ڈی سی اسٹوڈیوز نے اپنے نئے پروجیکٹ Clayface کا پہلا ٹیزر جاری کر دیا ہے، جس میں کردار کو ایک خوفناک اور منفرد انداز میں پیش کیا گیا ہے۔ یہ فلم ۲۳؍ اکتوبر ۲۰۲۶ء کو ریلیز ہوگی اور پہلے ہی مداحوں میں زبردست جوش پیدا کر چکی ہے۔

ڈی سی اسٹوڈیوز نے لاس ویگاس میں ہونے والے سنیما کون کے بعد اپنے نئے سپر ویلن پراجیکٹ Clayface کا ٹیزر جاری کر کے شائقین کو حیران کر دیا ہے۔ ٹیزر میں ہالی ووڈ کے ایک ابھرتے اداکار میٹ ہیگن کی کہانی دکھائی گئی ہے، جو ایک گینگسٹر کے حملے کے بعد بری طرح مسخ ہو جاتا ہے۔ اپنی کھوئی ہوئی شناخت اور کریئر کو واپس حاصل کرنے کے لیے وہ ایک خطرناک تجرباتی سرجری کرواتا ہے، جو اسے ایک خوفناک مخلوق ’’کلے فیس‘‘ میں تبدیل کر دیتی ہے۔

یہ کردار مٹی سے بنا ایک شیپ شفٹر ہے جو اپنی مرضی سے کسی بھی شکل میں تبدیل ہو سکتا ہے۔ ٹیزر کے ایک نمایاں منظر میں وہ اپنے بازو کو ایک دیوہیکل ہتھیار میں بدل کر حملہ کرتا نظر آتا ہے، جبکہ دوسرے مناظر میں اس کا زخمی، پٹیوں میں لپٹا چہرہ اس کے ماضی کی جھلک دکھاتا ہے۔ ہدایت کار جیمس واٹکنس اور اسکرین رائٹرز مائیک فلینگن اور حسین امینی کی ٹیم اس فلم کو ایک ’’باڈی ہارر‘‘ اسٹائل میں پیش کر رہی ہے، جو روایتی سپر ہیرو فلموں سے ہٹ کر ہے۔ کاسٹ میں ٹام ریز ہیرس مرکزی کردار میٹ ہیگن کے طور پر جلوہ گر ہوں گے، جبکہ نومی ایکی، ڈیوڈ ڈینک، میکس منگھیلا اور ایڈی مرسان بھی اہم کردار ادا کر رہے ہیں۔ یہ فلم وارنر بروز پکچرس کے تحت ۲۳؍ اکتوبر ۲۰۲۶ء کو ریلیز ہوگی اور ڈی سی یونیورس کے نئے باب ’’گاڈز اینڈ مونسٹرز‘‘ کا حصہ ہوگی۔ 

ٹیزر کے بعد سوشل میڈیا پر زبردست ردعمل دیکھنے میں آیا۔ ایک صارف نے لکھا کہ ’’اس کے بعد ٹریلر کی ضرورت ہی نہیں، موڈ اور خوف پہلے ہی دل جیت چکا ہے!‘‘ دوسرے نے کہا: ’’Clayface کا باڈی ہارر اسٹائل جینیئس ہے، یہ ڈی سی کی بہترین فلم ہو سکتی ہے۔‘‘ ایک اور تبصرہ تھا کہ ’’خوشی ہے کہ وہ مکمل شیپ شفٹر مونسٹر دکھا رہے ہیں، نہ کہ صرف ایک عام ویلن۔‘‘

یہ بھی پڑھئے: اب چھوٹے بجٹ کی فلموں پر توجہ نہیں دی جارہی ہے: وویک داس چودھری

کلے فیس، بیٹ مین کے نمایاں دشمنوں میں شمار ہوتا ہے، لیکن بعض کہانیوں میں اسے ایک پیچیدہ اور ہمدرد کردار کے طور پر بھی دکھایا گیا ہے۔ ماضی میں اس کردار کو اینی میٹڈ اور ٹی وی سیریز میں رون پرلمین اور ایلن ٹوڈیک نے آواز دی، جبکہ لائیو ایکشن میں مختلف اداکار اسے نبھا چکے ہیں۔