منوج باجپئی ان دنوں اپنی فلم’ ’گھوس خور پنڈت‘‘ کے عنوان پر تنازع کی وجہ سے خبروں میں ہیں۔ اسی دوران خبر آئی ہے کہ وہ سدھیر مشرا کی ہدایت کاری میں بننے والی ایک نئی فلم میں مہاتما گاندھی کا کردار ادا کر سکتے ہیں۔ فلم ساز نے تصدیق کی ہے کہ پروجیکٹ منصوبہ بندی کے مرحلے میں ہے اور شوٹنگ ستمبر کے آس پاس شروع ہو سکتی ہے۔

بالی ووڈ اداکار منوج باجپئی ان دنوں دو مختلف وجوہات کی بنا پر سرخیوں میں ہیں۔ ایک طرف ان کی نیٹ فلکس فلم ’’گھوس خور پنڈت‘‘ کے عنوان پر تنازع جاری ہے، تو دوسری جانب خبر آئی ہے کہ وہ ہدایت کار سدھیر مشرا کی آئندہ بلا عنوان فلم میں مہاتما گاندھی کا کردار ادا کر سکتے ہیں۔ سدھیر مشرا نے اپنے ایکس اکاؤنٹ پر اس خبر کی تصدیق کرتے ہوئے لکھا کہ منصوبہ تقریباً تیار ہے اور امید ہے کہ سب کچھ طے پا جائے گا۔ انہوں نے اشارہ دیا کہ فلم کی شوٹنگ کولکاتا میں ہو سکتی ہے اور اس سال ستمبر کے آس پاس اس کا آغاز متوقع ہے۔ تاہم، دیگر تفصیلات ابھی سامنے نہیں آئیں۔ دوسری جانب، منوج باجپئی کی فلم ’’گھوس خور پنڈت‘‘ اپنے عنوان کی وجہ سے تنازع میں گھر گئی ہے۔ فلم کے نام کے اعلان کے بعد سوشل میڈیا پر شدید ردعمل سامنے آیا۔ ناقدین کا کہنا ہے کہ لفظ ’’پنڈت‘‘ عام طور پر برہمن برادری سے منسوب کیا جاتا ہے اور اسے منفی انداز میں استعمال کرنا قابلِ اعتراض ہے۔

یہ بھی پڑھئے: عامر خان فرحان اختر اور رنویر سنگھ کے درمیان ثالثی کا کرداراداکریں گے

اسی تناظر میں فیڈریشن آف ویسٹرن انڈیا سنی امپلائیز (ایف ڈبلیو آئی سی ای) نے فلم پر پابندی کا مطالبہ کیا تھا۔ متعدد ایف آئی آرز اور سوشل میڈیا دباؤ کے بعد فلم سازوں نے دہلی ہائی کورٹ کو مطلع کیا کہ وہ فلم کا نام تبدیل کرنے کا فیصلہ کر چکے ہیں۔ اس تنازع پر ردعمل ظاہر کرتے ہوئے منوج باجپئی نے سوشل میڈیا پر ایک بیان جاری کیا۔ انہوں نے کہا کہ جب کوئی چیز لوگوں کو تکلیف پہنچاتی ہے تو سننا ضروری ہو جاتا ہے۔ ان کے مطابق، انہوں نے یہ پروجیکٹ کردار کی گہرائی کو دیکھتے ہوئے قبول کیا تھا اور اس کا مقصد کسی برادری پر تبصرہ کرنا نہیں تھا۔ انہوں نے یہ بھی بتایا کہ عوامی جذبات کے احترام میں فلم کا تشہیری مواد ہٹا دیا گیا ہے۔ اسی دوران سدھیر مشرا نے ایک اور دلچسپ اپ ڈیٹ شیئر کیا ہے۔ انہوں نے ایکس پر اعلان کیا کہ وہ معروف فلم ساز شیکھر کپور کے ساتھ’ ’معصوم ۲‘‘ پر کام کر رہے ہیں۔ سدھیر نے شیکھر کپور کی کہانی سنانے کی صلاحیت کو سراہتے ہوئے کہا کہ یہ ایک دل کو چھو لینے والی داستان ہے جو ناظرین کے دل میں خوشگوار درد چھوڑ دے گی۔

یہ بھی پڑھئے: ’’تمباڑ ۲‘‘ میں طاقتور منفی کردار کی تلاش، اکشے کھنہ اور نوازا لدین کے نام زیرغور

شیکھر کپور اس سے قبل ’’مسٹر انڈیا‘‘، ’’بینڈٹ کوئین‘‘ اور ’’ایلزبتھ‘‘ جیسی یادگار فلموں کی ہدایت کاری کر چکے ہیں۔ ان کا آخری پروجیکٹ برطانوی رومانوی کامیڈی ’’وہاٹس لو گوٹ ٹو ڈو وِد اِٹ‘‘ تھا، جو ۲۰۲۲ء میں ریلیز ہوئی تھی۔ منوج باجپئی کے لیے آنے والے مہینے خاصے اہم ثابت ہو سکتے ہیں۔ ایک جانب وہ تنازع کے بعد اپنی فلم کے نام کی تبدیلی کے مرحلے سے گزر رہے ہیں، تو دوسری جانب اگر گاندھی کا کردار حقیقت بن جاتا ہے تو یہ ان کے کریئر کا ایک بڑا سنگ میل ہوگا۔