اعمالِ صالحہ و اخلاق ِ فاضلہ کے قائم رکھنے کے لئے ذوقِ فطری دیا گیا، خیر و شر کی حد بندی کردی گئی لیکن کیا تمہارے اعمال اس قانونِ الٰہی سے آزاد ہیں؟ نہیں!

دنیا معدوم تھی، وجود میں آئی، پھر معدوم ہو جائے گی۔ نباتات، حیوانات، معدنیات کا وجود صفحہ ہستی پر نہ تھا۔ خدا نے ان کو پیدا کیا اور وہی ایک دن ان کو الٹ بھی دے گا۔ دنیا کے نشیب و فراز مٹ جائیں گے اور خدا اور خدا کے فرشتے ایک ہموار میدان میں کھڑے ہوکر انسان کے اعمالِ فاسدہ و صالحہ کا جائزہ لیں گے:

’’یقیناً جب زمین پاش پاش کر کے ریزہ ریزہ کر دی جائے گی، اور آپ کا رب جلوہ فرما ہوگا اور فرشتے قطار در قطار (اس کے حضور) حاضر ہوں گے۔‘‘ (سورہ الفجر:۲۲)

اعمالِ صالحہ و اخلاق ِ فاضلہ کے قائم رکھنے کے لئے ذوقِ فطری دیا گیا، خیر و شر کی حد بندی کردی گئی لیکن کیا تمہارے اعمال اس قانونِ الٰہی سے آزاد ہیں؟ نہیں! تمہارے اعمال، تمہارے اخلاق، تمہارے فضائل بھی دنیا کی اور  چیزوں کی طرح معدوم تھے ۔ قوت ِ صالحہ نے ان کو پیدا کیا مگر وقت و مکان کے لحاظ سے ان میں بھی ایک سلسلۂ وجود و عدم جاری ہے۔

یہ بھی پڑھئے: ایک سے زائد بیوی کی شرعی اجازت اور مسلم پرسنل لاء میں بار بار دخل اندازی

جس طرح دنیا کی ایک عمر ہے، اشخاص کی ایک محدود زندگی ہے،اقوام کے موت و حیات کی ایک مدت ہے، یہی حال تمہارے فضائل و مناقب کا بھی ہے۔ حضرت آدم علیہ السلام کا سلسلۂ نسب قیامت تک قائم رہے گا مگر بنی آدم کا نسب چار پشتوں سے زیادہ نہیں چل سکتا۔ ایک شخص  جدوجہد کرکے فضائل کا اکتساب کرتا ہے ، علوم سیکھتا ہے، حکومت کی بنیاد ڈالتا ہے، مذہب کا سنگ بنیاد رکھتا ہے، اس کا بچہ اس جدوجہد کا ذکر اس کی زبان سے سنتا ہے، اس کے اعمال کو دیکھتا ہے، باپ مر جاتا ہے اور وہ انہی طریقوں پر عمل کرتا ہے جن پر باپ نے عمل کرکے یہ بنیاد قائم کی تھی۔ لیکن دیوار میں ذرا سا شگاف ہوجاتا ہے، کیونکہ باپ حصول ِ محاسن کا مؤجد تھا، یہ مقلد ہے اور مقلد و مجتہد کا فرق ظاہر ہے ۔ دو پشت اس طرح گزر جاتی ہے اور شرف خاندانی قائم رہتا ہے۔ تیسری پشت شروع ہوتی ہے اور یہ سلسلۂ خاندان صرف آباء و اجداد کی سنی سنائی باتوں کی تقلید کرتا ہے ۔ اس لئے شگاف میں اور زیادہ وسعت پیدا ہوجاتی ہے۔ پھر چوتھی پشت شروع ہوتی ہے اور مغرور انسان آباء و اجداد کے فضائل اور جدوجہد کا مرقع زریں دیکھتا ہے اور یقین کرلیتا ہے کہ اب یہ وراثت دائمی ہے۔ جدوجہد اور عمل حق کی کوئی ضرورت نہیں۔  جب قلعہ مستحکم ہوگیا تو پھر فوج کی کیا حاجت ہے؟ پس وہ ہاتھ پاؤں توڑ کر بیٹھ جاتا ہے۔ یہ خیال دیکھ کر محرکات و وسائل عمل بھی اس کو چھوڑ دیتے ہیں اور کسی دوسرے خاندان کا ہاتھ پکڑ لیتے ہیں۔ وہ خاندان ان آلات و اسلحہ کو لے کر اٹھتا ہے،  اور قلعہ فتح کرلیتا ہے۔ دیوار دھم سے گر پڑتی ہے اور چار پشت کے بعد اعمالِ صالحہ کا گھرانا عموماً دوسری جگہ منتقل ہوجاتا ہے۔

اگرچہ بہت سے خاندانوں کا شرف اس سے زیادہ مدت قائم رہتا ہے اور بہت سے خاندان اس سے پہلے بھی برباد ہوجاتے ہیں، لیکن معلوم ہوتا ہے کہ اعمالِ صالحہ کی  متوسط عمر یہی ہے۔ قرآن حکیم اور حدیث و تاریخ سے اس کی تائید ہوتی ہے:

’’ان لوگوں پر جو ایمان لائے اور نیک عمل کرتے رہے اس (حرام) میں کوئی گناہ نہیں جو وہ (حکم ِحرمت اترنے سے پہلے) کھا پی چکے ہیں جب کہ وہ (بقیہ معاملات میں) بچتے رہے اور (دیگر اَحکامِ اِلٰہی پر) ایمان لائے اور اَعمالِ صالحہ پر عمل پیرا رہے، پھر (اَحکامِ حرمت کے آجانے کے بعد بھی ان سب حرام اَشیاء سے پرہیز کرتے رہے اور (اُن کی حرمت پر صدقِ دل سے ایمان لائے، پھر صاحبانِ تقویٰ ہوئے اور (بالآخر) صاحبانِ اِحسان (یعنی اﷲ کے خاص محبوب،  مقرب اور نیکوکار بندے بن گئے، اور اﷲ اِحسان والوں سے محبت فرماتا ہے۔‘‘ (المائدہ:۹۳)

یہ بھی پڑھئے: میراث کی تقسیم، اہمیت اور ہمارا رویہ