اسٹینڈ اپ کامیڈین سمئے رائنا نے اپنے نئے شو ’’اسٹل الائیو‘‘ کی کامیابی پر مداحوں کا شکریہ ادا کرتے ہوئے ایک جذباتی پیغام جاری کیا ہے۔ انہوں نے انسٹاگرام پر لکھا کہ وہ مداحوں کے ردعمل سے خوش ہیں اور اس محبت کیلئے شکر گزار ہیں۔ اس کے ساتھ ہی انہوں نے ’’انڈیاز گوٹ لیٹنٹ‘‘ تنازع پر بھی بات کی، جہاں انہوں نے حملوں اور دھمکیوں کے واقعات کا ذکر کرتے ہوئے افسوس کا اظہار کیا۔ ان کے بیانات اور جذباتی انداز نے سوشل میڈیا پر وسیع ردعمل کو جنم دیا ہے۔

ہندوستانی اسٹینڈ اپ کامیڈین سمئے رائنا نے اپنے حالیہ کامیڈی شو ’’اسٹل الائیو‘‘ کی ریلیز کے بعد مداحوں کی جانب سے ملنے والی پذیرائی پر شکریہ ادا کرتے ہوئے ایک جذباتی پیغام جاری کیا ہے۔ انہوں نے اپنے انسٹاگرام اکاؤنٹ کے اسٹوریز سیکشن میں ایک نوٹ شیئر کیا، جس میں انہوں نے مداحوں کی محبت کو سراہتے ہوئے اپنی کیفیت بیان کی۔ سمئے رائنا نے لکھا، ’’میرے نئے شو ’’اسٹل الائیو‘‘ کے تئیں ردعمل سے خوش ہوں۔ مجھے اپنا وقت اور پیار دینے کیلئے آپ کا بہت بہت شکریہ، میں شکر گزار ہوں۔ میں آپ سے پیار کرتا ہوں اور میرے پاس ابھی کوئی الفاظ نہیں ہیں سوائے اس کے کہ میں آپ کی محبت کیلئے صرف شکر گزار ہوں۔‘‘ ان کے اس پیغام کو مداحوں کی جانب سے بڑے پیمانے پر سراہا جا رہا ہے۔

اس کے ساتھ ہی انہوں نے اپنے شو کے دوران پیش آنے والے متنازع موضوع ’’انڈیاز گوٹ لیٹنٹ‘‘ پر بھی تفصیل سے بات کی۔ شو کے ایک حصے میں سمئے رائنا جذباتی ہو گئے اور انہوں نے ان واقعات کا ذکر کیا جو اس تنازعے کے دوران پیش آئے تھے۔ انہوں نے کہا، ’’غنڈے آ چکے، ہیبی ٹیٹ میں توڑ پھوڑ چل رہی تھی، پولیس آ گئی، وہاں پر کچھ ۲۰- ۳۰؍ پولیس والے آئے، اپوروا مکھیجا کو عصمت دری کی دھمکیاں آ رہی ہیں، اسکی فیملی کو جان سے مارنے کی دھمکیاں آ رہی ہیں۔ گھس گئے ہیں، اسے پچھلے گیٹ سے بھاگنا پڑا۔‘‘

انہوں نے مزید بتایا کہ اس صورتحال نے انہیں شدید متاثر کیا۔ سمئے نے کہا، ’’ہیبی ٹیٹ کے اندر، بلراج کے ماں باپ، جو ۷۰؍ سال کے اوپر ہیں، ان کی کوئی غلطی نہیں ہے، وہ صرف وہ کامیڈی کلب چلاتے ہیں جہاں ہم شو کرتے ہیں۔ اندر وہ جوان جوان پولیس والے، پلیز ہمیں جانے دو، ہم نے کچھ نہیں کیا ہے۔ ان کا ویڈیو دیکھ کر میں ٹوٹ گیا، اور میں بس رو رہا تھا۔‘‘

یہ بھی پڑھئے: کیا پلاش مچھل اور اسمرتی مندھانا جلد ہی شادی کرنے والے ہیں؟

 سمئے رائنا نے اس پورے معاملے پر اپنے ردعمل کے حوالے سے بھی بات کی اور کہا کہ انہیں اس صورتحال پر شدید حیرت ہوئی۔ انہوں نے کہا، ’’میں اس پر یقین نہیں کر سکتا تھا، انہوں نے جو پیمانہ لیا وہ پاگل اور غیر متناسب تھا۔ ایک چھوٹے سے مذاق کیلئے اتنا کیسے کر سکتے ہو یار۔‘‘

ان کے ان بیانات نے سوشل میڈیا پر مختلف ردعمل کو جنم دیا ہے، جہاں کچھ صارفین ان کے موقف کی حمایت کر رہے ہیں جبکہ کچھ افراد اس تنازع پر تنقیدی رائے بھی دے رہے ہیں۔ ’’اسٹل الائیو‘‘ کی ریلیز کے بعد سمئے رائنا کے اس جذباتی پیغام اور انکشافات نے ان کے مداحوں کے ساتھ ان کے تعلق کو مزید نمایاں کیا ہے، جبکہ یہ معاملہ اب بھی سوشل میڈیا پر زیر بحث ہے۔