بالی ووڈ سپر اسٹار رتیک روشن نے انکشاف کیا ہے کہ وہ اس بات پر مایوس ہیں کہ فلم ساز انہیں زیادہ تر مثبت اور مثالی کرداروں میں ہی دیکھنا چاہتے ہیں۔ اداکار کا کہنا ہے کہ وہ اپنے کریئر کے اس مرحلے پر زیادہ پیچیدہ، گرے شیڈز رکھنے والے کردار ادا کرنے کے خواہش مند ہیں۔ سوشل میڈیا پر ایک پوسٹ کے ذریعے انہوں نے اپنی فلم ’’لک بائی چانس‘‘ کے کردار ظفر کو یاد کرتے ہوئے کہا کہ اگر انہیں اسی نوعیت کا کوئی کردار پیش کیا جائے تو وہ فوراً قبول کر لیں گے۔

بالی ووڈ کے معروف اداکار رتیک روشن نے اپنے مستقبل کے کرداروں سے متعلق ایک دلچسپ خواہش کا اظہار کرتے ہوئے کہا ہے کہ وہ روایتی ’’اچھے آدمی‘‘ کے کرداروں سے آگے بڑھنا چاہتے ہیں اور زیادہ پیچیدہ و گرے شیڈز رکھنے والے کردار ادا کرنے کے خواہش مند ہیں۔ اداکار نے پیرس میں واقع ایفل ٹاور کے پس منظر میں اپنی ایک تصویر انسٹاگرام پر شیئر کی اور مداحوں کو بتایا کہ حال ہی میں ان سے پوچھا گیا کہ وہ کس قسم کے کرداروں کی تلاش میں ہیں۔ اس سوال کے جواب میں انہوں نے اپنی ہی سوچ پر حیرت کا اظہار کرتے ہوئے کہا کہ انہیں اچانک اپنی فلم ’’لک بائی چانس‘‘ کا کردار ظفر یاد آ گیا۔ 

 

 

 

 

 

View this post on Instagram

 

 

 

 

 

 

 

 

 

 

 

A post shared by Hrithik Roshan (@hrithikroshan)

رتیک روشن نے اپنی پوسٹ میں لکھا کہ اگر انہیں ظفر جیسا کردار دوبارہ ادا کرنے کا موقع ملے تو وہ بلا جھجک اس منصوبے کا حصہ بن جائیں گے۔ تاہم ان کے مطابق فلم ساز اب بھی انہیں زیادہ تر مثبت، مثالی اور ہیرو نما کرداروں میں ہی دیکھنا چاہتے ہیں، جس کی وجہ سے وہ اپنی اداکاری کی نئی جہتیں سامنے نہیں لا پا رہے۔ اداکار کے اس بیان نے فلمی حلقوں میں دلچسپی پیدا کر دی ہے اور متعدد شخصیات نے ان کی پوسٹ پر تبصرے بھی کیے۔ فلمساز سدھارتھ آنند نے مختصر مگر معنی خیز انداز میں لکھا، ’’چلو پھر!‘‘، جسے ممکنہ مستقبل کے اشتراک کی جانب اشارہ قرار دیا جا رہا ہے۔

دوسری جانب زویا اختر نے رتیک کے تبصرے کا جواب دیتے ہوئے مذاقاً کہا کہ ’’چلو، اس پر کافی پیتے ہیں۔‘‘ یاد رہے کہ زویا اختر ہی نے ۲۰۰۹ء میں ’’لک بائی چانس‘‘ کی ہدایت کاری کی تھی، جس میں رتیک روشن نے ظفر نامی ایک ابھرتے ہوئے اداکار کا کردار نبھایا تھا۔ فلم میں ایک فلم ساز کا کردار ادا کرنے والے سنجے کپور نے بھی دلچسپ انداز میں ردعمل دیا۔ انہوں نے لکھا کہ اگر ’’لک بائی چانس‘‘ کے ظفر کی واپسی ہوتی ہے تو اس بار وہ خود انہیں ہدایت دیں گے۔ ان کا اشارہ فلم کے ایک یادگار منظر کی طرف تھا جس میں ظفر نے ان کی پیشکش کردہ فلم مسترد کر دی تھی۔

اداکار ہرش وردھن کپور نے بھی رتیک کی پوسٹ کو سراہتے ہوئے لکھا کہ وہ آنے والے منصوبوں کے لیے بے حد پرجوش ہیں، جس سے مداحوں میں بھی نئے کرداروں کے حوالے سے تجسس بڑھ گیا ہے۔ خیال رہے کہ رتیک روشن گزشتہ دو دہائیوں سے بالی ووڈ کے نمایاں ستاروں میں شمار ہوتے ہیں اور زیادہ تر ایکشن، رومانوی اور مثبت کرداروں میں نظر آئے ہیں۔ اگرچہ انہوں نے اپنے کریئر میں مختلف نوعیت کے کردار ادا کیے ہیں، تاہم ان کے مداح طویل عرصے سے انہیں مزید پیچیدہ اور نفسیاتی گہرائی رکھنے والے کرداروں میں دیکھنے کی خواہش رکھتے ہیں۔

یہ بھی پڑھئے: ہندوستان میں ’’دی اوڈیسی‘‘ کی ٹکٹ بُکنگ ۸؍جون سے شروع ہوگی

اداکار اس وقت دو بڑے منصوبوں میں مصروف ہیں۔ ان میں ایک انتہائی متوقع فلم ’’کرش ۴‘‘ ہے، جو ان کی ہدایت کاری میں پہلی فلم بھی ہوگی۔ اس کے علاوہ وہ ایک نئی ایکشن انٹرٹینر کا بھی حصہ ہیں، جسے ہوم بیل فلمز کی سرپرستی حاصل ہے۔ یہ پروڈکشن ہاؤس ’’کے جی ایف‘‘ اور کانتارا‘‘ جیسی کامیاب فلموں کے لیے جانا جاتا ہے۔ رتیک کے حالیہ بیان نے اس بحث کو دوبارہ زندہ کر دیا ہے کہ کیا بالی ووڈ اپنے بڑے ستاروں کو روایتی سانچوں سے باہر نکل کر نئے اور غیر روایتی کردار ادا کرنے کے مواقع فراہم کر رہا ہے یا نہیں۔