۱۹۳۴ء میں قائم ہونے والا یہ برانڈ دنیا بھرمیں لگژری فیشن کا اہم نام بن چکا ہے، یہاں اپنےناپ کے حساب سے کپڑے سلوائے جاسکتے ہیں۔

فیشن کی دنیا میں بعض برانڈز اپنی چمک دمک، اشتہاری مہمات اور بدلتے ہوئے رجحانات کی وجہ سے پہچانے جاتے ہیں، جبکہ کچھ نام ایسے ہوتے ہیں جن کی اصل شناخت خاموش وقار، صدیوں پرانی دستکاری اور معیار کے ساتھ غیر متزلزل وابستگی ہوتی ہے۔ اطالوی لگژری مردانہ ملبوسات کا معروف نام کنالی (Canali) بھی انہی برانڈز میں شامل ہے۔

کنالی محض کپڑےبنانے والی ایک کمپنی نہیں بلکہ اطالوی مردانہ ٹیلرنگ کی اس روایت کا نمائندہ نام ہے، جس میں لباس کو صرف جسم ڈھانپنے کا ذریعہ نہیں بلکہ شخصیت کے اظہار کا حصہ تصور کیا جاتاہے۔ عمدہ سوٹس، نفیس بلیزرز، اعلیٰ معیار کے شرٹس، جیکٹس، نٹ ویئر اور دیگر ملبوسات کے ذریعے کنالی نے دنیا بھر میں ایک ایسی شناخت قائم کی ہے جس کا تعلق شور شرابے سے نہیں بلکہ خاموش اور باوقار خوب صورتی سے ہے۔

یہ بھی پڑھئے: بِلس کلب: آرام، فٹنس اور فیشن کو ایک ساتھ جوڑنے والا ہندوستانی برانڈ

آغاز کیسے ہوا

کنالی کی داستان کا آغاز اٹلی کے علاقے بریانتسا میں ہوا، جو طویل عرصے سے کپڑے اور دستکاری کی روایت کے لیے معروف رہا ہے۔ کنالی خاندان کی ٹیلرنگ سے وابستگی بیسویں صدی کے ابتدائی برسوں تک جاتی ہے، تاہم برانڈ کی باقاعدہ بنیاد۱۹۳۴ءمیںپڑی، جب بھائیوں جیاکومو اور جیووانی کنالی نے تریوجیو میں مردانہ ملبوسات کی تیاری کے لیے اپنا کاروبار قائم کیا۔

ابتدا ایک چھوٹی سی ٹیلرنگ ورکشاپ سے ہوئی، جہاں مردانہ لباس انتہائی مہارت اور باریک بینی سے تیار کیا جاتا تھا۔ چند ہی برسوں میںکمپنی ترقی کرنے لگی اور دوسری جنگ عظیم سے قبل اس کے ملازمین کی تعداد تقریباً ایک سو تک پہنچ گئی۔ تاہم جنگ نے یورپ کی دیگر صنعتوں کی طرح کنالی کے کاروبار کو بھی متاثر کیا۔ 

یہ بھی پڑھئے: جیک اینڈ جونز: نوجوانوں کے فیشن سے عالمی شناخت تک کا سفر

برانڈ کی خصوصیت

کنالی کا نام آتے ہی سب سے پہلے ذہن میں اس کے شاندار سوٹس کاتصور آتا ہے۔ اگرچہ کنالی کی شناخت بنیادی طورپر مردانہ ٹیلرنگ سے وابستہ ہے، لیکن آج برانڈ کی دنیا صرف سوٹس تک محدود نہیں رہی۔کنالی کےکلیکشن میں بلیزرز، شرٹس، پتلون، نٹ ویئر، لیدر جیکٹس، آؤٹر ویئر، جوتے، اسنیکرز اور مختلف لوازمات شامل ہیں۔ اس کے علاوہ ٹائیز، پاکٹ اسکوائرز، اسکارف اور دیگر ایکسیسریز بھی اس کی پیشکش کا حصہ ہیں۔ لگژری ٹیلرنگ کی دنیا میں حسبِ خواہش لباس تیار کروانے کی روایت ہمیشہ سے اہم رہی ہے۔ کنالی نے اس روایت کو جدید شکل دیتے ہوئے ’می بائی کنالی‘ اور ’سو میسورا‘کے ذریعے اپنے صارفین کو ذاتی پیمائش اور پسند کے مطابق ملبوسات تیار کروانے کا موقع فراہم کیا۔

عالمی سطح پر توسیع

ایک مقامی اطالوی ورکشاپ سے شروع ہونے والا کنالی آج عالمی لگژری فیشن کا ایک بڑا نام بن چکا ہے۔ برانڈ دنیا کے متعدد ممالک میںاپنی بوتیکس اور منتخب ریٹیل اسٹورز کے ذریعے موجود ہے۔کنالی کی ترقی کا سفر خاص طور پر۱۹۸۰ءکی دہائی میں بین الاقوامی منڈیوں تک پھیلنے سے تیز ہوا۔ پیرس، نیویارک اور لندن جیسےعالمی شہروں میں اس کی موجودگی قائم ہوئی،جبکہ بعد کے برسوں میںایشیا اور دیگر بین الاقوامی مارکیٹوں میں بھی برانڈ نے اپنی جگہ بنائی۔ آج کنالی دنیا کے مختلف خطوں میں موجود ہے اور اطالوی مردانہ لگژری فیشن کا عالمی نمائندہ تصور کیا جاتا ہے۔ 

ممبئی میں موجودگی

ہندوستان میں لگژری فیشن کی مارکیٹ میں اضافے کے ساتھ کنالی جیسے عالمی برانڈز نے بھی اپنی موجودگی مضبوط کی ہے۔ خاص طورپربڑے شہروں کے ایسے صارفین، جو اعلیٰ معیار کے رسمی مردانہ لباس اور بین الاقوامی ٹیلرنگ برانڈز میں دلچسپی رکھتے ہیں، کنالی کے اہم صارفین میں شمار ہوتے ہیں۔

ممبئی میں کنالی کی بوتیکس شہر کے ۲؍اہم لگژری شاپنگ مالز میںموجود ہیں۔ ایک بوتیک لوئر پریل کے پلاڈیم مال میں ہے، جبکہ دوسری بی کے سی کے جیو ورلڈ پلازہ میں واقع ہے۔ اس کے علاوہ ہندوستان میں حیدرآباد اور کولکاتا میں بھی برانڈ کی موجودگی درج ہے۔