بالی ووڈ اداکار سلمان خان نے ’بینگ سلمان خان‘ کے نام سے اپنا آفیشل یوٹیوب چینل لانچ کردیا ہے، جسے مداحوں کی جانب سے زبردست ردِعمل ملا۔ چینل شروع ہونے کے پہلے ہی گھنٹے میں اس کے سبسکرائبرز کی تعداد ۱۴؍ ہزار سے تجاوز کرگئی۔ اداکار نے ۱۰؍ مختصر ویڈیوز کے ساتھ آغاز کیا ہے، جبکہ ان کی آنے والی فلموں میں ’ماتربھومی: مے وار ریسٹ اِن پیس‘ اور ’مونسٹر‘ شامل ہیں۔

سلمان خان نے جمعہ کے روز اپنا آفیشل یوٹیوب چینل لانچ کیا، جس کے بعد مداحوں میں جوش و خروش دیکھا گیا۔ ’بینگ سلمان خان‘ (Being Salman Khan) کے نام سے شروع کیے گئے اس چینل کا اعلان اداکار نے سوشل میڈیا پر کیا اور اپنے مداحوں کو اس نئے سفر میں شامل ہونے کی دعوت دی۔ سلمان خان نے اپنے انسٹاگرام اسٹوریز کے ذریعے چینل کا تعارف کرایا۔ انہوں نے لکھا، ’’شروع سے شروع کرتے ہیں... میرا آفیشل یوٹیوب چینل۔ اے سے زیڈ تک سب کچھ یہاں ملے گا۔‘‘ چینل کے لانچ ہوتے ہی مداحوں کی جانب سے زبردست ردِعمل سامنے آیا اور اطلاعات کے مطابق پہلے ہی گھنٹے میں اس کے سبسکرائبرز کی تعداد ۱۴؍ ہزار سے تجاوز کرگئی۔

سلمان خان نے اپنے نئے چینل پر ۱۰؍ یوٹیوب شارٹس کے ساتھ آغاز کیا ہے۔ ان ویڈیوز میں اداکار کے منفرد انداز کو ہلکے پھلکے اور مزاحیہ انداز میں پیش کیا گیا ہے۔ ویڈیوز میں سلمان خان کے دو روپ دکھائے گئے ہیں۔ ایک میں وہ اداکاری سکھانے والے کوچ کا کردار ادا کر رہے ہیں، جبکہ دوسرے میں ایک طالب علم کے طور پر اداکاری سیکھتے نظر آتے ہیں۔ چینل کی تفصیل میں سلمان خان کو ’’فلمی اداکار، فن کار، مصور اور انسانیت کی خدمت کرنے والا‘‘ قرار دیا گیا ہے۔ اس میں یہ بھی واضح کیا گیا ہے کہ یہ ان کا آفیشل اکاؤنٹ ہے۔

یوٹیوب پر سلمان خان کی آمد پر مداحوں نے بھی ردِعمل ظاہر کیا۔ ایک صارف نے لکھا، ’’دی او جی (اصل) سلمان خان۔‘‘ ایک دوسرے صارف نے کہا، ’’یوٹیوب چینل کی توقع نہیں تھی۔‘‘ تیسرے صارف نے تبصرہ کیا، ’’ماسٹرز کرنے کے بعد اب میں جسم کے اعضا کے بارے میں جاننے کی کوشش کر رہا ہوں۔‘‘ ایک اور مداح نے لکھا، ’’سلمان سر، ہمیں یہ ویڈیوز اپنے معصوم بچوں کے لیے بھی چاہئیں، تاکہ وہ مزاحیہ انداز میں سیکھ سکیں اور اس بے رحم دنیا کا سامنا کرنے کے لیے کافی معلومات حاصل کرسکیں۔‘‘

یہ بھی پڑھئے: گرودت کی فلمیں حقیقت سے قریب ہوا کرتی تھیں

واضح رہے کہ سلمان خان ان دنوں ٹی وی ریالٹی شو ’’بگ باس ۲۰‘‘ کی میزبانی کر رہے ہیں اور ان کے پاس کئی فلمی پروجیکٹس بھی ہیں۔ وہ جلد ہی فلم ’’ماتربھومی: مے وار ریسٹ اِن پیس‘‘ میں نظر آئیں گے، جس کا ابتدائی نام ’بیٹل آف گلوان‘ تھا۔ اپوروا لاکھیہ کی ہدایتکاری میں بننے والی اس فلم میں چترانگدا سنگھ بھی شامل ہیں۔ فلم سلمان خان فلمز کے بینر تلے تیار کی گئی ہے۔ اس کی ریلیز میں کئی مرتبہ تاخیر ہوچکی ہے اور اب تک حتمی تاریخ کا اعلان نہیں کیا گیا۔ اس سے قبل فلم کو اپریل ۲۰۲۶ء میں ریلیز کرنے کا منصوبہ تھا۔ اس کے علاوہ سلمان خان فلم ساز ومشی پیڈی پلی کے ساتھ بھی ایک نئے پروجیکٹ میں کام کرنے والے ہیں، جس کا نام مبینہ طور پر ’’مونسٹر‘‘ رکھا گیا ہے۔ فی الحال ’’ایس وی سی ۶۳‘‘ کے نام سے معروف اس فلم میں نین تارا بھی شامل ہیں اور اسے عید ۲۰۲۷ء کے موقع پر سنیما گھروں میں ریلیز کیے جانے کی توقع ہے۔