’’رامائن‘‘ دیوالی ۲۰۲۶ء پر ریلیز کے لیے تیار ہے اور عالمی سطح پر ’’گوڈزیلا مائنس زیرو‘‘ سے ممکنہ تصادم کی خبریں سامنے آ رہی ہیں۔ دونوں فلمیں آئی میکس اسکرینز کے لیے مقابلہ کر سکتی ہیں، جس سے بین الاقوامی باکس آفس پر دلچسپ صورتحال پیدا ہو گئی ہے۔

بالی ووڈ کی بڑے بجٹ کی فلم ’’رامائن‘‘ پارٹ ون، جس میں رنبیر کپور مرکزی کردار ادا کر رہے ہیں، ۲۰۲۶ء کی سب سے زیادہ متوقع ریلیزز میں شامل ہے۔ یہ فلم دیوالی کے موقع پر ۴؍ سے ۶؍ نومبر کے درمیان سنیما گھروں میں پیش کی جائے گی۔ میکرز نے حکمت عملی کے تحت اسے بڑے گھریلو تصادم سے بچاتے ہوئے ریلیز کرنے کا فیصلہ کیا ہے تاکہ ہندوستانی باکس آفس پر زیادہ سے زیادہ فائدہ اٹھایا جا سکے۔ تاہم، عالمی سطح پر صورتحال مختلف ہو سکتی ہے۔ اسی دوران ’’گوڈزیلا مائنس زیرو‘‘ بھی ۶؍ نومبر ۲۰۲۶ء کو ریلیز کے لیے تیار ہے، جس کے باعث دونوں فلموں کے درمیان بین الاقوامی مارکیٹس میں براہ راست مقابلے کے امکانات بڑھ گئے ہیں۔ خاص طور پر آئی میکس اور دیگر پریمیم فارمیٹس میں اسکرینز کی تقسیم ایک اہم مسئلہ بن سکتی ہے، کیونکہ دونوں ہی فلمیں وی ایف ایکس پر مبنی ہیں۔

یہ بھی پڑھئے: پرشانت نیل کی ’’ڈریگن‘‘ میں شاہد کپور، جونیئر این ٹی آر کے مقابل ویلن کا کردار ادا کریں گے

ہدایتکار نتیش تیواری کی ’’رامائن‘‘ میں یش، سائی پلوی اور سنی دیول بھی اہم کردار ادا کر رہے ہیں۔ فلم کو دو حصوں میں تقسیم کیا گیا ہے، جس کا دوسرا حصہ دیوالی ۲۰۲۷ء پر ریلیز ہوگا۔ دوسری جانب، گوڈزیلا فرنچائز پہلے ہی عالمی سطح پر اربوں ڈالر کمانے والی سیریز بن چکی ہے، اور اس کی نئی فلم کو بھی بین الاقوامی مارکیٹس میں زبردست رسپانس کی توقع ہے۔ یہی وجہ ہے کہ دونوں فلموں کے درمیان مقابلہ صرف ریلیز ڈیٹس تک محدود نہیں بلکہ اسکرین شیئر، آئی میکس سلاٹس اور عالمی توجہ کے لیے بھی ہوگا۔

یہ بھی پڑھئے: سلمان خان کی فلم ’’ماتر بھومی‘‘ براہِ راست او ٹی ٹی پر ریلیز ہوگی؟

سوشل میڈیا پر اس ممکنہ تصادم نے شائقین کو دو حصوں میں تقسیم کر دیا ہے۔ کچھ صارفین کا ماننا ہے کہ ہندوستانی مارکیٹ میں ’’رامائن‘‘ کو واضح برتری حاصل ہوگی۔ ایک صارف نے لکھا کہ ’’ہندوستان میں کوئی مقابلہ نہیں ہے، رامائن کو ۹۹؍ فیصد اسکرینز ملیں گی… مثبت بز اور ہائپ کے ساتھ سب ٹھیک رہے گا۔‘‘ جبکہ دیگر صارفین نے عالمی مارکیٹ کو مدنظر رکھتے ہوئے گوڈزیلا کے حق میں رائے دی۔ ایک تبصرے میں کہا گیا کہ ’’گوڈزیلا‘‘ پہلے ہی ایک بلین ڈالر فرنچائز ہے… رامائن کے میکرز کو اپنی ریلیز حکمت عملی پر دوبارہ غور کرنا چاہیے۔‘‘ کچھ شائقین نے متبادل تجاویز بھی پیش کیں، جیسے کہ فلم کو ایک ہفتہ پہلے ریلیز کرنے کی تجویز تاکہ دیوالی کے رش سے پہلے بہتر بز حاصل کیا جا سکے۔ ایک صارف نے لکھا کہ ’’اگر رامائن کو ایک ہفتہ پہلے ریلیز کیا جائے تو اسے زبردست فائدہ ہوگا کیونکہ دیوالی کے دن لوگ مصروف ہوتے ہیں۔‘‘
تجزیہ کاروں کے مطابق، اگرچہ ہندوستانی باکس آفس پر ’’رامائن‘‘ کو مضبوط پوزیشن حاصل ہوگی، لیکن بین الاقوامی مارکیٹس میں مقابلہ سخت رہنے کا امکان ہے، خاص طور پر وہاں جہاں ہالی ووڈ فرنچائزز کا غلبہ زیادہ ہے۔ یہ ممکنہ تصادم نہ صرف دو بڑی فلموں کے درمیان مقابلہ ہوگا بلکہ یہ اس بات کا بھی امتحان ہوگا کہ آیا ایک ہندوستانی اساطیری فلم عالمی سطح پر ایک بڑے ہالی ووڈ مونسٹر فرنچائز کا مقابلہ کر سکتی ہے یا نہیں۔