ممبئی پولیس نے مشہور اداکار کمال راشد خان (کے آر کے) کو اوشیوارہ کی ایک سوسائٹی میں فائرنگ کے معاملے میں گرفتار کیا ہے۔ تفتیش میں انہوں نے اپنے لائسنس یافتہ اسلحے سے دو گولیاں چلانے کا اعتراف کیا، پولیس نے اسلحہ ضبط کر لیا ہے۔مزید تفتیش جاری ہے۔

ممبئی پولیس نے آج معروف اداکار اور سوشل میڈیا پر متنازع تبصروں کے لیے مشہور کمال راشد خان (کے آر کے) کو اوشیوارہ میں فائرنگ معاملے میں گرفتار کیا ہے۔ پولیس کے مطابق انہوں نے اپنے لائسنس یافتہ بندوق سے دو گولیاں چلانے کا اعتراف بھی کیا ہے، ان کا دعویٰ ہے کہ بندوق کی صفائی کے دوران گولیاں چلی ہیں۔ اس کے بعد پولیس نے اسلحہ ضبط کر لیا ہے۔ پولیس نے بتایا کہ یہ واقعہ ۱۸؍ جنوری ۲۰۲۶ء کو نالندہ سوسائٹی میں پیش آیا، جو اوشیوارہ میں واقع ہے۔ بندوق سے ۴؍ راؤنڈ فائر ہوئے تھے جن میں سے دو کے نشانات سوسائٹی کی عمارت میں پائے گئے، ایک دوسری منزل پر اور دوسری چوتھی منزل کے قریب۔ ان فلیٹس میں سے ایک فلم رائٹر اور ہدایتکار کا ہے جبکہ دوسرا ایک ماڈل کا ہے۔

یہ بھی پڑھئے: سبھاش گھئی نے ہندی فلم انڈسٹری کو کئی شاندار فلمیں دی ہیں

ابتدائی تفتیش میں سی سی ٹی وی فوٹیج سے کچھ واضح سراغ نہیں مل سکا، جس کے باعث پولیس کو ابتدا میں مسائل درپیش تھے، تاہم فورینسک ٹیم کے جائزے کے بعد اس بات کا انکشاف ہوا کہ ممکنہ طور پر گولیاں کے آر کے کے قریب واقع بنگلے سے چلائی گئی تھیں۔ پولیس نے اسی بنیاد پر انہیں پوچھ گچھ کیلئے بلایا اور حراست میں لیا۔ پولیس کے ایک اہلکار نے بتایا کہ کے آر کے نے ابتدائی طور پر اپنے بیان میں اعتراف کیا کہ انہوں نے اپنے لائسنس یافتہ اسلحے کے ساتھ یہ فائرنگ کی تھی۔ پولیس نے اسلحہ ضبط کر لیا ہے اور مزید عدالتی کارروائی کے لیے مختلف دفعات کے تحت ایک کیس درج کیا ہے۔ مزید قانونی کارروائی کے ساتھ ساتھ ہتھیار رکھنے اور استعمال کرنے والی شقوں کے تحت ان کے خلاف سخت کارروائی کی جا رہی ہے۔

یہ بھی پڑھئے: ول اسمتھ نے شاہ رخ خان کے ساتھ فلم کرنے کی خواہش ظاہر کی

حکام نے بتایا ہے کہ گولیوں کے اصل مقصد اور پسِ منظر کو معلوم کرنے کے لیے تحقیقات جاری ہیں، اور ابھی تک یہ واضح نہیں ہوا کہ فائرنگ کا کوئی مقصد تھا یا کوئی حادثہ تھا۔فائرنگ کی وجہ معلوم کرنے کے لیے پولیس ثبوت اکٹھے کر رہی ہے، فلیٹ کے مکینوں سے بیان درج کروا رہی ہے اور متعلقہ سی سی ٹی وی فوٹیج دوبارہ جانچ رہی ہے۔ خیال رہے کہ یہ کیس اس لیے بھی توجہ کا مرکز ہے کیونکہ کے آر کے نہ صرف فلمی اداکار ہیں بلکہ وہ سوشل میڈیا تبصروں کی وجہ سے بھی جانے جاتے ہیں، جس سے ان کی شخصیت عوامی اور میڈیا کی نظروں میں رہی ہے۔ اس پیش رفت نے فلمی صنعت اور عوامی حلقوں میں ملا جلا ردِ عمل پیدا کیا ہے جبکہ پولیس نے کہا ہے کہ کسی بھی قانونی شک کی صورت میں سخت کارروائی کی جائے گی۔