ہندوستانی سنیما کے معروف اداکار پنکج ترپاٹھی کو انڈین فلم فیسٹیول آف میلبورن (آئی ایف ایف ایم) ۲۰۲۶ء میں باوقار ’’آرٹسٹ آف ڈسٹنکشن‘‘ اعزاز سے نوازا جائے گا۔

 ہندوستانی سنیما کے معروف اداکار پنکج ترپاٹھی کو انڈین فلم فیسٹیول آف میلبورن (آئی ایف ایف ایم)  ۲۰۲۶ء میں باوقار ’’آرٹسٹ آف ڈسٹنکشن‘‘ اعزاز سے نوازا جائے گا۔ یہ اعزاز ہندوستانی سنیما میں ان کی نمایاں خدمات اور ایک فنکار کے طور پر ان کے متاثر کن سفر کے اعتراف میں دیا جا رہا ہے۔

یہ بھی پڑھئے:ٹڈی پوگاچار نے ٹور ڈی فرانس کا اعزاز اپنے نام کر لیا

قومی ایوارڈ یافتہ پنکج ترپاٹھی پہلی مرتبہ اس باوقار فلمی میلے میں شرکت کریں گے اور آسٹریلیا کے شہر میلبورن میں منعقد ہونے والی تقریب میں خود یہ اعزاز وصول کریں گے۔ فلمی میلے کا انعقاد ۱۳؍ سے ۲۳؍ اگست ۲۰۲۶ء تک ہوگا  جبکہ انہیں ۱۳؍ اگست کو میلبورن کے پیلس تھیٹر میں اس اعزاز سے نوازا جائے گا۔
اس اعزاز کے اعلان پر پنکج ترپاٹھی نے کہا کہ آئی ایف ایف ایم میں ’’آرٹسٹ آف ڈسٹنکشن‘‘ اعزاز حاصل کرنا ان کے لیے باعثِ فخر اور انتہائی عاجزی کا لمحہ ہے۔ انہوں نے کہا کہ کہانیوں میں سرحدوں سے بالاتر ہو کر لوگوں کو جوڑنے کی غیر معمولی طاقت ہوتی ہے، اور ایسے باوقار بین الاقوامی پلیٹ فارم پر ان کے سفر کا اعتراف کیا جانا ان کے لیے نہایت جذباتی لمحہ ہے۔

یہ بھی پڑھئے:’’انڈین آئیڈل۱۶‘‘ کی فاتح جیوتیرمئی نائک عالیہ بھٹ اور دپیکا پڈوکون کیلئے گانا چاہتی ہیں

آئی ایف ایف ایم کی بانی اور فیسٹیول ڈائریکٹر میتو بھومک لانگے نے کہا کہ پنکج ترپاٹھی اپنی نسل کے بہترین اداکاروں میں شمار ہوتے ہیں۔ ان کے مطابق ہر کردار میں سچائی، حساسیت اور گہرائی پیدا کرنے کی ان کی صلاحیت نے انہیں ہندستانی سنیما کے انتہائی باوقار فنکاروں کی صف میں لا کھڑا کیا ہے۔