جاپانی اینی میشن کی دنیا کا معروف نام سوتومو شیبایاما پھیپھڑوں کے کینسر کے باعث انتقال کر گئے، ان کی وفات پر دنیا بھر کے مداحوں نے گہرے رنج کا اظہار کیا۔

مشہور جاپانی اینیمی ڈائریکٹر Tsutomu Shibayama کا ۸۴؍ برس کی عمر میں انتقال ہو گیا۔ ان کی وفات کی خبر Ajia-do Animation Works نے ۱۷؍ مارچ ۲۰۲۶ء کو جاری بیان میں دی، جس میں بتایا گیا کہ وہ ۶؍ مارچ کو پھیپھڑوں کے کینسر کے باعث دنیا سے رخصت ہو گئے تھے۔ اپنے بیان میں اسٹوڈیو نے کہا کہ ، ’’شیبایاما سوتومو، اینی میشن ڈائریکٹر جنہوں نے ۲۰؍ سال سے زائد عرصے تک ڈوریمون سیریز کی نگرانی کی، پھیپھڑوں کے کینسر کے باعث انتقال کر گئے۔‘‘ ان کے انتقال کی خبر سامنے آتے ہی دنیا بھر کے مداحوں نے سوشل میڈیا پر گہرے دکھ اور افسوس کا اظہار کیا۔

RIP Tsutomu Shibayama, at one point Doraemon was his entire life and nobody loved him more than the director himself, his personal drawings of him and his crew "shooting" with Doraemon and friends as if they were his regular collaborators will forever be testament to that love. https://t.co/1RYIJm2lyE pic.twitter.com/xDKD3qHmDK

— Ocam (@GhostlyOcam) March 17, 2026

شیبایاما کو خاص طور پر Doraemon کے ساتھ ان کے طویل اور متاثر کن تعلق کے لیے یاد کیا جاتا ہے، جہاں انہوں نے کئی یادگار ٹی وی ایپی سوڈز اور فلموں کی ہدایت کاری کی۔ ان کے کام نے نہ صرف جاپان بلکہ دنیا بھر میں بچوں اور بڑوں کے دلوں میں جگہ بنائی۔ مداحوں کے تاثرات بھی ان کی عظمت کا ثبوت بنے۔ ایک صارف نے لکھا، ’’ڈوریمون ان کی زندگی کا اہم حصہ تھا اور شاید ہی کوئی اس کردار کو ان سے زیادہ محبت کرتا ہو۔‘‘ ایک اور صارف نے کہا، ’’ان کا کام ہماری روزمرہ زندگی کا حصہ بن چکا تھا، ان کی اہمیت کا احساس اب جا کر ہوا ہے۔‘‘ ایک مداح نے انہیں خراج عقیدت پیش کرتے ہوئے لکھا، ’’ایک حقیقی لیجنڈ ہم سے رخصت ہو گیا، آپ نے ہمارے بچپن کو شکل دی۔‘‘

یہ بھی پڑھئے: سرکے چُنر گیت تنازع:سنجے دت کو سمن جاری، نورا بھی پھنس گئیں

۱۹۴۱ء میں ٹوکیو کے علاقے آساکوسا میں پیدا ہونے والے شیبایاما نے اپنے کیریئر کا آغاز مانگا آرٹسٹ کے طور پر کیا۔ بعد ازاں انہوں نے اینی میشن کی دنیا میں قدم رکھا اور اپنی محنت اور تخلیقی صلاحیتوں کے باعث نمایاں مقام حاصل کیا۔ ۱۹۷۸ء میں انہوں نے دیگر ساتھیوں کے ساتھ مل کر Ajia-do Animation Works کی بنیاد رکھی، جو بعد میں ایک اہم اینی میشن اسٹوڈیو بن گیا۔

یہ بھی پڑھئے: ’’دُھرندھر: دی ریونج ‘‘ کی ریلیز سے پہلے بڑا تکنیکی مسئلہ ، ٹیم نے معافی مانگ لی

ان کی خدمات کے اعتراف میں ۲۰۱۲ء میں انہیں جاپان کی ثقافتی امور کی ایجنسی کی جانب سے ایوارڈ سے بھی نوازا گیا۔ ان کے انتقال کے بعد ان کی آخری رسومات خاندان کی خواہش کے مطابق نجی طور پر ادا کی گئیں، جبکہ یادگاری تقریب کا اعلان بعد میں متوقع ہے۔ سوتومو شیبایاما کا شمار ان تخلیق کاروں میں ہوتا ہے جنہوں نے اینی میشن کو محض تفریح نہیں بلکہ جذبات اور کہانی کا ایک مضبوط ذریعہ بنایا، اور ان کی خدمات کو ہمیشہ یاد رکھا جائے گا۔