اردو محض ایک زبان نہیں، ہماری تہذیبی شناخت، ہمارے احساسات کی ترجمان اور ہماری اجتماعی تاریخ کا روشن حوالہ ہے۔

اردو محض ایک زبان نہیں، ہماری تہذیبی شناخت، ہمارے احساسات کی ترجمان اور ہماری اجتماعی تاریخ کا روشن حوالہ ہے۔ یہ وہ زبان ہے جس نے میر کے درد، غالب کی فکر اور علامہ اقبال کے فلسفۂ خودی کو الفاظ کا لباس عطا کیا۔ لیکن افسوس کہ ہر سال۹؍ نومبر کو یومِ اقبال اور یومِ اردو کی مناسبت سے محفلیں سجتی ہیں، تقاریر ہوتی ہیں، مضامین لکھے جاتے ہیں، مگر اردو زبان کے بنیادی مسائل آج بھی ہمارے سامنے اسی طرح موجود ہیں۔ ۹؍نومبر کا دن ہمیں علامہ اقبال کی یاد دلاتا ہے۔ اقبال محض ایک عظیم شاعر نہیں بلکہ ایک مفکر، فلسفی اور بیدار ذہن رکھنے والے انسان تھے۔ ان کی شاعری نے اردو زبان کو فکری وسعت، معنوی گہرائی اور ایک نئی معنویت عطا کی۔ اقبال نے اپنی شاعری کے ذریعے انسان کو خود شناسی، بلند خیالی، عمل اور مسلسل جدوجہد کا پیغام دیا۔ سوال یہ ہے کہ ہم اقبال کو کس حد تک سمجھ پائے ہیں؟ کیا اقبال سے ہماری محبت صرف ان کے اشعار پڑھنے، ان کی تصویریں شیئر کرنے اور انکے یومِ پیدائش پر تقاریب منعقد کرنے تک محدود نہیں ہوگئی؟ اگر اقبال کے افکار ہماری عملی زندگی کا حصہ نہیں بنتے تو پھر ان سے ہماری وابستگی کا مقصد کیا رہ جاتا ہے؟

اقبال کا اردو زبان پر بڑا احسان یہ ہے کہ انہوں نے اس زبان کو محض جذبات و احساسات کے اظہار کا ذریعہ نہیں بنایا بلکہ اس میں فکر، فلسفہ، خودی، ملت اور انسانی عظمت جیسے موضوعات کو غیر معمولی قوت کیساتھ پیش کیا۔ اسی طرح غالب نے اردو کو ایسی فکری بلندی اور اسلوب کی ندرت عطا کی جس کی مثال کم ملتی ہے۔ غالب کی زبان، محاورے اور طرزِ اظہار آج بھی اہلِ ادب کے لئے درس گاہ کی حیثیت رکھتے ہیں۔ اقبال اور غالب کا ذکر کرتے ہوئے ہمیں یہ بھی سوچنا چاہیے کہ کیا ہماری نئی نسل ان عظیم ادبی سرمائے سے واقف ہے؟ کیا ہمارے نوجوان غالب کے اشعار کا مفہوم سمجھتے ہیں؟ کیا وہ اقبال کی نظموں میں پوشیدہ پیغام تک رسائی رکھتے ہیں؟ یا ہم نے انہیں صرف نصابی کتابوں کے چند منتخب اشعار تک محدود کر دیا ہے؟

یہ بھی پڑھئے: معاشرہ کی اصلاح چاہتے ہیں؟ اپنی ذات سے اصلاح کا عمل شروع کیجئے

آج اردو زبان کی صورتِ حال ایک عجیب تضاد کا شکار ہے۔ ایک طرف اردو بولنے، پڑھنے اور لکھنے والوں کی بڑی تعداد موجود ہے، دوسری طرف اردو تعلیم، مطالعے اور تحریر کے رجحان میں کئی مقامات پر کمی محسوس کی جا رہی ہے۔ گھروں میں اردو بولی تو جاتی ہے، مگر بچوں کو اردو پڑھنے اور درست لکھنے کی تربیت کم دی جاتی ہے۔ والدین اپنی نئی نسل کو جدید تعلیم دلانے کی خواہش میں انگریزی اور دیگر زبانوں پر توجہ دیتے ہیں، جو یقیناً وقت کی ضرورت ہے، لیکن اپنی مادری یا تہذیبی زبان سے بے اعتنائی کسی بھی صورت دانش مندی نہیں۔ دوسری زبانیں سیکھنا ترقی ہے، مگر اپنی زبان کو بھول جانا ترقی نہیں کہلا سکتا۔

سوشل میڈیا کے اس دور نے جہاں معلومات اور اظہار کے بے شمار مواقع فراہم کیے ہیں، وہیں اردو کے لیے نئے امکانات بھی پیدا کیے ہیں۔ آج فیس بک، وہاٹس ایپ، یوٹیوب، انسٹاگرام اور دیگر ڈیجیٹل پلیٹ فارمز پر اردو مواد کی وسیع دنیا موجود ہے۔ اردو کتابیں، ادبی نشستیں، مشاعرے، افسانے اور مضامین چند لمحوں میں دنیا کے کسی بھی گوشے تک پہنچ سکتے ہیں۔ لیکن اسی سوشل میڈیا نے اردو زبان کے سامنے ایک نیا چیلنج بھی کھڑا کیا ہے۔ رومن اردو کا بڑھتا ہوا استعمال، املا کی غلطیاں، الفاظ کی بے جا اختصار پسندی اور زبان کے قواعد سے بے توجہی نے اردو تحریر کے معیار کو متاثر کیا ہے۔ سہولت کے نام پر ہم آہستہ آہستہ اردو رسم الخط سے دور ہوتے جا رہے ہیں۔ ضرورت اس بات کی ہے کہ سوشل میڈیا کو اردو کے زوال کا سبب بنانے کے بجائے اس کی ترقی کا مؤثر وسیلہ بنایا جائے۔

