سمانتھا روتھ پربھو کی ایکشن ڈرامہ ’’ما انتی بنگارم‘‘ نے اپنے پہلے ہی ویک اینڈ میں باکس آفس پر متاثر کن کارکردگی کا مظاہرہ کرتے ہوئے دنیا بھر میں ۷۹ء۴۱؍ کروڑ روپے کا کاروبار کر لیا ہے۔ فلم نے بغیر کسی بڑے مرد سپر اسٹار یا بھاری بجٹ کی حمایت کے مسلسل تین دن ترقی دکھائی اور اتوار کو اپنی سب سے بڑی یومیہ کمائی درج کی۔

اداکارہ سمانتھا روتھ پربھو کی نئی تیلگو فلم ’’ما انتی بنگارم‘‘نے ریلیز کے پہلے ہی ویک اینڈ میں باکس آفس پر اپنی مضبوط موجودگی درج کرا دی ہے۔ فلم نے جمعہ سے اتوار تک مسلسل ترقی کرتے ہوئے نہ صرف ناظرین کی توجہ حاصل کی بلکہ یہ بھی ثابت کر دیا کہ مضبوط مواد اور مثبت زبانی تشہیر بڑی اسٹار پاور کے بغیر بھی کامیابی دلا سکتی ہے۔ Sacnilk کے مطابق فلم نے اپنے پہلے تین دنوں میں ہندوستان میں ۱۰ء۲۳؍ کروڑ روپے نیٹ کمائے، جبکہ ہندوستانی گراس کلیکشن ۶۹ء۲۶؍ کروڑ روپے تک پہنچ گیا۔ بیرون ملک مارکیٹس میں بھی فلم کو مثبت ردعمل ملا جہاں اس نے ۱۰ء۱۵؍ کروڑ روپے کا مجموعی کاروبار کیا۔ اس طرح پہلے ویک اینڈ کے اختتام تک فلم کا دنیا بھر کا مجموعی کلیکشن ۷۹ء۴۱؍ کروڑ روپے تک پہنچ گیا۔

یہ بھی پڑھئے: امتیازعلی کی ’’مَیں واپس آؤں گا‘‘ کا دوسرے ہفتے میں زبردست کاروبار

فلم کی کارکردگی کا سب سے نمایاں پہلو اس کا مسلسل بڑھتا ہوا رجحان رہا۔ ’’ما انتی بنگارم‘‘ نے جمعہ کو ۳۵ء۵؍ کروڑ روپے نیٹ کے ساتھ آغاز کیا۔ سنیچر کو کمائی بڑھ کر ۶۵ء۷؍ کروڑ روپے تک جا پہنچی جبکہ اتوار کو فلم نے ۳۲؍ فیصد مزید اضافہ کرتے ہوئے ۱۰ء۱۰؍ کروڑ روپے کا شاندار کلیکشن کیا، جو اس کی اب تک کی سب سے بڑی یومیہ کمائی ہے۔ فلم کی آکوپینسی میں بھی مسلسل اضافہ ریکارڈ کیا گیا۔ جمعہ کو مجموعی آکوپینسی ۹ء۳۱؍ فیصد رہی، جو سنیچر کو بڑھ کر ۶ء۴۴؍ فیصد اور اتوار کو ۴ء۵۳؍ فیصد تک پہنچ گئی۔ یہ اعداد و شمار اس بات کی نشاندہی کرتے ہیں کہ فلم کو مثبت عوامی ردعمل حاصل ہو رہا ہے اور ناظرین کی دلچسپی وقت کے ساتھ بڑھ رہی ہے۔ اگرچہ فلم کا موازنہ سال کی سب سے بڑی تیلگو بلاک بسٹرز سے کرنا مکمل طور پر درست نہیں ہوگا، تاہم اس کی رفتار قابل ذکر ضرور ہے۔ 

رام چرن کی ’’پیدی‘‘ نے تیسرے دن ۱۰ء۲۹؍ کروڑ روپے کمائے تھے جبکہ چرنجیوی کی ’’منا شنکرا ورا پرساد گارو‘‘ نے تیسرے دن تقریباً ۶۵ء۱۹؍ کروڑ روپے کا اضافہ کیا تھا۔ پون کلیان کی ’’استاد بھگت سنگھ‘‘ نے تیسرے دن ۷ء۱۰؍ کروڑ روپے کمائے تھے، جو ’’ما انتی بنگارم‘‘ کے تیسرے دن کے کلیکشن کے قریب ہے، تاہم ’’استاد بھگت سنگھ‘‘ نے پہلے دن ہی ۳۴؍ کروڑ روپے سے زائد کی کمائی کی تھی اور بعد میں اس کی رفتار کم ہو گئی تھی۔ اس کے برعکس ’’ما انتی بنگارم‘‘ نے چھوٹے آغاز کے باوجود ہر گزرتے دن کے ساتھ بہتر کارکردگی دکھائی ہے، جو فلم کے حق میں مضبوط ’’ورڈ آف ماؤتھ‘‘ کی علامت سمجھی جا رہی ہے۔

یہ بھی پڑھئے: ’’کاک ٹیل ۲‘‘ کا پہلے ہفتے ۷۶؍ کروڑ کا کاروبار

سمانتھا کے کریئر کے تناظر میں دیکھا جائے تو فلم کا تیسرے دن ۱۰ء۱۰؍ کروڑ روپے کا نیٹ کلیکشن انتہائی اہمیت رکھتا ہے۔ یہ ان کی ۲۰۲۳ء کی فلم شکنتلم کے افتتاحی دن کے کلیکشن سے تقریباً دوگنا ہے۔ اسی طرح اس نے ’’یشودا‘‘ اور ’’اوہ بے بی‘‘ جیسی کامیاب خواتین مرکز فلموں کے ابتدائی باکس آفس نمبروں کو بھی باآسانی پیچھے چھوڑ دیا ہے۔ ہدایت کار بی وی نندنی ریڈی کی اس فلم کی کہانی ایک ایسی خاتون کے گرد گھومتی ہے جو ماضی میں ایک خطرناک قاتل رہ چکی ہے۔ حالات اسے دوبارہ اسی پرتشدد دنیا میں واپس لے آتے ہیں جب اس کے خاندان کو خطرات لاحق ہو جاتے ہیں۔ سمانتھا نے نہ صرف فلم میں مرکزی کردار ادا کیا ہے بلکہ اسے اپنے بینر ترالہ موونگ پکچرز کے تحت پروڈیوس بھی کیا ہے۔

فلم کی کہانی راج ندیمورو، وسنت مارنگنتی اور پرہاس بوپوڈی نے تحریر کی ہے جبکہ معروف موسیقار سانتوش نارائنن نے موسیقی ترتیب دی ہے۔ تیلگو کے ساتھ ساتھ فلم تامل زبان میں اینگل تھنگم کے نام سے بھی ریلیز کی گئی ہے۔ فلمی تجزیہ کاروں کے مطابق اگر ’’ما انتی بنگارم‘‘ آنے والے ہفتے کے دنوں میں بھی اپنی رفتار برقرار رکھنے میں کامیاب رہی تو یہ سمانتھا روتھ پربھو کے کریئر کی سب سے بڑی سولو کامیابیوں میں شامل ہو سکتی ہے۔