیا باب کھولتی ہے بلکہ اس بات کا اشارہ بھی دیتی ہے کہ بڑے اسٹوڈیوز اپنی مقبول ٹی وی کائناتوں کو فلمی سطح پر وسعت دینے میں سنجیدگی رکھتے ہیں۔