عامر خان پروڈکشنز کی انتہائی متوقع فلم ’’بٹوارہ ۱۹۴۷ء‘‘ کا شاندار ٹریلر جاری کر دیا گیا ہے۔ راج کمار سنتوشی کی ہدایت کاری میں بننے والی یہ فلم برصغیر کی تقسیم کے المیے اور اس کے دوران انسانیت، امید اور رشتوں کی طاقت کی کہانی کو بڑے پردے پر پیش کرتی ہے۔

عامر خان پروڈکشنز کی انتہائی متوقع فلم ’’بٹوارہ ۱۹۴۷ء‘‘ کا شاندار ٹریلر جاری کر دیا گیا ہے۔ راج کمار سنتوشی کی ہدایت کاری میں بننے والی یہ فلم برصغیر کی تقسیم کے المیے اور اس کے دوران انسانیت، امید اور رشتوں کی طاقت کی کہانی کو بڑے پردے پر پیش کرتی ہے۔ فلم میں شبانہ اعظمی، سنی دیول اور پریتی زنٹا مرکزی کردار ادا کر رہے ہیں۔

Har insaan ka pehla mazhab MAA hai. #Batwara1947 Trailer Out Now. 14th August in cinemas near you. pic.twitter.com/ILeQnZXYjC

— Aamir Khan Productions (@AKPPL_Official) July 28, 2026

فلم کے جذباتی پوسٹرز اور ٹیزر پہلے ہی ناظرین میں بے حد دلچسپی پیدا کر چکے تھے، جبکہ اب جاری ہونے والے ٹریلر میں ۱۹۴۷ء کی تقسیم کے خوفناک حالات کے درمیان ایک خاندان کی جدوجہد، بچھڑنے اور پھر امید کا دامن تھامے رکھنے کی داستان دکھائی گئی ہے۔  ٹریلر میں یہ بھی دکھایا گیا ہے کہ کس طرح تشدد، خوف اور جبری ہجرت نے لوگوں کی زندگیاں بدل کر رکھ دیں۔ جو لوگ کبھی ایک ساتھ رہتے تھے، وہ حالات کے باعث ایک دوسرے سے جدا ہو گئے۔ اس کے باوجود فلم یہ پیغام دیتی ہے کہ نفرت اور تقسیم کے ماحول میں بھی انسانیت سب سے بڑی طاقت ہوتی ہے۔

یہ بھی پڑھئے:نیرج چوپڑا کامن ویلتھ گیمز کے چیلنج کے لیے بہترین فارم میں نظر آرہے ہیں

فلم میں سنی دیول ایک ایسے شخص کے کردار میں نظر آ رہے ہیں جو سخت ترین حالات میں بھی اپنے اصولوں اور ضمیر پر سمجھوتہ نہیں کرتا۔ شبانہ اعظمی ایک باوقار اور مضبوط ارادوں والی بزرگ خاتون کا کردار ادا کر رہی ہیں، جو پوری کہانی کا جذباتی مرکز ہیں۔ پریتی زنٹا ایک ایسی خاتون کے کردار میں ہیں جو بحران کے دور میں اپنے خاندان کو متحد رکھنے کی کوشش کرتی ہے۔

یہ بھی پڑھئے:ریان گوسلنگ نئے ’’گھوسٹ رائیڈر‘‘بنیں گے

ٹریلر میں تقسیم ہند کے درد، انسانی جذبات اور شاندار مناظر کا مؤثر امتزاج پیش کیا گیا ہے۔ فلم صرف ایک تاریخی سانحے کی کہانی نہیں بلکہ ان عام لوگوں کی ہمت، حساسیت اور انسان دوستی کی بھی عکاسی کرتی ہے، جنہوں نے مشکل ترین حالات میں بھی امید کا دامن نہیں چھوڑا۔ فلم میں شبانہ اعظمی، سنی دیول اور پریتی زنٹا کے علاوہ کرن دیول، علی فضل اور ابھمنیو سنگھ بھی اہم کرداروں میں نظر آئیں گے۔ قابل ذکر بات یہ ہے کہ تقریباً تین دہائیوں بعد ہدایت کار راج کمار سنتوشی اور سنی دیول کی کامیاب جوڑی دوبارہ ایک ساتھ کام کر رہی ہے۔عامر خان پروڈکشنز کے بینر تلے بننے والی ’’بٹوارہ  ۱۹۴۷ء‘‘کی موسیقی اے آر رحمان نے ترتیب دی ہے، جبکہ گیت جاوید اختر نے لکھے ہیں۔ فلم کے پروڈیوسر عامر خان اور اپرنا پروہت ہیں۔ یہ فلم ۱۴؍ اگست ۲۰۲۶ ءکو دنیا بھر کے سنیما گھروں میں ریلیز ہوگی۔