میٹ ریوز نے The Batman Part II کی پہلی جھلک شیئر کر کے شائقین کے جوش کو مزید بڑھا دیا ہے۔ رابرٹ پیٹنسن ایک بار پھر بروس وین / بیٹ مین کے کردار میں واپس آ رہے ہیں، جبکہ فلم ۲۰۲۲ء کی کامیاب فلم دی بیٹ مین اور دی پینگوئن کے واقعات کو آگے بڑھائے گی۔ رپورٹس کے مطابق، فلم کی شوٹنگ جون ۲۰۲۶ء میں شروع ہو سکتی ہے۔

’’دی بیٹ مین ۲‘‘ ہالی ووڈ کی سب سے زیادہ متوقع فلموں میں شامل ہو چکی ہے، اور اب فلم کے حوالے سے ایک نئی جھلک سامنے آنے کے بعد شائقین کا جوش مزید بڑھ گیا ہے۔ فلمساز میٹ ریوز نے اپنے ایکس پر ایک پوسٹ دوبارہ شیئر کی، جس میں سیکوئل کی پہلی جھلک دکھائی گئی۔ پوسٹ کے ساتھ انہوں نے مختصر مگر پُراسرار کیپشن لکھا: ’’And so it begins.‘‘ اس مختصر اپ ڈیٹ نے مداحوں کے درمیان زبردست جوش پیدا کر دیا، اور سوشل میڈیا پر تبصروں کا سیلاب آ گیا۔

And so it does…! 🦇😊 https://t.co/ZRWDhBAtAh

— Matt Reeves (@mattreevesLA) May 8, 2026

ایک صارف نے لکھا، ’’اس فلم کے لیے جو ہائپ بنی ہوئی ہے وہ ناقابلِ یقین ہے۔‘‘ دوسرے مداح نے تبصرہ کیا، ’’میں اپنے پسندیدہ بیٹ مین کی واپسی کا انتظار نہیں کر سکتا۔ ’’دی پینگوئن‘‘ کے فائنل میں بیٹ سگنل دیکھنے کے بعد سے سکون نہیں ملا۔‘‘ کئی مداحوں نے فلم کے ممکنہ ویلن کے حوالے سے بھی قیاس آرائیاں شروع کر دی ہیں۔ رپورٹس کے مطابق، اگرچہ ابھی تک کسی مخالف کردار کا باضابطہ اعلان نہیں کیا گیا، لیکن مسٹر فریز کے فلم میں شامل ہونے کے امکانات زیرِ بحث ہیں۔ اطلاعات کے مطابق ’’دی بیٹ مین ۲‘‘ کی کہانی دی پینگوئن کے اختتام کے فوراً بعد شروع ہوگی، جس سے دونوں پروجیکٹس کے درمیان واضح تعلق قائم ہوتا ہے۔

یہ بھی پڑھئے:کھلاڑیوں کو وہ احترام نہیں مل رہا جس کے وہ حقدار ہیں: سِنر

رپورٹس میں یہ بھی کہا گیا ہے کہ فلم کی پرنسپل فوٹوگرافی جون ۲۰۲۶ء میں شروع ہونے کا امکان ہے۔ رابرٹ پیٹنسن ایک بار پھر بروس وین / بیٹ مین کے کردار میں نظر آئیں گے۔ پہلی فلم میں ان کی کارکردگی کو ناقدین اور شائقین دونوں کی جانب سے بھرپور سراہا گیا تھا، خاص طور پر بیٹ مین کے ایک تاریک، جذباتی اور جاسوسانہ پہلو کو پیش کرنے پر۔ ۲۰۲۲ء میں ریلیز ہونے والی ’’دی بیٹ مین‘‘ نے بیٹ مین فرنچائز کو ایک نئے انداز میں متعارف کرایا تھا۔ فلم میں بیٹ مین کو گوتھم سٹی میں جرائم کے خلاف اپنے دوسرے سال کے دوران دکھایا گیا، جہاں وہ پراسرار قاتل دی رِڈلر کا تعاقب کرتے ہوئے شہر کی اشرافیہ اور اپنے خاندان سے جڑی بدعنوانیوں کا پردہ فاش کرتا ہے۔

یہ بھی پرھئے:۱۵؍سال بعد اجے دیوگن اور رنبیر کپور ایک ساتھ کام کریں گے

اس فلم میں زوئی کراوٹز نے کیٹ وومن، پال ڈینو نے رِڈلر، جبکہ کولن فیرل نے پینگوئن کا کردار ادا کیا تھا۔ دیگر نمایاں اداکاروں میں جیفری رائٹ، اینڈی سرکیس جان ٹرٹرو شامل تھے۔ شائقین خاص طور پر میٹ ریوز کے اس اندازِ ہدایت کاری کو پسند کرتے ہیں جس میں سپر ہیرو کہانیوں کو زیادہ حقیقت پسندانہ، تاریک اور نفسیاتی انداز میں پیش کیا جاتا ہے۔ اسی وجہ سے سیکوئل کے حوالے سے توقعات پہلے ہی بہت بلند ہو چکی ہیں، اور مداح امید کر رہے ہیں کہ نئی فلم پہلی قسط سے بھی زیادہ پیچیدہ اور سنسنی خیز ثابت ہوگی۔