آسام کے وزیر اعلیٰ ہیمنت بسوا شرما، جو پہلے کانگریس کے ساتھ تھے اور گزشتہ کچھ برسوں سے بی جے پی کے ساتھ ہیں، نے میاں (بنگالی بولنے والے مسلمانوں) کے خلاف اتنے نفرت انگیز بیانات دیئے ہیں جو اس سے قبل کبھی نہیں سنے گئے تھے۔۲۷؍ جنوری کو شرما نے کہا تھا کہ ’’ایس آئی آر کے ذریعے ۴؍ سے ۵؍ لاکھ میاں کے نام ووٹر لسٹوں سے ہٹا دیئے جائیں گے۔‘‘

یہ بھی پڑھئے: نفرت انگیز تقاریر اور نفرت پر مبنی جرائم پر اپوزیشن کی سرد مہری

شرما نے کھلے عام عوام کو بھڑکاتے ہوئے کہا کہ’’انہیں ہر طرح سے ہراساں کیا جائے، اگر رکشا کا کرایہ ۵؍ روپے ہے تو انہیں۴؍ روپے ہی  دیںتاکہ آسام میں رہنا ان کیلئے ناقابل برداشت ہو جائے اور وہ خود یہاں سے چلے جائیں گے۔‘‘اتنا کہنے کے بعدشرما نے   رائفل سے گولیاں چلاتے ہوئے ایک ویڈیو پوسٹ کیا، جس میں گولیاں کچھ ہی فاصلے پرکھڑے ایک آدمی اور ایک لڑکے کو لگ رہی ہیں جو ٹوپی پہنے ہوئے ہیں۔ تاہم اب اس پوسٹ کو ڈیلیٹ کر دیا گیا ہے۔ اس کے بعد انسانی حقوق کے معروف کارکن اور مصنف ہرش مندر نے ’آسام میں بنگالی بولنے والے مسلمانوں کے خلاف نفرت، ہراساں کرنے اور امتیازی سلوک کو فروغ دینے کے مقصد سے نفرت انگیز تقریر پوسٹ کرنے‘ پر عدالت میں ایک  عرضی داخل کی۔عرضی میں، انہوں نے آسام کے وزیر اعلیٰ کے خلاف فوری کارروائی کی درخواست کی۔ جواب میں، شرما نے کہا کہ وہ مندر کے خلاف  این آر سی کے دوران مسلمانوں کی مدد کرنے کا الزام لگا کرمتعدد ایف آئی آر درج کرائیں گے، اور اس بات کو یقینی بنائیں گے کہ انہیں جیل بھیجا جائے۔

سوال یہ پیدا ہوتا ہے کہ ہمارے ملک میں صدیوں پرانی ہم آہنگی کی ثقافت کہاں گئی، جہاں آسام کے اذان پیر اور شنکر دیو ہم آہنگی کی بات کرتے تھے اور آسام میں رہتے تھے؟ کھانے، ادب، فن تعمیر اور مذہبی تہوار جیسے شعبوں میں ہندوؤں اور مسلمانوں کے باہمی اثر و رسوخ کو کیا ہوا ہے؟ موجودہ صورتحال انتہائی مایوس کن اور افسوس ناک ہے۔ان سب کے درمیان اتراکھنڈ کے کوٹ دوار کا واقعہ سامنے آیا ہے جہاں ایک معمر مسلم دکاندار گزشتہ ۳۰؍ برسوں سے ’بابا اسکول ڈریسز‘ کے نام سے  ایک دکان چلا رہا تھا۔ بجرنگ دل  کے رضاکاروں نے ان سے کہا کہ وہ اپنی دکان کے نام  میں لفظ ’بابا‘ استعمال نہیں کر سکتے کیونکہ وہ اسے ہندو لفظ سمجھتے ہیں۔ یہ دیکھ کردیپک کمار نامی ایک شخص نے مداخلت کی۔ جب دیپک نے شدت پسند بجرنگ دلیوں کا سامنا کیا تو پولیس خاموش تماشائی بنی رہی اور بعد میں دیپک کمار اور اس کے دوست کے خلاف ایف آئی آر بھی درج کی جبکہ بجرنگ دل کے کارکنوں کے خلاف درج ایف آئی آر میں ملزمین کو نامعلوم کے طور پر درج کیا گیا ہے۔

یہ بھی پڑھئے: پیرس سے میسور تک

لیکن اس پورے واقعہ کا سب سے روشن پہلو یہ ہے کہ جب حملہ آور بجرنگ دل کے کارکنوں نے دیپک سے ان کا نام پوچھا تو انہوں نےجواب دیا ’محمد دیپک‘۔اس واقعہ سے بہت سی امیدیں وابستہ ہیں۔ اس سے یہ امید پیدا ہوتی ہے کہ ہندو قوم پرستی کے حامیوں کی طرف سے نفرت کے سیلاب میں انسانیت مکمل طور پر تباہ نہیں ہوئی ہے۔ دیپک ہندوؤں اور مسلمانوں کے مضبوط رشتے کی زندہ مثال ہے جو کبھی عام تھا لیکن اب مستثنیٰ ہو گیا ہے۔ اس استثنا سے صاف ظاہر ہوتا ہے کہ ماضی میں ہم آہنگی کی فضا تھی۔ دیپک کمار کو سو سلام۔ لوک سبھا میں قائد حزب اختلاف راہل گاندھی نے دیپک کمار کو مبارکباد دیتے ہوئے کہا کہ ’’دیپک آئین اور انسانیت کی حفاظت کیلئے لڑ رہے ہیں، جسے بی جے پی اور سنگھ پریوار کے لوگ  روزانہ اپنے پیروں تلے روندنے کی سازش کرتے ہیں۔ وہ نفرت کے بازار میں محبت کی دکان کی زندہ علامت ہیں، جو اقتدار میں رہنے والوں کو چبھتی ہے۔‘‘ سنگھ پریوار جان بوجھ کر ملک کی معیشت اور سماج میں زہر پھیلا رہا ہے تاکہ ملک تقسیم رہے اور چند چنندہ لوگ خوف کی بیساکھیوں کے سہارے حکومت کرتے رہیں۔دیپک کے پاس اس سوال کا بہت دلچسپ جواب تھا کہ انہوں نے اپنی شناخت محمد دیپک کے طور پر کیوں کی۔ انہوں نے کہا کہ ’’سرسوتی میری زبان پر  ہوئی تھی، اسی وجہ سے میرے منہ سے محمد دیپک کا نام نکلا۔ میں نے سوچا کہ میں ہندو ہوں، یہ جان کر ماحول پرسکون ہو جائے گا لیکن اس کے بجائے، میرے خلاف ایف آئی آر درج کر دی گئی ہے۔‘‘

امید کی جانی چاہئے کہ ہرش مندر اور دیپک کمار جیسے اور بھی بہت سے لوگ معاشرے میں نظر آئیں گے جو ہندوستان کے حقیقی تصور کی نمائندگی کرتے ہیں۔