ایچ بی او نے نئی ہیری پوٹر سیریز کا پہلا ٹیزر جاری کر دیا، نئی کاسٹ اور انداز کے ساتھ واپسی پر کچھ مداح متاثر جبکہ کچھ مایوس نظر آئے۔

امریکی براڈکاسٹر ایچ بی او نے ’’ہیری پوٹر‘‘ پر مبنی اپنی آنے والی سیریز کا پہلا ٹیزر جاری کر دیا ہے، جس میں جادوئی دنیا کو ایک نئی کاسٹ اور تازہ بصری انداز کے ساتھ دوبارہ پیش کیا گیا ہے۔ یہ سیریز مصنفہ جے کے رولنگ کی مشہور کتاب ’’ہیری پوٹر اینڈ دی فلاسفرز اسٹون‘‘ پر مبنی پہلے سیزن سے آغاز کرے گی، جس میں ہیری پوٹر کے ہاگ وارٹس کے سفر کو مزید تفصیل اور وسعت کے ساتھ دکھایا جائے گا۔ ٹیزر میں نوجوان ہیری (ڈومینک میک لافلن) کو ڈرسلی خاندان کے ساتھ ایک مشکل زندگی گزارتے دکھایا گیا ہے، جہاں اسے اپنے کزن ڈڈلی کی غنڈہ گردی اور آنٹی پیٹونیا کی توہین کا سامنا کرنا پڑتا ہے۔ کہانی اس وقت بدلتی ہے جب اسے ہاگ وارٹس سے قبولیت کا خط ملتا ہے۔ نک فراسٹ روبیوس ہیگریڈ کے کردار میں ہیں، جو ہیری کو جادو کی دنیا میں لے جاتے ہیں، جہاں اس کی ملاقات ہیڈ ماسٹر البس ڈمبلڈور (جان لتھگو)، اور اس کے دوست رون ویزلی اور ہرمیون گرینجر سے ہوتی ہے۔

First trailer for the ‘HARRY POTTER’ series.

Releasing this Christmas on HBO. pic.twitter.com/X5PPZ3ME46

— DiscussingFilm (@DiscussingFilm) March 25, 2026

مداحوں کا ردعمل: تعریف بھی، تنقید بھی
ٹیزر کے اجرا کے بعد سوشل میڈیا پر مداحوں کی جانب سے ملے جلے ردعمل سامنے آئے ہیں۔ کچھ مداحوں نے کتاب سے وفاداری کی تعریف کرتے ہوئے لکھا کہ ’’ہیری کو اسکول میں ڈڈلی کے ذریعے غنڈہ گردی کا نشانہ بنتے دیکھنا — یہ واقعی کتاب کے شائقین کے لیے ہے۔‘‘ ایک اور صارف نے کہا کہ ’’انہوں نے میری توقع سے زیادہ دکھایا، سیٹس حیران کن لگ رہے ہیں۔‘‘
تاہم، تنقید بھی کم نہیں تھی۔ ایک صارف نے لکھا کہ ’’یہ ایسا ہے جیسے کتاب کو بس مختلف فونٹ میں پڑھ لیا جائے، کچھ نیا محسوس نہیں ہو رہا۔‘‘ ایک اور ردعمل میں کہا گیا کہ ’’میں نے کبھی کسی ٹریلر کے بارے میں اتنے ملے جلے جذبات محسوس نہیں کیے۔‘‘
سیریز کی کاسٹنگ بھی بحث کا موضوع بن گئی، خاص طور پر پاپا ایسیدو کو سیوریس اسنیپ کے کردار میں لینے پر۔ کچھ مداحوں نے اس تبدیلی کو قبول نہیں کیا اور اسے ’’’اصل کردار سے ہٹ کر‘‘ قرار دیا، جبکہ دیگر نے اسے ایک ’’جدید اور متنوع‘‘ پیشکش کے طور پر سراہا۔ ایک صارف نے تبصرہ کیا کہ ’’ایسا لگتا ہے جیسے میں کسی متبادل حقیقت میں آ گیا ہوں — سب کچھ درست ہے، لیکن دماغ اسے قبول نہیں کر پا رہا۔‘‘

یہ بھی پڑھئے: آئی جی ایل تنازع: کنال کامرا کا رنویر الہبادیا پر شدید حملہ

ہیری پوٹر فرنچائز اس سے قبل ۲۰۰۱ء سے ۲۰۱۱ء کے درمیان آٹھ فلموں میں ڈھالی جا چکی ہے، جن میں ڈینینل ریڈ کلف، روپرٹ گرنٹ اور ایما واٹسن نے مرکزی کردار ادا کیے تھے۔ نئی سیریز کو ایک ’’مزید تفصیلی اور کتاب کے قریب‘‘ ورژن کے طور پر پیش کیا جا رہا ہے، جس کا مقصد کہانی کو طویل فارمیٹ میں بہتر انداز میں بیان کرنا ہے۔ یہ سیریز دسمبر ۲۰۲۶ء میں ایچ بی او میکس پر ریلیز ہوگی۔ فی الحال شو کی شوٹنگ وارنر بروز اسٹوڈیوز لیوزڈن میں جاری ہے، جبکہ اس پروجیکٹ کی قیادت شو رنر فرانسسکا گارڈنر اور ڈائریکٹر مارک میلوڈ کر رہے ہیں۔