ورون بڈولہ نے اپنے حالیہ انٹرویو میں کہا کہ ’’سیارہ‘‘ میں شاہ رخ خان ہوتے تو فلم فلاپ ہوجاتی اور اگر ’’جوان‘‘ میں اہان پانڈے ہوتے تو یہ فلم فلاپ ہوجاتی۔

’’سیارہ‘‘ میں نظر آنے والے اداکار ورون بڈولہ ان ان دنوں فلم کی کامیابی پر اپنے خیالات کی وجہ سے سرخیوں میں ہیں۔ بڈولہ اب کہہ رہے ہیں کہ فلموں کو ہٹ کرنے کیلئے اب بڑے ستاروں کی ضرورت نہیں ہے۔ اپنے یوٹیوب چینل کیلئے نین دیپ رکشٹ کے ساتھ ایک نئے انٹرویو میں ورون بڈولہ نے کہا کہ پروجیکٹ کا پیمانہ ستارے کی ضرورت کا تعین کرتا ہے۔ بڈولہ نے شاہ رخ خان کے سپر اسٹارڈم کا موازنہ اہان پانڈے سے کرتے ہوئے کہا کہ ’’سیارہ‘‘ نے ثابت کر دیا ہے کہ ناظرین کو اب ستاروں کی ضرورت نہیں ہے۔

یہ بھی پڑھئے: باکس آفس: رجنی کانت کی ’’قلی‘‘ نے رتیک روشن کی ’’وار ۲‘‘ کو پچھاڑ دیا

انہوں نے کہا ’’آپ اہان پانڈے کو ’’جوان‘‘ میں ڈال دو، ’’جوان‘‘ فلاپ ہو جائے گی۔ شاہ رخ خان کو ’’سیارہ‘‘ میں کاسٹ کردو، ’’سیارہ‘‘ فلاپ ہوجائے گی۔ انہوں نے مزید وضاحت کی کہ شاہ رخ خان کے اسٹارڈم کو دیکھتے ہوئے کہا جاسکتا ہے کہ وہ ’’سیارہ‘‘ کیلئے بہت بڑے ہیں۔ اہان کے بارے میں بڈولہ نے کہا کہ نوجوان اداکار کے پاس ’’جوان‘‘ جیسی فلم کو چلانے کیلئے متاثر کن شخصیت نہیں ہوگی۔ خیال رہے کہ ’’سیارہ‘‘ میں اہان پانڈے اور انیت پڈا نے مرکزی کردار ادا کیا ہے۔ ورون بڈولہ نے اہان پانڈے کے والد کا کردار ادا کیا ہے۔ ورون بڈولہ ’’وار ۲‘‘ کا بھی حصہ ہیں۔
اگرچہ فلم کی کامیابی کی ضمانت دینے والے سپر اسٹار کے روایتی ماڈل کو سخت چیلنج کیا گیا ہے، لیکن اسٹار پاور مکمل طور پر ختم نہیں ہوئی ہے۔ اس کے بجائے یہ موضوع مزید پیچیدہ ہوگیا ہے۔ اب کہانی زیادہ اہم ہوگئی ہے۔