۸؍ اقساط کی غیر افسانوی سیریز ۲۵؍ ستمبر سے ’فل اسٹاپ‘ پر؛ اداکارہ نے میزبانی، تحریر اور پروڈیوسنگ کی ذمہ داری سنبھالی، ممبئی کی تاریخ، ثقافت اور پوشیدہ پہلوؤں کو تلاش کریں گی۔

اداکارہ اور پروڈیوسر رِچا چڈھا اب اداکاری کے ساتھ ممبئی کی تاریخ، ثقافت، لوگوں اور ان کہی کہانیوں کی تلاش کرتی نظر آئیں گی۔ ان کی پہلی غیر افسانوی سیریز ’مسافری‘ کا پہلا ایپی سوڈ ۲۵؍ ستمبر ۲۰۲۶ء کو ’فل اسٹاپ‘ نامی یوٹیوب چینل پر جاری ہوگا، جس کے بعد ہر جمعہ کو ایک نئی قسط پیش کی جائے گی۔ ۸؍ اقساط پر مشتمل یہ سیریز رِچا چڈھا کی یوٹیوب دنیا میں پہلی باقاعدہ پیش قدمی بھی ہے۔’مسافری‘ کی میزبانی کے ساتھ رِچا چڈھا نے اس کی تحریر اور پروڈیوسنگ بھی کی ہے۔ سیریز کا پہلا سیزن مکمل طور پر ممبئی کے لئے مخصوص ہے، مگر اس میں شہر کے معروف سیاحتی مقامات یا روایتی قصوں تک محدود رہنے کے بجائے ان گوشوں، تاریخوں، کرداروں اور مقامات کو تلاش کیا جائے گا جو عام طور پر نگاہوں سے اوجھل رہتے ہیں۔

یہ بھی پڑھئے: اجمیر میں شاہ رخ خان کے ۵۰۰۰؍ روپے گم ہوئے، فقیر نے ۵۰۰؍ کروڑ کی پیش گوئی کی تھی

ہر قسط میں رِچا مقامی باشندوں، تاریخ دانوں، ثقافتی شعبے سے وابستہ افراد اور دیگر ماہرین سے گفتگو کریں گی۔ اس طرح سیریز ممبئی کو محض ایک شہر کے طور پر نہیں بلکہ اس کے لوگوں، ماضی، روایت اور بدلتی ہوئی زندگی کے ذریعے سمجھنے کی کوشش کرے گی۔ سیریز کا مرکزی خیال ’’لوگ، جگہیں اور محبت‘‘ کے گرد گھومتا ہے۔ رِچا کے مطابق ’مسافری‘ کا خیال ان کی ماں بننے کے تجربے کے بعد پیدا ہوا۔ انہوں نے کہا، ’’ماں بننے کے بعد دنیا کو دیکھنے کا میرا انداز بدل گیا۔ اس سے انسان دوبارہ متجسس ہوجاتا ہے، وہ ان چیزوں پر سوال اٹھانے لگتا ہے جنہیں پہلے معمول سمجھتا تھا اور جانی پہچانی چیزوں کو ایک نئی حیرت کے ساتھ دیکھنے لگتا ہے۔‘‘

یہ بھی پڑھئے: موسیقی میں شاہ رخ، غصے میں سلمان خان جیسا ہوں: امال ملک کا ٹرولز کو سخت انتباہ

اداکارہ نے بتایا کہ اسی دوران ان کے ذہن میں ممبئی سے متعلق کئی سوالات اٹھنے لگے۔ ان کے بقول، ’’میں برسوں سے جس شہر میں رہ رہی ہوں، کیا میں واقعی اسے جانتی ہوں؟ میں اس شہر کے بارے میں حقیقت میں کتنا جانتی ہوں؟ اور ایک سوال مسلسل میرے ساتھ رہا کہ جس شہر نے مجھے اتنا کچھ دیا، بدلے میں میری اس کے لئے کیا ذمہ داری ہے؟‘‘رِچا کا تعلیمی پس منظر بھی اس منصوبے سے براہ راست جڑا ہوا ہے۔ انہوں نے سینٹ اسٹیفن کالج سے تاریخ میں آنرز کیا ہے اور ان کا کہنا ہے کہ وہ شروع سے تاریخ، فن، ثقافت اور لوگوں میں دلچسپی رکھتی رہی ہیں۔ ان کے مطابق، ’’مسافری میرے اسی تجسس کا قدرتی تسلسل ہے۔ یہ اس شہر میں نئے انداز سے سفر کرنے کی میری کوشش ہے جس کے بارے میں مجھے لگتا تھا کہ میں اسے جانتی ہوں۔‘‘
’مسافری‘ رِچا چڈھا اور علی فضل کے پروڈکشن ادارے پشنگ بٹن اسٹوڈیوز کی دوسری پیش کش ہے۔ اس سے قبل دونوں کے ادارے نے فلم ’گرلز وِل بی گرلز‘ بنائی تھی، جسے سن ڈانس فلم فیسٹیول میں اہم اعزازات ملے۔ رِچا کو بھی اس فلم کے لئے لاس اینجلس میں جان کیسویٹس پرائز سے نوازا گیا تھا۔ نئی سیریز کے ساتھ یہ پروڈکشن ادارہ افسانوی فلموں سے آگے بڑھ کر غیر افسانوی مواد کے میدان میں بھی داخل ہورہا ہے۔ ’مسافری‘ کے لئے جاری کیے گئے ٹریلر میں رِچا کو ممبئی کے مختلف پہلوؤں کے بارے میں سوال کرتے، مقامی لوگوں سے بات کرتے اور شہر کے کم معروف حصوں کو دریافت کرتے دیکھا جاسکتا ہے۔ ’مسافری‘ کی پہلی قسط ۲۵؍ ستمبر کو ’فل اسٹاپ‘ یوٹیوب چینل پر آئے گی اور اس کے بعد ہر جمعہ نئی قسط جاری ہوگی۔