بالی ووڈ اسٹار سلمان خان مبینہ طور پر فلم ساز جوڑی راج ندی مورو اور کرشنا ڈی کے کے ساتھ ایک منفرد سپر ہیرو فلم کیلئے بات چیت کر رہے ہیں۔ اطلاعات کے مطابق یہ فلم ایک غیر روایتی سپر ہیرو کہانی ہوگی جس میں مزاح اور ایکشن کا امتزاج ہوگا۔ اگر منصوبہ حتمی شکل اختیار کرتا ہے تو فلم میں سلمان خان کو ایک ایسے سپر ہیرو کے طور پر دکھایا جائے گا جو دنیا کو بچانے کے مسلسل مشن سے تھک چکا ہے اور ریٹائر ہونا چاہتا ہے۔

رپورٹس کے مطابق سلمان خان گزشتہ تین ماہ سے فلم ساز جوڑی راج ندی مورو اور کرشنا ڈی کے کے ساتھ ایک نئے فلمی منصوبے پر گفتگو کر رہے ہیں۔ یہ بات چیت اب ایک دلچسپ سمت میں آگے بڑھ رہی ہے جس سے ایک غیر معمولی سپر ہیرو فلم بننے کا امکان ظاہر کیا جا رہا ہے۔ ذرائع کے مطابق اس پروجیکٹ کا تصور ایک آف بیٹ سپر ہیرو کہانی کے طور پر کیا گیا ہے۔ اس کا انداز کسی حد تک ہالی ووڈ فلم ’’ہین کوک‘‘ سے متاثر بتایا جا رہا ہے، جس میں ایک غیر روایتی اور تھکا ہوا سپر ہیرو مرکزی کردار تھا۔

یہ بھی پڑھئے: سری لیلا نہیں، کارتک آرین کی ’ناگزیلا‘ میں نئی اداکارہ کا داخلہ

ذرائع کے مطابق فلم میں سلمان خان ایک ایسے سپر ہیرو کا کردار ادا کر سکتے ہیں جو اپنی ذمہ داریوں سے تھک چکا ہے۔ ذرائع نے کہا، ’’سلمان خان کو ایک ایسے سپر ہیرو کے طور پر دیکھا جائے گا جو اپنے کیپ کو لٹکانے اور دنیا کو بچانے سے ریٹائر ہونا چاہتا ہے۔ لیکن حالات اسے سکون سے رہنے نہیں دیتے اور اسے بار بار ایکشن میں واپس آنا پڑتا ہے۔ ” اس طرح کہانی ایک ہائی کانسپٹ سپر ہیرو کامیڈی کی شکل اختیار کر سکتی ہے۔
اگرچہ سلمان خان نے اس منصوبے میں دلچسپی ظاہر کی ہے، تاہم راج اور ڈی کے ابھی اسکرین پلے کو حتمی شکل دینے میں مصروف ہیں۔ ہدایتکار جوڑی اسکرپٹ کو سلمان خان کی اسکرین امیج اور کردار کی خصوصیات کے مطابق تیار کر رہی ہے۔ ذرائع کے مطابق سلمان خان نے فلم کے بجٹ کے حوالے سے اپنی تشویش ظاہر کی ہے۔ ذرائع نے بتایا، ’’سلمان کی فکر بجٹ ہے۔ انہوں نے ہدایتکاروں سے کہا ہے کہ وہ مناسب بجٹ کے اندر فلم تیار کریں کیونکہ وہ اس وقت بہت مہنگی سپر ہیرو فلم کرنے کے موڈ میں نہیں ہیں۔‘‘

یہ بھی پڑھئے: ’’دی بیڈز آف بالی ووڈ‘‘ دیکھ کرایچ بی او آرین خان کا مداح بن گیا، سیریز بنانے کی پیشکش

رپورٹس کے مطابق اگر تمام معاملات طے پا گئے تو اس فلم کا باضابطہ اعلان اپریل ۲۰۲۶ء میں کیا جا سکتا ہے۔ ذرائع کے مطابق فلم نومبر ۲۰۲۶ء میں فلور پر جا سکتی ہے۔ کام کے محاذ پر سلمان خان فلم ’’بیٹل آف گلوان‘‘ میں نظر آئیں گے۔ یہ فلم اپوروا لاکھیہ کی ہدایتکاری میں بن رہی ہے اور اس کی ریلیز اس سال یوم آزادی کے ہفتے میں متوقع ہے۔