یش راج فلمز کے وارث اور فلم ساز آدتیہ چوپڑا کے چھوٹے بھائی اُدئے چوپڑا ایک بار پھر خبروں میں ہیں، لیکن اس بار بطور اداکار نہیں بلکہ فلم ’’الفا‘‘ کے کہانی نویس کے طور پر۔ ’’محبتیں‘‘ اور ’’دھوم‘‘ سیریز کے ذریعے شہرت حاصل کرنے والے اُدئے کا اداکاری کا سفر کامیاب نہ ہو سکا، جس کے بعد انہوں نے ہالی ووڈ کا رخ کیا اور وائی آر ایف انٹرٹینمنٹ کی بنیاد رکھی۔ اب کئی برس منظرِ عام سے دور رہنے کے بعد ان کا نام وائی آر ایف اسپائی یونیورس کی نئی فلم ’’الفا‘‘ سے جڑنے پر ایک بار پھر توجہ کا مرکز بن گیا ہے۔

یش راج فلمز کے بانی خاندان سے تعلق رکھنے والے اُدئے چوپڑا طویل عرصے سے فلمی دنیا میں نسبتاً خاموش کردار ادا کر رہے تھے، تاہم اب ان کا نام ایک بار پھر سرخیوں میں آ گیا ہے۔ اس بار وجہ ان کی اداکاری نہیں بلکہ وائی آر ایف اسپائی یونیورس کی آنے والی فلم ’’الفا‘‘ ہے، جس کے کریڈٹس میں انہیں کہانی نویس کے طور پر شامل کیا گیا ہے۔ ۲۰۰۰ء میں ریلیز ہونے والی بلاک بسٹر فلم ’’محبتیں‘‘ نے جہاں شاہ رخ خان، امیتابھ بچن اور ایشوریہ رائے کو ایک یادگار فلم میں یکجا کیا، وہیں اسی فلم کے ذریعے اُدئے چوپڑا نے بھی بطور اداکار اپنے کریئر کا آغاز کیا۔ اس سے قبل وہ اپنے والد یش چوپڑا اور بڑے بھائی آدتیہ چوپڑا کے ساتھ معاونت اور پروڈکشن کے شعبے میں کام کر چکے تھے۔

یہ بھی پڑھئے: ایروس انوویشن کا اعلان، ’’تنو ویڈز منو‘‘ کی نئی فلم، افسانوی سنیما کائنات متعارف

تاہم ’’میرے یار کی شادی ہے‘‘، ’’نیل این نکی‘‘ اور ’’پیار امپاسیبل‘‘ جیسی فلمیں باکس آفس پر خاطر خواہ کامیابی حاصل نہ کر سکیں۔ نتیجتاً اُدئے چوپڑا بطور مرکزی ہیرو اپنی شناخت قائم کرنے میں ناکام رہے اور ان کی سب سے نمایاں شناخت ’’دھوم‘‘ فرنچائز میں علی کے مزاحیہ کردار تک محدود ہو گئی۔ اداکاری میں مسلسل ناکامیوں کے بعد اُدئے چوپڑا نے ۲۰۱۰ء میں ایک بڑا فیصلہ کیا اور فلم سازی کے نئے امکانات تلاش کرنے کے لیے ہالی ووڈ منتقل ہو گئے۔ بعد ازاں ایک انٹرویو میں انہوں نے بتایا تھا کہ ’’جب میں نے اداکاری کے بجائے کچھ مختلف کرنے کا فیصلہ کیا تو آدتیہ نے مجھ سے کہا کہ ہالی ووڈ فلمیں بنانے کے امکانات پر غور کرو۔‘‘

اُدئے لاس اینجلس منتقل ہوئے اور یونیورسٹی آف کیلیفورنیا (لاس اینجلس) میں پروڈکشن سے متعلق تربیت حاصل کی۔ ان کے مطابق ہالی ووڈ میں کام کرنا ان کے لیے ایک نئی شروعات تھی کیونکہ وہاں انہیں اپنے خاندان کے نام کے بجائے اپنی صلاحیتوں کے بل بوتے پر مقام بنانا تھا۔ انہوں نے ایک اور موقع پر کہا تھا کہ ’’چاہے میں کتنی بھی کامیابی حاصل کر لوں، میں اپنے والد اور بھائی کی کامیابیوں سے آگے نہیں جا سکتا تھا۔ ہالی ووڈ میرے لیے ایک ایسی جگہ تھی جو مکمل طور پر میری اپنی تھی۔‘‘ اُدئے کے اس فیصلے پر یش چوپڑا مکمل طور پر مطمئن نہیں تھے۔ اُدئے نے یاد کرتے ہوئے بتایا تھا کہ ’’میرے والد سمجھتے تھے کہ میں ایک ایسی مارکیٹ میں جا رہا ہوں جہاں کوئی مجھے نہیں جانتا اور مقابلہ انتہائی سخت ہے۔‘‘

یہ بھی پڑھئے: ویر داس کی ہارر فلم ’بارہ نمبر‘ کی کاسٹ کا اعلان، شیبا چڈھا اور اتل کلکرنی شامل

ہالی ووڈ میں اُدئے چوپڑا نے YRF انٹرٹینمنٹ کے نام سے ایک ذیلی ادارہ قائم کیا، جس کے تحت ۲۰۱۴ء میں دو بین الاقوامی فلمیں پروڈیوس کی گئیں۔ ان میں Grace of Monaco اور The Longest Week شامل تھیں۔ اگرچہ یہ منصوبے بڑی تجارتی کامیابی حاصل نہ کر سکے، تاہم اُدئے نے ہمت نہیں ہاری۔ بعد ازاں انہوں نے YRF انٹرٹینمنٹ کو ڈجیٹل مواد کی تیاری کی طرف منتقل کیا۔ ۲۰۲۳ء میں انہوں نے نیٹ فلکس کے لیے دستاویزی سیریز The Romantics پروڈیوس کی، جس میں یش راج فلمز کی تاریخ اور آدتیہ چوپڑا کی نایاب گفتگو شامل تھی۔ اسی سال YRF انٹرٹینمنٹ نے نیٹ فلکس کیلئے ’’دی ریلوے مین‘‘ پیش کی، جسے ناقدین اور ناظرین دونوں کی جانب سے بھرپور پذیرائی حاصل ہوئی۔ بعد ازاں وانی کپور کی سیریز ’’منڈالا مرڈرز‘‘ توقعات کے مطابق کامیابی حاصل نہ کر سکی، تاہم اُدئے چوپڑا پسِ منظر میں تخلیقی کام جاری رکھتے رہے۔

اب ان کی واپسی فلم ’’الفا‘‘ کے ذریعے ہو رہی ہے، جس میں عالیہ بھٹ، شروری اور بوبی دیول مرکزی کردار ادا کر رہے ہیں۔ فلم ۳؍ جولائی کو سنیما گھروں میں ریلیز ہوگی اور اسے YRF اسپائی یونیورس کا اہم حصہ قرار دیا جا رہا ہے۔ فلمی مبصرین کے مطابق اُدئے چوپڑا کا یہ نیا کردار اس بات کی علامت ہے کہ انہوں نے اداکاری سے آگے بڑھ کر تخلیقی اور پروڈکشن کے میدان میں اپنی مستقل شناخت بنانے کا راستہ اختیار کر لیا ہے۔ کئی برسوں تک منظرِ عام سے دور رہنے کے بعد ’’الفا‘‘ ان کے کریئر کا ایک نیا باب ثابت ہو سکتی ہے۔