بالی ووڈ سپر اسٹار رتیک روشن نے اپنے بین الاقوامی کریئر کی توسیع کی جانب ایک اہم قدم اٹھاتے ہوئے ہالی ووڈ کی معروف مینجمنٹ اور پروڈکشن کمپنی Anonymous Content کے ساتھ معاہدہ کر لیا ہے۔ اگرچہ فی الحال کسی ہالی ووڈ فلم یا سیریز کا باضابطہ اعلان نہیں کیا گیا، تاہم اس شراکت داری نے مداحوں اور فلمی حلقوں میں نئی قیاس آرائیوں کو جنم دیا ہے۔ ایوارڈ یافتہ ہالی ووڈ منصوبوں سے وابستہ اس کمپنی کے ساتھ رتیک کا معاہدہ عالمی سطح پر ان کی موجودگی کو مزید مضبوط بنا سکتا ہے۔

بالی ووڈ کے معروف اداکار رتیک روشن نے بین الاقوامی تفریحی صنعت میں اپنی موجودگی کو مزید مستحکم کرنے کی جانب ایک اہم قدم اٹھاتے ہوئے ہالی ووڈ کی مشہور مینجمنٹ اور پروڈکشن کمپنی Anonymous Content کے ساتھ معاہدہ کر لیا ہے۔ امریکی اشاعتی ادارے Deadline کی رپورٹ کے مطابق رتیک روشن اب اس کمپنی کا حصہ بن گئے ہیں، جو ہالی ووڈ کی کئی کامیاب اور ایوارڈ یافتہ فلموں اور ٹیلی ویژن منصوبوں کی تیاری کے لیے شہرت رکھتی ہے۔ اگرچہ اس مرحلے پر رتیک کے کسی ہالی ووڈ پروجیکٹ میں شامل ہونے کا باضابطہ اعلان نہیں کیا گیا، تاہم اس پیش رفت نے عالمی سطح پر ان کے ممکنہ مستقبل کے منصوبوں کے بارے میں دلچسپی پیدا کر دی ہے۔

یہ بھی پڑھئے: کترینہ کیف کی بڑے پردے پر واپسی؟ ’’چاندنی بار ۲‘‘ میں مرکزی کردار کی خبریں

ڈیڈ لائن نے اپنی رپورٹ میں رتیک روشن کو ’’ہندوستان کے سب سے زیادہ معاوضہ لینے والے اور مقبول اداکاروں میں سے ایک‘‘ قرار دیا اور ان کے عالمی امکانات پر روشنی ڈالی۔ واضح رہے کہ Anonymous Content ہالی ووڈ میں اپنی معیاری اور کامیاب پروڈکشنز کے لیے جانی جاتی ہے۔ کمپنی ماضی میں The Revenant، Spotlight اور Eternal Sunshine of the Spotless Mind جیسی معروف اور ایوارڈ یافتہ فلموں سے وابستہ رہی ہے، جنہیں بین الاقوامی سطح پر بے حد پذیرائی حاصل ہوئی۔ رتیک روشن ۲۰۰۰ء میں اپنے والد اور فلم ساز راکیش روشن کی ہدایت کاری میں بننے والی فلم ’’کہو نا… پیار ہے‘‘ سے فلمی دنیا میں قدم رکھا تھا۔ فلم کی غیر معمولی کامیابی نے انہیں راتوں رات بالی ووڈ کے صفِ اول کے اداکاروں میں شامل کر دیا۔
اس کے بعد رتیک نے متعدد کامیاب اور یادگار فلموں میں اداکاری کی، جن میں ’’وار‘‘، ’’سپر ۳۰‘‘ ، ’’گزارش‘‘، ’’کوئی… مل گیا‘‘، ’’کرش‘‘، ’’جودھا اکبر‘‘ اور ’’زندگی نہ ملے گی دوبارہ‘‘ شامل ہیں۔ کام کے محاذ پر رتیک روشن اس وقت اپنی مشہور سپر ہیرو فرنچائز کی اگلی فلم ’’کرش ۴‘‘ کی تیاری میں مصروف ہیں، جس کا شائقین طویل عرصے سے انتظار کر رہے ہیں۔ اس فلم میں وہ ایک بار پھر کرشنا مہرا کے کردار میں نظر آئیں گے۔ اس کے علاوہ رتیک بطور پروڈیوسر بھی اپنی نئی اننگز کا آغاز کرنے جا رہے ہیں۔ ان کا نیا پروجیکٹ ’’اسٹارم‘‘ اسٹریمنگ پلیٹ فارم پرائم ویڈیو کے لیے تیار کیا جا رہا ہے۔

یہ بھی پڑھئے: بالی ووڈ ستارے باکس آفس کی اگلی جنگ کے لیے تیار

رتیک روشن کا یہ قدم ایسے وقت میں سامنے آیا ہے جب کئی ہندوستانی فنکار عالمی تفریحی صنعت میں اپنی جگہ بنانے کی کوشش کر رہے ہیں۔ اس سلسلے میں سب سے نمایاں مثال پرینکا چوپڑا جوناس کی ہے، جنہوں نے موسیقی اور ٹیلی ویژن کے ذریعے ہالی ووڈ میں کامیاب مقام حاصل کیا۔ پرینکا بعد ازاں Quantico اور متعدد ہالی ووڈ فلموں میں نظر آئیں، جن میں Baywatch، A Kid Like Jake، We Can Be Heroes اور Isn’t It Romantic شامل ہیں۔ حال ہی میں وہ جان سینا اور ادریس البا کے ساتھ فلم Heads of State میں بھی جلوہ گر ہوئیں۔ 
گزشتہ چند برسوں کے دوران عالیہ بھٹ، رنویر سنگھ، سونم کپور، ودیوت جموال اور رادھیکا آپٹے سمیت کئی ہندوستانی فنکار بھی بین الاقوامی ٹیلنٹ ایجنسیوں کے ساتھ معاہدے کر چکے ہیں۔ فلمی تجزیہ کاروں کا ماننا ہے کہ Anonymous Content کے ساتھ رتیک روشن کی شراکت داری مستقبل میں کسی بین الاقوامی فلم، سیریز یا مشترکہ پروڈکشن کی راہ ہموار کر سکتی ہے، جس سے ان کی عالمی شناخت مزید مضبوط ہونے کا امکان ہے۔