’’مائیکل‘‘ جس کی ہدایت کاری انتوین فوکا نے کی اور جس میں جعفر جیکسن نے اپنے چچا مائیکل جیکسن کا کردار ادا کیا، منفی ریویوز کے باوجود باکس آفس پر شاندار آغاز کرہی ہے۔ ہندوستان میں پیڈ پریویو سے فلم نے ۷ء۱؍ کروڑ روپے کمائے۔ دوسری جانب، اکشے کمار کی ’’بھوت بنگلہ‘‘ ۱۰۰؍ کروڑ کلب کے قریب میں شامل ہونے والی ہے۔

ہالی ووڈ کی بڑی بایوپک ’’مائیکل‘‘ دنیا بھر کے سنیما گھروں میں ریلیز ہو چکی ہے۔ انتوین فوکا کی ہدایت کاری میں بننے والی اس فلم میں جعفر جیکسن نے اپنے چچا مائیکل جیکسن کا کردار ادا کیا ہے۔ اگرچہ فلم کو ناقدین کی جانب سے خاصی تنقید کا سامنا کرنا پڑا، لیکن ناظرین کا ردعمل اس کے بالکل برعکس رہا ہے۔ ہندوستان میں ۲۳؍ اپریل کو پیڈ پریویو سے فلم نے تقریباً ۷ء۱؍ کروڑ روپے کمائے، جو کہ ایک مضبوط آغاز مانا جا رہا ہے۔
ٹریڈ رپورٹس کے مطابق ’’مائیکل‘‘ اپنے پہلے دن ۵؍ سے ۶؍ کروڑ روپے تک کما سکتی ہے، جبکہ اس کا اوپننگ ویک اینڈ ۲۰؍ کروڑ روپے سے تجاوز کر سکتا ہے۔ عالمی سطح پر فلم کے ۱۵۰؍ ملین ڈالر سے زیادہ کمائی کرنے کی توقع ہے، جبکہ امریکہ میں یہ بڑی بایوپکس کے ریکارڈ کو بھی چیلنج کر سکتی ہے، جس میں ’’اوپن ہائمر‘‘ شامل ہے۔ یہ کامیابی اس بات کی نشاندہی کرتی ہے کہ بڑے میوزیکل آئیکونز پر مبنی فلمیں، چاہے ریویوز کمزور ہوں، پھر بھی بڑے پیمانے پر ناظرین کو متوجہ کرنے کی صلاحیت رکھتی ہیں۔

یہ بھی پڑھئے:اکشے کمار گھریلو خواتین کو ’گھر کا سپر اسٹار‘ مانتے ہیں، ان کی زندگی پر فلم بنانے کا ارادہ

دوسری جانب بالی ووڈ میں ’’بھوت بنگلہ‘‘ مسلسل مضبوط کارکردگی دکھا رہی ہے۔ اکشے کمار اور ہدایتکار پریہ درشن کے اس پروجیکٹ نے پہلے ہفتے میں تقریباً ۸۰؍ سے ۹۵؍ کروڑ روپے کے درمیان بزنس کیا ہے، جبکہ یہ جلد ہی ۱۰۰؍ کروڑ کے کلب میں شامل ہونے کی طرف بڑھ رہی ہے۔ تجزیہ کاروں کے مطابق، فلم کی مجموعی کمائی ۱۳۰؍ سے ۱۵۰؍ کروڑ روپے کے درمیان رہ سکتی ہے، جبکہ عالمی سطح پر یہ ۲۰۰؍  کروڑ روپے تک پہنچ سکتی ہے۔

یہ بھی پڑھئے:آر ایس ایس کو راہل گاندھی نے ’’راشٹریہ سرینڈر سَنگھ‘‘ قرار دیا

دلچسپ بات یہ ہے کہ دونوں فلموں کے پاس یکم مئی تک نسبتاً کھلا میدان ہے، جس کے بعد باکس آفس پر مقابلہ سخت ہو جائے گا۔ اس تاریخ کو ’’راجہ شیواجی‘‘ اور ’’ایک دن‘‘ جیسی بڑی فلمیں ریلیز ہونے جا رہی ہیں، جو بزنس کو متاثر کر سکتی ہیں۔ موجودہ رجحانات سے ظاہر ہوتا ہے کہ جہاں ایک طرف ہالی ووڈ بایوپکس عالمی سطح پر اپنا اثر برقرار رکھے ہوئے ہیں، وہیں بالی ووڈ کی مقامی تفریحی فلمیں بھی باکس آفس پر مضبوطی سے کھڑی ہیں۔