عالیہ بھٹ، رنبیر کپور اور وکی کوشل کی آنے والی فلم ’’لو اینڈ وار‘‘ کے بارے میں ہدایتکار سنجے لیلا بھنسالی نے اہم اپ ڈیٹ شیئر کی ہے۔ ریلیز میں تاخیر کی افواہوں کے درمیان رنبیر کپور نے بھی وضاحت دیتے ہوئے کہا ہے کہ فلم ۲۰۲۶ءمیں ریلیز کے لیے تیار کی جا رہی ہے، جبکہ پوسٹ پروڈکشن میں بڑے پیمانے پر وی ایف ایکس کام جاری ہے۔

ہدایتکار سنجے لیلا بھنسالی نے ورائٹی انڈیا سے گفتگو میں اپنی زیرِ بحث فلم ’’لو اینڈ وار‘‘ کے بارے میں کہا کہ ’’میں یہاں کچھ خاص کرنے کی کوشش کر رہا ہوں۔‘‘ بھنسالی کے قریبی ذرائع کے مطابق فلم بڑے پیمانے کی ہے، جس میں وسیع فضائی ایکشن سیکوئنس شامل ہیں۔ ان مناظر کے لیے بھاری ویژول ایفیکٹس کام درکار ہے، جس کی وجہ سے پوسٹ پروڈکشن کا عمل طویل ہو رہا ہے۔ بھنسالی کے فلم سازی کے انداز سے واقف حلقے کہتے ہیں کہ بصری شان و شوکت اور باریک بینی ان کی پہچان ہے، اس لیے کسی جلد بازی کا امکان نہیں۔

ریلیز میں تاخیر؟ رنبیر کپور کی وضاحت
ریلیز کی تاریخ کے حوالے سے سوشل میڈیا پر گردش کرتی افواہوں کے بعد رنبیر کپور نے براہِ راست وضاحت دی۔ انہوں نے اپنے لائف اسٹائل برانڈ ARKS کی پہلی سالگرہ کے موقع پر انسٹاگرام لائیو سیشن کے دوران مداحوں سے بات کرتے ہوئے کہا کہ ان کی فلم ’’رامائن: پارٹ ون‘‘ پہلے ریلیز ہوگی، اس کے بعد ’’لو اینڈ وار‘‘ آئے گی۔ اطلاعات کے مطابق اگرچہ ’’لو اینڈ وار‘‘ کی باضابطہ تاریخ کا اعلان نہیں کیا گیا، لیکن ٹیم ۲۰۲۶ء کی ریلیز کے لیے پرعزم ہے۔

یہ بھی پڑھئے: موسیقی زبان کی دیواریں توڑ دیتی ہے: بحرینی ریپر فلیپراچی

ریلیز کیلنڈر کی حکمت عملی
رپورٹس کے مطابق ریلیز میں ممکنہ تاخیر کی ایک بڑی وجہ رنبیر کپور کی مصروف ریلیز لائن اپ بھی ہے۔ ان کا میگا بجٹ پروجیکٹ ’’رامائن: پارٹ ون‘‘ نومبر ۲۰۲۶ء میں ریلیز کے لیے شیڈول ہے۔ اسی سال ’’لو اینڈ وار‘‘ کی ریلیز دو بڑی فلموں کو ایک دوسرے کے قریب لا سکتی ہے، جس سے باکس آفس حکمت عملی متاثر ہو سکتی ہے۔
یاد رہے کہ عالیہ بھٹ اس سے قبل سنجے لیلا بھنسالی کے ساتھ ’’گنگو بائی کاٹھیا واڑی‘‘ میں کام کرچکی ہیں جبکہ رنبیر کپور نے اپنے کریئر کا آغاز بھنسالی کی فلم ’’سانوریا‘‘ سے کیا تھا۔ وکی کوشل کے ساتھ بھنسالی کا یہ پہلا اشتراک ہے۔