یہاں اردو اخبارات کی خدمات کو نظر انداز نہیں کیا جا سکتا۔ محدود وسائل، کم ہوتے قارئین اور بدلتے صحافتی ماحول کے باوجود اردو اخبارات زبان و ادب کی آبیاری میں اپنا کردار ادا کر رہے ہیں۔ وہ نہ صرف روزمرہ کے حالات سے قارئین کو باخبر رکھتے ہیں بلکہ ادبی مضامین، افسانے، تبصرے، کتابوں کے تعارف اور نئی نسل کی تخلیقی کاوشوں کو بھی جگہ دیتے ہیں۔ تاہم وقت کا تقاضا ہے کہ اردو اخبارات اپنی اشاعتی سرگرمیوں کے ساتھ ڈیجیٹل دنیا میں بھی اپنی موجودگی کو مزید مضبوط کریں۔ نوجوان قلم کاروں کیلئے خصوصی صفحات، طلبہ کے لیے آسان زبان میں علمی مواد، ادبی مقابلے اور آن لائن مطالعے کے مواقع فراہم کیے جائیں تاکہ نئی نسل اخبار اور زبان دونوں سے جڑ سکے۔

اردو کی ترقی و ترویج صرف اردو اساتذہ، ادیبوں، شاعروں یا صحافیوں کی ذمہ داری نہیں بلکہ ہر اس شخص کا فرض ہے جو اس زبان سے محبت کا دعویٰ کرتا ہے۔ ہمیں اپنے گھروں میں بچوں کو اردو پڑھنے کی عادت ڈالنی ہوگی۔ اسکولوں میں اردو کو محض ایک مضمون کے بجائے تخلیقی اظہار کا ذریعہ بنانا ہوگا۔ تقریری، تحریری، مضمون نویسی اور افسانہ نگاری کے مقابلے منعقد کرنے ہوں گے۔ جدید ٹیکنالوجی کے ذریعے اردو ای بکس، آڈیو بکس، آن لائن لغات اور معیاری تعلیمی ویڈیوز تیار کرنی ہوں گی۔ اردو کے اساتذہ کو بھی روایتی تدریسی طریقوں سے آگے بڑھ کر نئی نسل کی دلچسپی اور جدید تعلیمی تقاضوں کے مطابق تدریس اختیار کرنی ہوگی۔

یہ بھی پڑھئے: یوم ِ اُردو، اہل اُردو اَور زبانِ اُردو

سب سے اہم بات یہ ہے کہ ہمیں اردو کے نام پر صرف جذباتی گفتگو نہیں بلکہ عملی اقدامات کرنے ہوں گے۔ اردو کتابیں خریدنا، پڑھنا اور دوسروں کو پڑھنے کی ترغیب دینا، نئے لکھنے والوں کی حوصلہ افزائی کرنا، بچوں کے لیے دلچسپ ادبی مواد تیار کرنا اور اردو کے ڈیجیٹل ذخیرے کو وسعت دینا وقت کی اہم ضرورت ہے۔ اردو اداروں، انجمنوں اور تعلیمی تنظیموں کو بھی چاہیے کہ وہ پورے سال اردو کے فروغ کے لیے مستقل منصوبہ بندی کریں۔

اصل سوال یہ نہیں کہ اردو کا مستقبل کیا ہوگا، بلکہ یہ ہے کہ ہم اردو کے مستقبل کیلئے آج کیا کر رہے ہیں؟ ہر سال یومِ اردو آتا ہے، تقاریب منعقد ہوتی ہیں، اردو کی عظمت کے قصیدے پڑھے جاتے ہیں اور پھر اگلے دن زندگی معمول کے مطابق چلنے لگتی ہے۔ اردو کے مسائل، اردو اسکولوں کی صورتِ حال، طلبہ کی کم ہوتی دلچسپی، کتابوں سے دوری اور روزگار کے محدود مواقع جیسے سوالات پھر پس منظر میں چلے جاتے ہیں۔اقبال کو خراجِ عقیدت پیش کرنے کا بہترین طریقہ یہ نہیں کہ ہم صرف ان کے اشعار دہرائیں، بلکہ یہ ہے کہ ان کے پیغامِ عمل کو اپنی زندگی میں جگہ دیں۔ غالب کو یاد کرنے کا حق بھی اسی وقت ادا ہوگا جب ہم ان کی زبان و بیان کی خوبیوں کو سمجھنے اور اپنی نئی نسل تک پہنچانے کی کوشش کریں گے۔یاد رکھئے! زبانیں صرف تقریبات، نعروں اور دعوؤں سے زندہ نہیں رہتیں، انہیں بولنے، پڑھنے، لکھنے، سکھانے اور اگلی نسل تک منتقل کرنے سے زندگی ملتی ہے۔ اردو کا مستقبل کسی ایک ادارہ، اخبار یا شاعر کے ہاتھ میں نہیں، بلکہ ہم سب کی مشترکہ ذمہ داری ہے۔ آئیے! اس یومِ اردو پر صرف اردو سے محبت کا اظہار نہ کریں بلکہ اردو کیلئے کچھ کرنے کا عہد بھی کریں، کیونکہ جس دن ہماری نئی نسل اردو پڑھنے، لکھنے اور اس میں سوچنے پر فخر کرنے لگے گی، اسی دن اقبال کے خواب اور اردو کے روشن مستقبل کے درمیان ایک مضبوط رشتہ قائم ہوگا۔

(مضمون نگار معلم ہیں اور مالیگاؤں سے تعلق رکھتے ہیں۔)