بالی ووڈ سپر اسٹار سلمان خان کی انتہائی متوقع فلم ’’ماتر بھومی‘‘ کی ریلیز ایک بار پھر غیر یقینی صورتحال سے دوچار ہو گئی ہے۔ ۲۰۲۰ء کے گلوان وادی تنازع سے متاثر اس فلم کو ابتدا میں ’’بیٹل آف گلوان‘‘ کے نام سے متعارف کرایا گیا تھا، تاہم بعد میں اس کا نام تبدیل کر دیا گیا۔ اطلاعات کے مطابق وزارتِ دفاع کی جانب سے فلم کے بعض مناظر اور چین سے متعلق حوالوں پر تحفظات کے باعث منصوبہ تاخیر کا شکار ہے، جبکہ اب فلم کے ۲۰۲۷ء تک مؤخر ہونے کے امکانات بھی ظاہر کیے جا رہے ہیں۔

بالی ووڈ کے سپر اسٹار سلمان خان کی جنگی ڈراما فلم ’’ماتر بھومی‘‘ کی ریلیز ایک مرتبہ پھر غیر یقینی صورتحال کا شکار ہو گئی ہے۔ اگرچہ فلم کو رواں سال سنیما گھروں میں پیش کیے جانے کی توقع تھی، تاہم تازہ اطلاعات کے مطابق مختلف انتظامی اور شیڈولنگ مسائل کے باعث اس کی نمائش میں مزید تاخیر ہو سکتی ہے۔ فلم کو ابتدا میں ’’بیٹل آف گلوان‘‘ کے نام سے پیش کیا گیا تھا، تاہم بعد میں اس کا عنوان تبدیل کر کے ’’ماتر بھومی‘‘ رکھ دیا گیا۔ فلم کی کہانی ۲۰۲۰ء میں ہندوستان اور چین کے درمیان گلوان وادی میں ہونے والے فوجی تصادم سے متاثر بتائی جاتی ہے۔ میڈیا رپورٹس کے مطابق وزارتِ دفاع نے فلم کے بعض مناظر اور چین سے متعلق حوالوں پر تحفظات کا اظہار کیا ہے۔ ذرائع کا کہنا ہے کہ دونوں ممالک کے درمیان حالیہ سفارتی تعلقات میں بہتری کے تناظر میں فلم کے کچھ حصوں پر نظرثانی کی ضرورت محسوس کی گئی، جس کے باعث منصوبہ تاخیر کا شکار ہوا۔

یہ بھی پڑھئے: ’’دھمال ۴‘‘ کا دھواں دار آغاز، پہلے ویک اینڈ میں ۹۲؍ کروڑ کی عالمی کمائی

بالی ووڈ ہنگامہ کے مطابق ایک تجارتی ذریعے نے بتایا کہ فلم ساز اب بھی ۲۰۲۶ء کے اختتام سے قبل فلم کو ریلیز کرنے کے خواہاں ہیں، تاہم موجودہ صورتحال میں اس کا ۲۰۲۷ء تک مؤخر ہونا بھی خارج از امکان نہیں۔ ذرائع کے مطابق، ’’ابھی تمام مسائل حل ہونا باقی ہیں۔ اگر یہ جلد حل بھی ہو جائیں تو سال کے باقی حصے میں موزوں ریلیز تاریخ حاصل کرنا آسان نہیں ہوگا کیونکہ زیادہ تر بڑی تاریخیں پہلے ہی دیگر فلموں کے نام ہو چکی ہیں۔‘‘ رپورٹ میں مزید کہا گیا کہ اگرچہ فلمی صنعت میں بڑی فلموں کے درمیان ریلیز کی تاریخوں کا ٹکراؤ عام بات ہے، لیکن سلمان خان اس معاملے میں مختلف رویہ رکھتے ہیں۔

ذرائع نے بتایا کہ ’’سلمان خان ہمیشہ منصفانہ طرزِ عمل اختیار کرتے ہیں۔ اگر کسی اور فلم نے پہلے سے کسی تاریخ کا اعلان کیا ہو تو وہ اس سے تصادم سے گریز کرتے ہیں اور اپنی ریلیز سے پہلے متعلقہ فلم سازوں کو اعتماد میں لیتے ہیں۔‘‘ رپورٹ کے مطابق اگر فلم کو بروقت منظوری مل جاتی ہے تو دسہرہ کا تہوار اس کے لیے ایک موزوں ریلیز ونڈو ثابت ہو سکتا ہے۔ انڈسٹری کے ایک ذریعے نے کہا کہ ’’اس سال دسہرہ ۲۰؍ اکتوبر کو ہے، جبکہ اس سے ایک روز قبل بھی تعطیلات کی وجہ سے سنیما گھروں میں غیرمعمولی رش دیکھنے میں آتا ہے۔ اس طرح ’’ماتر بھومی‘‘ کو پانچ روزہ طویل ویک اینڈ کا فائدہ مل سکتا ہے۔‘‘

یہ بھی پڑھئے: اگر دپیکا چاہیں تو میرا کردار ادا کر سکتی ہیں: ہیما مالنی

ذرائع کے مطابق ۳۰؍ اکتوبر کو متوقع فلم ’’رامائن‘‘ کی ریلیز سے قبل اگر ’’ماتر بھومی‘‘ نمائش کے لیے آ جاتی ہے تو اسے اچھا کاروباری موقع مل سکتا ہے، کیونکہ اس کے بعد نومبر کے آخری ہفتے تک کسی بڑی ہندی فلم کی ریلیز متوقع نہیں۔ تاہم اگر زیرِ التوا معاملات جلد حل نہ ہوئے تو فلم کی ریلیز آئندہ سال تک منتقل کی جا سکتی ہے۔ رپورٹس کے مطابق ایسی صورت میں سلمان خان ۲۰۲۷ء میں دو بڑی فلموں کے ساتھ سنیما گھروں میں نظر آ سکتے ہیں۔ ان میں ایک فلم معروف ہدایت کار وامشی پیڈیپلی کی ہے، جس کا عنوان ابھی سامنے نہیں آیا اور جس میں نین تارہ بھی اہم کردار ادا کر رہی ہیں۔ اس کے علاوہ سلمان خان ہدایت کار جوڑی راج اینڈ ڈی کے کی ایک سپر ہیرو فلم پر بھی کام کر رہے ہیں، جس کے عنوان اور ریلیز سے متعلق تفصیلات کا ابھی باضابطہ اعلان نہیں کیا گیا۔