’مسافر کیفے‘ ویب سیریز کے بعد اداکار اس کی دنیا کو حقیقت میں اتارنے کی تیاری میں ہیں۔ دونوں مقامات پر تعمیر جاری، فن کاروں کے قیام کے لئے تقریباً ۲۰۔۲۰؍ کمرے بھی ہوں گے۔

اداکار وکرانت میسی اپنی ویب سیریز ’مسافر کیفے‘ کی دنیا کو اب پردے سے باہر حقیقت میں لانے کی تیاری کر رہے ہیں۔ تازہ رپورٹس کے مطابق اداکار ہماچل پردیش اور اتراکھنڈ میں ’مسافر کیفے‘ کے نام سے ۲؍ کیفے کھولنے والے ہیں، جن کی تعمیر دونوں مقامات پر شروع ہوچکی ہے۔ یہ کیفے ویب سیریز میں دکھائے گئے کیفے کی طرز پر تیار کیے جائیں گے۔ رپورٹ کے مطابق دونوں منصوبوں میں کیفے کے ساتھ فن کاروں کے قیام کے لئے تقریباً ۲۰؍ کمرے بھی شامل ہوں گے۔ مقصد صرف کھانے پینے کی جگہ بنانا نہیں بلکہ ایسے تخلیقی مقامات تیار کرنا ہے جہاں فن کار قیام کرکے اپنے کام پر توجہ دے سکیں۔ ایک قریبی ذریعے نے اسے ’’مسافر کیفے کی دنیا کو پردے سے باہر وسعت دینے‘‘ کا منصوبہ قرار دیا ہے۔ 

یہ بھی پڑھئے: آر مادھون اور سدھارتھ نارائن نے اپنے پسندیدہ کھانے بتائے، دہی چاول مشترکہ پسند

وکرانت میسی نے ’مسافر کیفے‘ میں چندر کا کردار ادا کیا تھا۔ کہانی میں چندر پہاڑوں کا رخ کرتا ہے اور اپنے کیفے کا خواب پورا کرنے کی کوشش کرتا ہے۔ اس دوران اس کی ملاقات سدھا سے ہوتی ہے، جس کا کردار ویدیکا پنٹو نے ادا کیا، جبکہ مہیما مکوانا نے پریتی کا کردار نبھایا۔ سیریز میں چندر کی ذاتی زندگی، تعلقات اور مشکل فیصلوں کو کیفے کے پس منظر میں پیش کیا گیا ہے۔ یہ سیریز دیویہ پرکاش دوبے کے ناول سے ماخوذ ہے اور اس کی کہانی میں پہاڑی ماحول اور کیفے محض پس منظر نہیں بلکہ مرکزی کردار کی زندگی کا اہم حصہ ہیں۔ وکرانت میسی اس منصوبے سے اداکاری کے علاوہ اپنی پروڈکشن کمپنی ہوم میڈ اسٹوریز کے ذریعے بھی وابستہ ہیں۔ یہی پروڈکشن ادارہ اب ان حقیقی کیفے کے منصوبے سے بھی منسلک بتایا جارہا ہے۔ تاہم کمپنی یا وکرانت میسی کی جانب سے اس منصوبے کی باضابطہ تصدیق ابھی سامنے نہیں آئی ہے۔ 

یہ بھی پڑھئے:’’ٹشن‘‘ کیوں فلاپ ہوئی تھی؟ ۱۸؍ سال بعد سیف علی خان نے فلم کی اصل کمی بتائی

حقیقی زندگی میں ’مسافر کیفے‘ کا ایک مقام پہلے ہی مسوری میں موجود ہے، جہاں سیریز کے بعض مناظر فلمائے گئے تھے۔ یہ مقام جھری پانی کاسل نامی ورثہ عمارت کا حصہ ہے اور سیریز میں دکھائے گئے کیفے کے ماحول کو حقیقت میں بھی برقرار رکھتا ہے۔ یہاں لکڑی کے ڈھانچے، سبز چھتیں، کھلے صحن، باغیچے اور پہاڑی نظارے اس جگہ کی نمایاں خصوصیات ہیں۔ نئے کیفے بھی اسی تصور کو آگے بڑھائیں گے۔ رپورٹ کے مطابق ہماچل پردیش اور اتراکھنڈ میں بننے والی دونوں جگہوں کو سیریز میں دکھائے گئے کیفے کی طرز پر تیار کیا جارہا ہے، جبکہ فن کاروں کے لئے مخصوص رہائشی کمروں کا اضافہ انہیں عام کیفے سے مختلف بنائے گا۔ رپورٹس میں یہ بھی بتایا گیا ہے کہ دونوں مقامات پر تعمیراتی کام پہلے ہی جاری ہے، تاہم افتتاح کی تاریخ، درست مقامات اور کیفے کے مکمل تجارتی منصوبے کی تفصیلات ابھی سامنے نہیں آئی ہیں۔ اس لئے فی الحال اسے وکرانت میسی سے منسوب ایک زیرِ تعمیر منصوبے کے طور پر دیکھا جارہا ہے، نہ کہ باضابطہ طور پر کھلے ہوئے کاروبار کے طور پر۔