آقائے نامدار محمد رسول اللہ صلی اللہ علیہ و سلم فرماتے ہیں: ’’کوئی بیماری از خود متعدی نہیں ہوتی، نہ ہی بدشگونی کوئی چیز ہے، اور اُلّو (کوئی منحوس چیز نہیں ہے) اور نہ ہی ماہِ صفر (میں کوئی نحوست ہے)۔

یقیناً تمام  تعریفیں اللہ عز وجل کے لئے ہیں ، اس کے حکم کو کوئی رد نہیں کر سکتا، اور اس کے حکم پر تعاقب نہیں کر سکتا، اور ہر چیز اسی کے قضا و قدر کی مرہون  ہے، میں گواہی دیتا ہوں کہ اللہ کے سوا کوئی بھی معبودِ برحق نہیں ، اور اس کا ربوبیت، الوہیت ، اور اسماء و صفات میں کوئی بھی شریک نہیں ہے، اور میں یہ بھی گواہی دیتا ہوں محمد  اللہ بندے اور اس کے رسول  ہیں، یا اللہ! آپؐ پر، آپؐ کی آل، اور صحابہ کرامؓ پر رحمتیں، سلامتی، اور برکتیں نازل فرما۔ معزز سامعین، وحی کے مطابق عقیدہ توحید کے اصولوں میں  یہ بھی شامل ہے کہ ہر قسم کے خرافات سے خبردار کیا جائے، اور ہر قسم کی گمراہی سے  متنبہ کیا جائے۔

بد شگونی زمانہ قدیم سے لے کر آج تک کچھ لوگوں میں پائی جانے والی خرافات میں سے ایک ہے، اسی  طرح کوئی نظر آنے والی چیز یا سنا جانے والا لفظ طبیعت کو ناگوار گزرے یا موروثی طور پر کسی چیز کو ناپسند کیا جائے؛ ان چیزوں کے بارے میں بد شگونی لینا بھی انہی خرافات میں شامل ہے، مثلاً: ماہِ صفر میں کسی خاص پرندے یا لفظ کو دیکھنے یا سننے کو بدشگونی سے منسلک کرنا۔ چنانچہ کچھ لوگ اسی بد شگونی کی وجہ سے اپنے عزائم کو ختم کر  دیتے ہیں اور اپنے مقاصد سے ہٹ جاتے ہیں۔ اس قسم کی باطل بدفالی  اور وہم و  بد شگونی  پر مشتمل نظریات اسلام کی نظر میں کم عقلی اور کھوکھلے پن کی عکاسی کرتے ہیں، اور صحیح عقیدہ کے منافی ہیں؛ جو کہ خالق، قادر، مختار کل ، نفع و نقصان کے مالک اللہ کی ذات پر توکل کا نام ہے، کیونکہ تقدیر میں لکھے گئے اسبابِ کونیہ کے مطابق کوئی بھی کام اللہ کے ارادے، قدرت، اور اجازت کے بغیر  ہو ہی نہیں سکتا۔ اسی لئے شرعی نصوص  نے غلط نظریات سے خبردار کیا، اور انہیں جڑ سے اکھاڑ کر رکھ دیا، تا کہ توحید کا عقیدہ صحیح سلامت باقی رہے۔

یہ بھی پڑھئے: اسلام نے کم سنی کے نکاح کی ترغیب نہیں دی، لیکن مصلحتوں کی گنجائش بھی رکھی ہے

آقائے نامدار محمد رسول اللہ صلی اللہ علیہ و سلم فرماتے ہیں: ’’کوئی بیماری از خود متعدی نہیں ہوتی، نہ ہی بدشگونی کوئی چیز ہے،  اور اُلّو (کوئی منحوس چیز نہیں ہے) اور نہ ہی ماہِ صفر (میں کوئی نحوست ہے)۔( بخاری و مسلم) اس حدیث مبارکہ کا معنی و مفہوم  یہ ہے کہ ان اشیاء کی بذاتہ خود کوئی تاثیر نہیں ہے، اور کسی بھی مسلمان کو ان کے بارے میں غلط نظریات بنانے کی اجازت نہیں ہے، اور نہ ہی ان کے بارے میں توجہ کرنی چاہئے، چنانچہ  ایک مؤمن پر یہ واجب ہے کہ وہ ان باطل امور اور غلط تصورات کے سامنے ہتھیار نہ پھینکے، اور اپنی راہ اور سِمت سے ذرا بھی نہ ہٹے،  اور اپنے عزائم کی تکمیل ، اور ضرورت و حاجت کو مکمل کر کے ہی دم لے، کیونکہ  بد شگونی ایسا شرک ہے جو کہ عقیدۂ توحید کی کم ترین سطح کے بھی منافی ہے۔ ابن مسعود رضی اللہ عنہ سے مرفوعاً مروی ہے کہ :’’بدشگونی شرک ہے، بد شگونی شرک ہے۔‘‘