ہالی ووڈ اسٹار ٹام ہالینڈ نے انکشاف کیا ہے کہ انہوں نے کرسٹوفر نولن کی آنے والی فلم ’’دی اوڈیسی‘‘ میں کام کرنے کیلئے سونی پکچرز سے فلم ’’اسپائیڈر مین: برانڈ نیو ڈے‘‘ کی پروڈکشن مؤخر کرنے کی درخواست کی تھی۔ ہالینڈ کے مطابق یہ ایک مشکل فیصلہ تھا، تاہم تاخیر نے نہ صرف انہیں نولن کی فلم کا حصہ بننے کا موقع دیا بلکہ اسپائیڈر مین کی نئی فلم کی تخلیقی تیاری کو بھی بہتر بنانے میں مدد کی، جس کے نتیجے میں فلم کی اسکرپٹ مزید مضبوط ہو سکی۔

ہالی ووڈ اداکار ٹام ہالینڈ نے انکشاف کیا ہے کہ انہوں نے سونی پکچرز سے اپنی نئی سپر ہیرو فلم ’’اسپائیڈر مین: برانڈ نیو ڈے‘‘ کی پروڈکشن ملتوی کرنے کی درخواست کی تھی تاکہ وہ کرسٹوفر نولن کی متوقع فلم ’’دی اوڈیسی‘‘ پر کام شروع کر سکیں۔ جی کیو کو دیے گئے ایک انٹرویو میں ہالینڈ نے بتایا کہ اس فیصلے کیلئے انہیں سونی پکچرز کے چیئرمین ٹام روتھمین کے ساتھ ایک مشکل اور غیر آرام دہ گفتگو کرنا پڑی تھی۔ انہوں نے کہا، ’’میں نے کرس سے کہا، ’دیکھو، میں یہ فلم کرنا چاہتا ہوں، لیکن اگر میں یہ کرنے جا رہا ہوں تو مجھے سونی کو فون کرنا پڑے گا اور ایک بہت غیر آرام دہ گفتگو کرنی ہوگی۔‘‘

یہ بھی پڑھئے: ’’ڈان ۳‘‘ تنازع: FWICE کا کنگنا اور رام گوپال ورما پر جوابی وار

ہالینڈ کے مطابق سونی نے بالآخر اس درخواست کو قبول کر لیا کیونکہ کرسٹوفر نولن اپنی منظم اور محدود دورانیے کی پروڈکشنز کیلئے مشہور ہیں۔ اداکار نے کہا، ’’میرے خیال میں سونی کے راضی ہونے کی ایک بڑی وجہ یہ تھی کہ کرس کی یہ شہرت ہے کہ یہ فلم پانچ ماہ سے زیادہ نہیں چلے گی اور ہم درحقیقت ٹام کو دو سال کیلئے نہیں کھونے والے۔ اگر کوئی اور ہدایتکار ہوتا تو شاید گفتگو مختلف ہوتی۔‘‘ اداکار نے بتایا کہ شیڈول میں اس تبدیلی نے فلم ’’اسپائیڈر مین: برانڈ نیو ڈے‘‘ کیلئے بھی فائدہ مند ثابت ہوئی۔ ان کے مطابق اس تاخیر کی بدولت ہدایتکار ڈیسٹن ڈینیئل کریٹن کو فلم کے ساتھ جڑنے اور اسکرپٹ کو مزید بہتر بنانے کا وقت ملا۔

ہالینڈ نے کہا کہ ’’فلم دی اوڈیسی نے تقریباً اسپائیڈر مین کو بچا لیا کیونکہ اگر یہ تاخیر نہ ہوتی تو ہمارے پاس ڈیسٹن نہ ہوتے۔ جب ہم فلم شروع کرنے کیلئے تیار تھے تو وہ دستیاب نہیں تھے۔ ہمارے پاس اسکرپٹ کو اس مقام تک پہنچانے کیلئے چھ ماہ کا اضافی وقت بھی نہ ہوتا جہاں یہ آج موجود ہے۔‘‘ انہوں نے مزید کہا کہ ’’مجھے واقعی یقین ہے کہ ہم نے کسی بھی اسپائیڈر مین فلم کا بہترین ورژن تیار کیا ہے۔ اگرچہ یہ سونی کیلئے ایک مشکل فیصلہ تھا، لیکن میرے خیال میں اب وہ خوش ہیں کہ ایسا ہوا۔‘‘

یہ بھی پڑھئے: مراٹھی فلموں کے مہانایک اشوک صراف نے ہندی میں بھی نام کمایا

فلم ’’اسپائیڈر مین: برانڈ نیو ڈے‘‘ ٹام ہالینڈ کی بطور پیٹر پارکر چوتھی سولو فلم ہوگی۔ اس سے قبل وہ ’’اسپائیڈر مین: ہوم کمنگ‘‘ (۲۰۱۷ء)، ’’اسپائیڈر مین: فار فروم ہوم‘‘ (۲۰۱۹ء) اور ’’اسپائیڈر مین: نو وے ہوم‘‘ (۲۰۲۱ء) جیسی فلموں میں مرکزی کردار ادا کر چکے ہیں۔ نئی فلم ۳۱؍ جولائی کو سینما گھروں میں ریلیز ہونے والی ہے۔ ٹام ہالینڈ نے پہلی بار ۲۰۱۶ء کی فلم ’’کیپٹن امریکہ: سول وار‘‘ میں پیٹر پارکر کا کردار ادا کیا تھا، جس کے بعد وہ ’’ایونجرز: انفینٹی وار‘‘ اور ’’ایونجرز: اینڈگیم سمیت متعدد مارول فلموں میں نظر آئے۔ دوسری جانب کرسٹوفر نولن کی فلم ’’دی اوڈیسی‘‘ ۱۷؍ جولائی کو ریلیز ہوگی، جس میں زندایا، رابرٹ پیٹنسن، لوپیتا نیونگو، این ہیتھ وے اور چارلیز تھیرون سمیت کئی معروف ستارے شامل ہیں۔