عوامی امتحانات میں غیر منصفانہ طرز عمل کی روک تھام سے متعلق ترمیمی بل میں کی جانے والی تبدیلیوں کی مخالفت بے معنی ہے۔ امتحان میں بدعنوانی پر سخت سزائیں دینے، تحقیقات اور مقدمات کی بروقت تکمیل کو یقینی بنانے اور قانون کے تحت جرائم سے نمٹنے کیلئے خصوصی فاسٹ ٹریک عدالتوں کے قیام کے خلاف کوئی کیسے ہو سکتا ہے؟ دراصل، پوری نسل کی امیدوں کو برباد کرنے کے مجرم، قید کی سزا اور بھاری جرمانے سے بھی زیادہ سخت سزا کے مستحق ہیں۔ جرمانے یا جیل کی سزاؤں کی کوئی رقم اس بدعنوانی اور مایوسی کا مناسب طور پر ازالہ نہیں کر سکتی جو سماج میں غلط طریقے سے بنائے اور غلط طریقے سے چلائے گئے نظام سے جنم لیتی ہے۔ اسی طرح یہ یقین کرنا فضول ہے کہ ان تبدیلیوں سے پیپر لیک ہونے کا مسئلہ ختم ہو جائیگا۔ اسی مسئلے نے احتجاج کو جنم دیا، سرکار کو قانون کو مزید سخت کرنے پر مجبور کیا، جس کا اب تک کوئی اثر نہیں ہوا۔ 

 

 

نئے قانون کا مقصد مجرمین میں خوف پیدا کرنا ہے۔ عوامی امتحانات میں غیر منصفانہ طرز عمل کی روک تھام ایکٹ۲۰۲۴ء بھی اسی مقصد کے ساتھ نافذ کیا گیا تھا۔ خیال کیا جاتا تھا کہ یہ قانونی خلا کو پُر کرے گا۔ اس ایکٹ کے مقاصد اور وجوہات کے بیان میں کیا گیا ہے کہ ’’مرکزی حکومت اور اس کی ایجنسیوں کے ذریعہ منعقد ہونے والے عوامی امتحانات میں شامل مختلف اداروں کی طرف سے غیر منصفانہ طرز عمل یا جرائم سے نمٹنے کیلئے کوئی خاص، جامع قانون نہیں ہے لہٰذا، امتحانی نظام میں کمزوریوں کا فائدہ اٹھانے والوں کی نشاندہی کرنا اور ان کو مؤثر طریقے سے حل کرنے کیلئے ایک جامع اور شفاف مرکزی اورجامع قانون لانا ضروری ہے۔ امتحانی نظام اور نوجوانوں کو یقین دلانا کہ ان کی ایماندارانہ اور مخلصانہ کوششوں کا صلہ ملے گا اور ان کے مستقبل کو محفوظ بنایا جائیگا، اس بل کا مقصد ایسے افراد، منظم گروہوں ، یا اداروں کو مؤثر طریقے سے روکنا ہے جو مالیاتی یا غیر قانونی فائدے اور عوامی امتحانی نظام پر منفی اثر ڈالنے کیلئے مختلف غیر منصفانہ طریقے استعمال کرتے ہیں۔