جزیرے کے مختلف حصوں میں خوب صورت ساحل پھیلے ہوئے ہیں، جن میں رادھا نگر، ایلیفینٹ بیچ، وجے نگر، کالا پتھر اور گووند نگر نمایاں ہیں۔

ہندوستان کے انڈمان و نکوبار جزائر میں واقع ہیولاک جزیرہ، جسے اب سرکاری طور پر سوراج دیپ کہا جاتا ہے، سمندر، سفید ریت، گھنےجنگلات اور مرجانی چٹانوں کی وجہ سے ملک کے خوب صورت ترین ساحلی مقامات میں شمار ہوتا ہے۔

یہاں کا اصل حسن صرف ساحلوں میں نہیں بلکہ اس بات میں بھی ہے کہ ایک ہی جزیرے پر خاموشی، قدرتی مناظر اور سمندری مہم جوئی تینوں کا لطف لیا جاسکتا ہے۔ ضلع ساؤتھ انڈمان کی سرکاری سیاحتی معلومات بھی ہیولاک کو خاص طور پر رادھا نگر بیچ کے لیے معروف قرار دیتی ہیں۔ 

یہ بھی پڑھئے:تواَنگ: ہماچل پردیش میں بادلوں، برف اور آبشاروں کی دلکش سرزمین

رادھا نگر بیچ

ہیولاک کا سب سے مشہور سیاحتی مقام رادھانگر بیچ ہے، جسے بیچ نمبر۷؍ بھی کہا جاتا ہے۔ جزیرے کے مغربی ساحل پر واقع یہ ساحل اپنی سفید ریت، نیلے سمندر اور گھنے سبز جنگل کیلئےمشہورہے۔ ۲۰۰۴ء میں ٹائم میگزین نے اسے ایشیا کا بہترین ساحل قرار دیاتھا۔بعد میں اسے بلیو فلیگ سرٹیفیکیشن بھی حاصل ہوئی، جو صفائی، ماحولیاتی انتظام اور سیاحوں کی سہولت و سلامتی کے اعلیٰ معیار کی علامت ہے۔ 

رادھانگر کی خاص بات اس کا غروب آفتاب کا منظرہے۔ شام کے وقت جب سورج سمندر کی طرف ڈھلتا ہے تو آسمان کے رنگ پانی پر بکھر جاتے ہیں۔ ساحل پر چہل قدمی، تیراکی اور غروب آفتاب دیکھنا یہاں کی مقبول سرگرمیاں ہیں۔

ایلیفینٹ بیچ

ایلیفینٹ بیچ ہیولاک کا دوسرا بڑا سیاحتی مرکز ہے اور اسے خاص طور پر آبی کھیلوں کیلئےجاناجاتاہے۔یہاں اسنورکلنگ کے ذریعے سمندرکے اندر موجود مرجانی چٹانوں اور رنگ برنگی سمندری حیات کو قریب سے دیکھنے کا موقع ملتا ہے۔ سرکاری سیاحتی مواد میں بھی ایلیفینٹ بیچ کیلئے اسنورکلنگ، کائیکنگ، جیٹ اسکی اور دیگر سرگرمیوںکاذکرہے۔جو لوگ اسکووبا ڈائیونگ یا اسنورکلنگ کا تجربہ کرناچاہتے ہیں، ان کیلئے یہ ساحل خاص کشش رکھتا ہے۔یہاں پہنچنے کیلئے کشتی کے علاوہ جنگل کے راستے پیدل جانے کا آپشن بھی دستیاب رہتا ہے، اگرچہ موسم اور مقامی حالات کے مطابق ٹریل کی دستیابی بدل سکتی ہے۔ 

کالا پتھر بیچ

کالا پتھر بیچ ہیولاک کے نسبتاً پُرسکون ساحلوں میں شمار ہوتا ہے۔ یہاں سفید ریت کے ساتھ کالا پتھر اور سمندر کا نیلا پانی ایک خوب صورت منظر پیش کرتے ہیں۔ یہی منفرد امتزاج اس ساحل کو دوسرے ساحلوں سے الگ بناتا ہے۔کالا پتھر خاص طور پر صبح کے وقت خوب صورت دکھائی دیتا ہے۔ سورج طلوع ہونے کے وقت آسمان کی روشنی سمندر اور ساحل پرپھیلتی ہے تو یہاں کا منظر نہایت دلکش ہوجاتا ہے۔

یہ بھی پڑھئے:چارلس ٹر ِٹ: برطانوی معیار اور کلاسیکی انداز پر مبنی فیشن برانڈ

وجے نگر بیچ

وجے نگر بیچ نسبتاً پرسکون ماحول کی وجہ سے ان لوگوں کو پسند آتا ہے جو رادھا نگر جیسے مصروف سیاحتی مقام سے دور کچھ وقت گزارنا چاہتےہیں۔ یہ ساحل کالا پتھرکی سمت جانے والے راستے پر واقع ہے اور یہاں سمندر کا سکون، درختوں کی قطاریں اور نرم ساحلی منظر ایک الگ کیفیت پیدا کرتے ہیں۔یہاں کا ماحول خاص طور پر صبح یا شام کی سیر کے لیے موزوں ہے۔ سرکاری سیاحتی نقشے میں بھی وجے نگر بیچ کو سوراج دیپ کے نمایاں مقامات میں شامل کیا گیا ہے۔ 

گووند نگر بیچ

گووند نگر بیچ ہیولاک کے آباد حصے کے قریب واقع ہے اور جزیرے پر قیام کرنے والے سیاحوں کیلئےنسبتاً آسان رسائی والا ساحل ہے۔یہاں سے سمندر کا منظر دیکھنے، ساحل پر چہل قدمی کرنے اور پرسکون وقت گزارنے کا موقع ملتا ہے۔گووند نگر ہیولاک کے آبی کھیلوں اور ڈائیونگ کی سرگرمیوں کیلئے بھی ایک اہم مرکز ہے، اسلئے اس علاقے میں مختلف ڈائیونگ مراکز اور ٹور آپریٹرز ہیں۔

لائٹ ہاؤس اور جزیرے کے جنگلات

ہیولاک میں ساحلوں کے علاوہ گھنے جنگلات بھی اس کے قدرتی حسن کا اہم حصہ ہیں۔ جزیرے کے شمالی حصے میں لائٹ ہاؤس پوائنٹ بھی سرکاری سیاحتی نقشے میں نمایاں کیا گیا ہے۔ جنگل اورساحل کا یہ امتزاج اسےمحض ایک بیچ ہالی ڈے کی منزل نہیں رہنے دیتا۔

اسکووبا ڈائیونگ اور زیرِ آب دنیا

ہیولاک کی سب سےبڑی کشش صرف اس کے ساحل نہیں بلکہ سمندر کے نیچے کی دنیا بھی ہے۔ جزیرے کے اطراف مرجانی چٹانیں اور مختلف اقسام کی سمندری حیات موجود ہیں، جس کی وجہ سے اسکوبا ڈائیونگ اور سنورکلنگ کیلئے مشہور ہے۔تربیت یافتہ افراد کے ساتھ ابتدائی سطح کے غوطہ خوری کے پروگرام بھی کیے جاتے ہیں، جبکہ تجربہ رکھنے والے افراد کے لیے مختلف ڈائیو سائٹس موجود ہیں۔ سمندر میں اترنے سے پہلے موسم، پانی کی صورت حال جانچ لیں۔