ہندوستان کے ابھیشیک شرما نیوزی لینڈ کے خلاف پہلے ٹی۲۰؍ میں ۳۵؍ گیندوں پر۸۴؍ رن کی شاندار اننگز کھیل کر پہلے ہی خبروں میں ہیں اور جمعہ کو جب دونوں ٹیمیں پانچ میچوں کی سیریز کے دوسرے مقابلے میں شام ۷؍ بجے شہید ویر نارائن سنگھ انٹرنیشنل کرکٹ اسٹیڈیم میں آمنے سامنے ہوں گی تو ایک بار پھر تمام نظریں انہی پر مرکوز ہوں گی۔

ہندوستان کے ابھیشیک شرما نیوزی لینڈ کے خلاف پہلے ٹی۲۰؍ میں ۳۵؍ گیندوں پر۸۴؍ رن کی شاندار اننگز کھیل کر پہلے ہی خبروں میں ہیں  اور جمعہ کو جب دونوں ٹیمیں پانچ میچوں کی سیریز کے دوسرے مقابلے میں شام  ۷؍ بجے شہید ویر نارائن سنگھ انٹرنیشنل کرکٹ اسٹیڈیم میں آمنے سامنے ہوں گی تو ایک بار پھر تمام نظریں انہی پر مرکوز ہوں گی۔ تاہم ہندوستان کو نیوزی لینڈ کے ممکنہ جوابی حملے سے ہوشیار رہنا ہوگا، جس نے ون ڈے سیریز میں پہلا میچ ہارنے کے بعد زبردست واپسی کرتے ہوئے اگلے دونوں میچ جیت کر سیریز اپنے نام کی تھی۔
ہندوستان  نے ناگپور میں سیریز کے پہلے میچ میں ۴۸؍ رنز سے کامیابی حاصل کی تھی، جہاں اس نے ۷؍وکٹ پر ۲۳۸؍رن  کا بڑا اسکور بنایا ۔ ابھیشیک شرما کی شاندار اننگز، جس میں آٹھ بلند و بالا چھکے شامل تھے، نے ٹیم کو مضبوط آغاز فراہم کیا، جبکہ رنکو سنگھ نے ۲۰؍ گیندوں پر ناٹ آؤٹ ۴۴؍ رنز بنا کر اسکور کو۲۳۰؍رن  کے پار پہنچایا۔
سوریہ کمار یادو (۳۲؍رنز) اور ہاردک پانڈیا (۲۵؍رنز) نے اہم تعاون فراہم کیا۔ گیندبازی میں ورون چکرورتی اور شِوم دوبے نے دو، دو وکٹ حاصل کئے جبکہ عرشدیپ سنگھ اور ہاردک پانڈیا نے ایک، ایک وکٹ لے کر نیوزی لینڈ پر دباؤ برقرار رکھا اور اسے ۷؍وکٹ پر ۱۹۰؍رن  تک محدود کر دیا۔
ہندوستان رائے پور میں اکشر پٹیل کے بغیر میدان میں اتر سکتا ہے، کیونکہ ناگپور میں کیچ اور گیندبازی کے دوران ان کی انگلی میں چوٹ لگ گئی تھی۔ اگر ٹیم ایک اضافی فاسٹ بولر کے ساتھ جانے کا فیصلہ کرتی ہے تو ہَرشت رانا کو شامل کیا جا سکتا ہے، جبکہ اسپن پر مبنی کمبینیشن کی صورت میں روی بشنوئی کو موقع ملنے کا امکان ہے۔ ۲۳۹؍ رنز کے بڑے ہدف کے تعاقب میں نیوزی لینڈ کو اوپری ترتیب میں مشکلات کا سامنا کرنا پڑا، کیونکہ ابتدائی وکٹیں جلد گرنے سے ٹیم فوراً دباؤ میں آ گئی۔ گلین فلپس نے ۴۰؍گیندوں پر شاندار ۷۸؍ رنز بنا کر جوابی حملہ کیا، جس میں مارک چیپمین (۳۹؍رن ) اور ڈیرل مچل (۲۸؍رن) نے ان کا ساتھ دیا۔
کائل جیمیسن اور جیکب ڈفی نے دو، دو وکٹیں حاصل کیں، جبکہ ایش سوڑھی اور مچل سینٹنر نے ایک، ایک کھلاڑی کو آؤٹ کیا۔ شکست کے باوجود نیوزی لینڈ نے بھرپور مقابلہ کیا اور اب رائے پور میں اپنی ٹاپ آرڈر کی مشکلات اور ڈیتھ اوورز میں بولنگ کے مسائل پر قابو پانے کی کوشش کرے گا۔ ٹی۲۰؍ میں دونوں ٹیموں کے درمیان براہِ راست مقابلوں میں ہندوستان کو ۲۶؍ میچوں میں۱۰۔۱۳؍ کی برتری حاصل ہے جبکہ تین میچ برابر رہے ہیں۔ حالیہ فارم بھی  ہندوستان کے حق میں ہے، جس نے اپنے گزشتہ پانچ ٹی۲۰؍ میچوں میں سے چار جیتے ہیں، جن میں سیریز کا پہلا مقابلہ بھی شامل ہے۔ دوسری جانب نیوزی لینڈ نے اپنے آخری پانچ ٹی۲۰؍ میچوں میں تین فتوحات اور دو شکستیں درج کی ہیں۔

یہ بھی پڑھئے:انڈیگو کا منافع۷۷؍فیصدکم ہوا، پرواز تنازع سے کمپنی کی صورتحال خراب

رائے پور کی پچ بلے بازوں اور گیند بازوں دونوں کے لیے متوازن مقابلہ فراہم کرتی ہے، تاہم ہدف کا تعاقب یہاں ہمیشہ مشکل ثابت ہوا ہے۔ میدان کی بڑی باؤنڈریز (۷۵ سے ۸۰؍ میٹر) بڑے شاٹس کھیلنے کو مشکل بناتی ہیں، جبکہ اسپنرز کے اہم کردار ادا کرنے کا امکان ہے۔

یہ بھی پڑھئے؛:بنگلہ دیش کا ہندوستان میں ٹی ۲۰؍ ورلڈ کپ کھیلنے سے انکار، ہائبرڈ ماڈل کی تجویز

رات کے مقابلے میں اوس پڑنے کی توقع کے باعث دوسری اننگز میں بیٹنگ قدرے آسان ہو سکتی ہے۔ جمعہ کو موسم دھوپ والا رہنے، ہلکی ہوائیں چلنے اور درجہ حرارت تقریباً ۲۸؍ ڈگری سیلسیس رہنے کی پیش گوئی ہے، جو کرکٹ کے لیے تقریباً مثالی حالات سمجھے جاتے ہیں۔ ٹاس کے حوالے سے اندازہ ہے کہ پہلے بلے بازی کرنے والی ٹیم کو فائدہ ہوگا، کیونکہ اس مقام پر گزشتہ مقابلوں میں اسکور بنانے والی ٹیم زیادہ کامیاب رہی ہے۔  ہندوستان کی مضبوط بیٹنگ، معیاری اسپن اٹیک اور چار اعلیٰ درجے کے گیند بازوں کا امتزاج اسے رائے پور میں واضح برتری فراہم کرتا ہے۔